GÉNESIS 6
6
Gentecunaca yallitaj millai tucushcami
1Tucui cai pachapi gentecuna achcata mirari callarishpaca ushushicunatapishmi charircacuna. 2Taita Diospaj churicunaca chaicunapaj ushushicunaca sumaj cajta ricushpami tucuimanta yalli sumaj cajcunata agllashpa paicunapaj huarmi cachun japirca. 3Chaimi Mandaj Diosca: “Ñuca espirituhuan causashpa huiñaipaj millaita ruracuchunllaca mana saquigrinichu. Paicunaca huañujlla aichayujmi. Chaimanta cunanmantaca, 120 huatayujcamallami causangacuna” nirca.
4Taita Diospaj churicuna runacunapaj ushushicunahuan chayarinacujpi chai huachashca huahuacunami, chai punllacunapipish, q'uipa punllacunapipish yallitaj jatun c'ari c'ari runacuna tiyarca. Paicunaca alli macanacuj millai runacunami carca.
5Cai pachapi causajcunapaj ruraicunaca yallitaj millai cashcatami Mandaj Diosca ricurca. Paicunapaj shungupica yallitaj millaita ruracunalla yuyaihuan jundami carca. 6Mandaj Diosca runata rurashpa cai pachapi churashcamantaca, shungu nanarishpami llaquirirca. 7Chaimi Mandaj Diosca: “Cai pachapi causachun rurashpa churashcacunataca gentecunatapish, animalcunatapish, llucaj animalcunatapish, huairata purij alasyuj animalcunatapish tucuita chingachisha. Paicunataca mana ruranatami rurashcani” nishpa yallitaj llaquirirca.
8Shina cajpipish Mandaj Diospaj ñahuipica, Noellami allita ruraj cashca ricurirca.
Huambuj huasita Noé rurashcami
9Noepaj huahua huahua callari yayacunaca caicunami: Noé causai punllacunapica, Noellami cashcata ruraj, ima juchachina illajlla carca. Noeca Taita Dioshuanmi purirca. 10Noeca Sem, Cam, Jafet quimsa churicunatami charirca.
11Taita Diospaj ñaupajpica cai pachaca yallitaj llaqui, millanana ruraicunahuan jundami carca. 12Taita Diosca cai pachata ricushpaca, cai pachaca yallitaj millanana cashcatami ricurca. Cai pachapi causajcuna tucuicuna paicunapaj quiquin ñanta purishpa yallitaj millanana tucushcamantami chashna carca. 13Chaimi Taita Diosca Noetaca: “Cai pachapi causajcuna yallitaj millaita rurana yuyailla millaita rurajpi, cai pachaca yallitaj millanana cashcamanta cai pachapi causaiyuj tucuicunandij, cai pachandijmi chingachinata yuyarircani. 14Cunanca canca gofer caspicunahuan jatun huambuj huasita ch'ican ch'ican ucucunayujta rurangui. Chai huasiman yacu ama yaicuchunca jahuatapish, ucutapish breahuan tucuita llihuingui. 15Chai jatun huambuj huasitaca cashnata rurangui: Sunimanca 135 metrota, anchomanca ishqui chunga ishqui metro chaupita, altomanca chunga quimsa metro chaupita rurangui. 16Chai jatun huambuj huasitaca, quimsa altibajoyujta rurangui. Jahua c'atamanta uriman chaupi metro shinata medishpa ventanata rurangui. Shuj ladomanca punguta rurangui. 17Ñucaca cai pachapi causaiyuj caj tucuicunata chingachingapajca cai pachamanca yacu juillutami cachagrini. Cai pachapi tucui ima tiyajcunami huañunga. 18Ashtahuanpish canhuanca shuj ruranatami callarichigrini. Chaimanta canpish, cambaj churicunapish, cambaj huarmipish, cambaj churicunapaj huarmicunapish chai jatun huambuj huasiman yaicunguichij. 19Cai pachapi causaj tucui animalcunamantaca, chaipurallataj caj shuj c'arita shuj huarmita ishqui ishquita jatun huambuj huasiman yaicuchingui. Chaipi cashpami cancunapish, paicunapish mana huañunguichij. 20Alasyuj animalcunapish chaipurallataj caj ishqui ishqui, jatun animalcunapish chaipurallataj caj ishqui ishqui, llucashpa purij animalcunapish chaipurallataj caj ishqui ishquimi cambajman shamushpa mana huañungapaj canhuan yaicungacuna. 21Cancuna micunapajpish tucui laya micunata, animalcunaman caranapajpish tucui laya micunata achcata huaquichingui. Chashnami yaricaihuan mana huañunguichij” nircami.
22Noeca, chashnatajmi rurarca. Taita Dios mandashca shinami tucuita rurarca.
Jelenleg kiválasztva:
GÉNESIS 6: QCHI04
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Quichua Chimborazo Bible Revision 2010 © United Bible Societies, 2010.
