Kulaje 3
3
Piyɛr aji dəw kə̂ dəbbə rɔɛ̂ oy
1Marə ndɔ, Piyɛr kə Jan dawje kə kəy-polo Lubba tə̂ mba duju Lubba kə gɔl kar kə̂ mota kə̂ lo-kul tə̂. 2A dəwje awje kə marə dəw kə̂ duje to nje-gɔl-goto undɛ̂je ta-kəy-polo Lubba tə̂ kə̂ daw bbar nan «Ta-kəy kə̂ Kura.» Daw dundɛ̂ lo tə̂ənn kə ndɔ kə ndɔ karə n̂-kɔy nɛ̂n ji dəwje tə̂ kə̂ aw andəje kəy-polo Lubba tə̂ le. 3Noo Piyɛr kə Jan kə̂ dawje ta kandə kəy-polo Lubba tə̂ le a, n̂-dujude karə darɛ̂ marə nɛ̂n dumɛ̂n nɛ̂n. 4Kəm Piyɛr de kə Jan to kə dɔɛ̂ tə̂ ngaâ Piyɛr pa nan: «Aaje!» 5Dəw le aade mba nəjə to nâ kinga marə nɛ̂n jide tə̂. 6A Piyɛr pa arɛ̂ nan: «Andə wase narɛ to rɔm tə̂ ta kari ang. A nɛ̂n kə̂ to rɔm tə̂ â nəənn â mari: Kə ri Jeju-Kristə kə̂ Najarɛtə, in taar ə-nja!» 7Piyɛr uwa ji-kɔl dəw le arə in taar. Kəm naan tə̂ nəənn njaa gɔlɛ̂je kə əsəngələ gɔlɛ̂je mɔnguje. 8Naal bbatə nar taar ngaâ n̂-nja. Nandə kə de kəy-polo Lubba tə̂ naw nja, naw tal n̂-turu nɔsu nɛ̂n gaji Lubba. 9Dəwje tɔyn ooeje naw nja ngaâ naw nɔsu gaji Lubba. 10Dəwje gəreje kə majɛ̂ to nje-nɛ̂n-kɔy kə̂ isi ləw ta-kəy-polo Lubba tə̂ kə̂ daw bbar nan «Ta-kəy kə̂ Kura» le njaa â nəənn. Bbəəl uta dɔ dəwje le ngaâ dɔde ayn mba nɛ̂n kə̂ inga dingaw le.
Piyɛr pa tar arə dəwje kəy-polo Lubba tə̂
11Dəw le inya go Piyɛr de kə Jan ang. A dɔ dəwje tɔyn ayn ngaâ daynje dawje rɔde tə̂ kɔ baranda tə̂ kə̂ daw bbar nan «Baranda lə Salomɔn.» 12Piyɛr oo nɛ̂n le be a, pa arəde nan: «Dəwje kə̂ Ijarayɛl, mba ddi bba arəje bbəəl ddase mba nɛ̂n kə̂ tee nəənn wa? Mba ddi bba aw aajeje tokə nɛ̂n kə̂ ddəw singaje tə̂ njaa wase mba ngəm kə̂ jaw ngəm Ndu lə Lubba le bba n-ddɛɛ̂ jarə n̂-nja wa? 13Lubba lə Abaraham, lə Ijakə, lə Jakobbo, Lubba lə kajeje ɔsu gaji Nje-kula laa Jeju kə̂ uwɛ̂je ilɛ̂je ji njê-kɔn-bbeje tə̂ ngaâ ə-mbəteje nɔn Pilatə tə̂ kə̂ oo maji ta kinyɛ̂ le. 14Ə-mbətəje dəw kə̂ maji tɔyn, dəw kə̂ gatə gatə ngaâ ə-dujuje arə dɔru nje-tɔl dəwje kəy-kula tə̂ darəse. 15Dəw kə̂ nje-karə təbbə kə̂ ə-tɔlɛ̂je le, Lubba ndole arə n-to njê-tar-naji nɛ̂ɛnn le. 16Dingaw kə̂ ooeje ngaâ ə-gəreje kə̂ ar nəənn, mbal dɔ koo kə̂ joo məje tə̂ kə ri Jeju le â, ri Jeju le arɛ̂ singa. Ddəw mə-kunn tə̂ kə Jeju le â dda arə rɔɛ̂ ddee maji arə sese tɔyn njaa aw ooje nəənn.
17«A ngakɔnʼmje, m-gərə maji to sese kə njê-kɔn dɔseje ə-ddaje nɛ̂n baann mba to nɛ̂n kə̂ ə-gərəje ang. 18Ləw baa njaa, Lubba unda tar nəənn ta njê-kilaje mbər tar tə̂ laa tɔyn nan Kristə laa a koo ndoo. Tar le â ddee to nɛ̂n kə̂ tɔkɔrɔ nəənn. 19Yeenn a, maji karə ə-turuje məse ta ə-təlje rɔ Lubba tə̂. Baann bba nâ toko majangje ləse 20ngaâ Əbbə-dəwje a karəse marə kar kə̂ â kisije kə mə-wul-lɔm ngaâ nâ kula Jeju kə̂ to Kristə kə̂ n̂-gɔl kete ta kulɛ̂ karəse le. 21Karje tə̂ nəənn, Kristə le a nayn darâ ndərəng ndɔ kə̂ Lubba a təl kə nɛ̂nje tɔyn karə to kə dɔgɔlɛ̂. Tar nəənn le Lubba unda ta njê-kilaje mbər tar tə̂ laa kə̂ nundade dang narə paje. 22Mɔyijə pa kete nan: ‹Əbbə-dəwje Lubba ləse a kula marə dəw kâra horo ngakɔnse tə̂ tokə əman nəənn karəse to nje-kila mbər tar lə Lubba. A kooje tɛɛ̂ mə nɛ̂nje tə̂ tɔyn kə̂ nâ pa karəse. 23Dəw kə̂ oo tar lə nje-kila mbər tar lə Lubba le ang a, dâ kɔrɛ̂ horo dəwje tə̂ lə Lubba kə ddang#3:23 Dəteronɔm 18:15,18,19.› 24Njê-kilaje mbər tar lə Lubba tɔyn, unn kute dɔ Samuwɛl tə̂ kə njê-kilaje mbər tar lə Lubba kə̂ ddeeje goe tə̂ tɔyn paje tar ndɔje kə̂ jisije tə̂ nəənn le. 25Tarje kə̂ Lubba unda ta njê-kilaje mbər tar tə̂ laa ləw arə paje le to mbase tɔ. Lubba ɔsu dɔnɔn kə kasəse arə sese kara andəje mə dɔnɔn tə̂ le tɔ. Lubba le pa arə Abaraham nan: ‹Ddəw tə̂ lə njê kə̂ gəli tə̂, mâ bbar Tar kə̂ Maji dɔ dəwje tə̂ tɔyn kə̂ duninya tə̂#3:25 Jənɛsə 22:18 ; 26:4.› 26Sese â Lubba unn Nje-kula laa dɔngɔr ulɛ̂ karə n̂-bbar Tar kə̂ Maji dɔse tə̂, karə nɔruse kâra kâra tɔyn mə nɛ̂n-ddaje tə̂ ləse kə̂ maji ang.»
Jelenleg kiválasztva:
Kulaje 3: KabbaDkS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
