Ala Kalɔ Buse 9
9
Katɔti Únyimi Lɛla Lɛdi Ku Noa
1Amu na Katɔti úte Noa ku nwuna bebi kusɛ kusɛ na ɔ́su-ma ɔnini, “Bɛwɔ na bimomo na bɛƒɔ kalɔ lɛlɔ ƒui. 2Na beƒiebuo bani nkya kalɔ lɛlɔ ƒui ku baasɛ bani mɔɔví kayaa ku bebweyi bani mɔɔví kalɔ lɛlɔ ku kɔbɛ kɔni nkya ɛpu kemmo ƒui ni, líti-ma lɛ́kya-mi enu kemmo ka bɛdi-ma lɛlɔ. 3Na beƒiebuo ku baasɛ ku bebweyi bamɛni ƒui badubo-mii bɔyia. Na lɛla biala lɛni mbo ngba na liisié taavi linwini adila lite-mii. Kalɛ na líti lɛku kemmo evete lidu lidu líte-mii nnii bɛdi ni, lɛni kani na líti lɛla biala muute-mii ɔƒɛni.
4“Nsu bitakun ebuo ɔni bélii-nwu limɔ bádu na ubugya ɔmu ɔkya-nwu kemmo. 5Ɔsika lídie ukyuli na mina udu kenye na ebuo iye ukyuli ɔni ndubo ukyuli ubugya kalɔ buwi ni, ami Katɔti ndubo-nwu kɔtu bɔni. Na ukyuli biala ɔni mewi ukyulikpana ubugya kalɔ ni, ami Katɔti ndubo-nwu kukpi kɔtɔ bɔdu.
6“Ukyuli biala ɔni mewi nwuna ɔkpana ubugya kalɔ ni,
anwu lɛnɔ ukyuli ndubo-nwu ubugya kalɔ buwi.
Ɔsika Katɔti udu kenye
na Katɔti údie ukyuli.
7Na amii ni, bɛwɔ na bimomo biyile kalɔ kammɔ ƒui lɛlɔ.”
8Ɔmmɔ kama ni, Katɔti ɔ́su Noa ku nwuna bebi ɔnini, 9“Ɔƒaani ni, línyimi lɛla lɛdi ku-mii ku bina bawɔ bani masia-mii kama. 10Na linyese lɛmɛni lɛdanku baasɛ ku ɔmantɛ bebuo ku beƒiebuo bani nákya-a kudɔ na bálɛ ɔkɔlɔ bonwu ɔmmɔ kemmo. 11Na lise mina bunyimi líse ka nsɔ lɛɛɛdubo lɛla lɛdi biala ngba udu bɔyila ku ntu. Na ɔnantu ɔsɔ ulana ulaƒɔ kayawi ƒui na wayila-ka udu lɛnɔ.”
12Amu na Katɔti ɔ́sɔ ɔ́su ɔnini, “Ndubɔbla lɛla lɛni madi bunyimi bɔmɛni lɛlɔ, na ani ndubɔkya ami ku-mii ntɛ ku kebweyi biala na kákya-a kudɔ. Na ɔmɛni ndubɔbla likposela wete kaba bekyuli bani ƒui mebo lɛnɔ. 13Lɛ́ya na kɔdigbo kɔdubɔlɛ kayaa kemmo, na aku ndi likposela lɛni nkya ami ku kayawi bekyuli ƒui ntɛ. 14Na uwi biala na ulɔyɔ iye liƒlukutu lɛ́sia kayaa na kɔdigbo kɔ́lɛ-nwu kemmo ni, 15ndubo bunyimo mina lɛla lɛni na línyimiku-mii ku kayawi bebweyi lidu ƒui ka ntu bɔsɔ buleyi buláƒɔ kayawi ƒui na bɔyila kayawi ala ammɔ udu. 16Na uwi biala na kɔdigbo kɔ́lɛ na kayaa ni, ndubo bunyimo lɛla lɛni na ami Katɔti línyimi ku lɛla biala nli ngba.”
17Anwuɔsu Katɔti ɔ́su Noa ɔnini, “Lɛla lɛmɛni ndi likposela ute mina bunyimi bɔni na línyimi ku lɛla biala mbo ngba na kayawi kamɛni lɛlɔ.”
Noa Ku Nwuna Bebi
18Na uwi ɔmmɔ ni, Noa bebi bammɔ anyi ndi Sem ku Ham ku Yaƒet na ama ku-nwu nálɛ ɔkɔlɔ bonwu ɔmmɔ kemmo. Na Ham náwɔ Kanaan. 19Noa bebi ɛtɛ bani na ubo ndi bani anyi na bɔ́lɔ mɛni. Na ama náwɔ bebi na báƒɔ kalɔ lɛlɔ ekpo ƒui.
20Na uwi ɔmmɔ ni, Noa úse kalɔ ɔɔƒɔ kemo na ɔ́bla adingyii kemo kadi. 21Amu ka ɔ́ni egyiibi ani na úti ɔ́bla ntɛ mmɔ ni, ntɛ bɔmmɔ bɔ́da-nwu na bɔ́ya-nwu na ɔ́tɛ ɔ́lɛɛ na údie lɛlɔ kasɔngya na nwuna kevo kemmo. 22Na uwi ɔmmɔ lɛlɔ ni, Ham ɔni náwɔ Kanaan úbo úbanu ka ɔti Noa ɔtɛ kasɔngya. Amu na útásu nwuna banwani bananabi inyɔ bakladi. 23Nsu Sem ku Yaƒet ama béti awu gyɔlɔɔ ɔdi na bakɛ kama kama béti bétébi-nwu lɛlɔ. Na bénwini bana anumi bésienku kesii bamba kalɛ na balanu bana ɔti kasɔngya. 24Ɔmmɔ kama ka Noa ɔ́ta kalɛɛkɔ ni, básu-nwu lɛla lɛni na Ham ɔni ndi nwuna kawɔkpulo ɔ́bla.
25Amu na úwida Kanaan ɔnini,
“Adubɔnuku-ni!
Aaadubo kenyekɔ kadi bɔkɛ
adubo bunwini ƒula banwani ƒui kabla ɔblane ukplodi.”
26Ɔmmɔ kama ni, ɔ́su ɔnini,
“Bimwi Unwoti ɔni ndi Sem Katɔti.
Na ɔya na Kanaan unwini Sem kabla ɔblane.
27Na ɔya na Yaƒet kalɔ lɛmii lisie kama libu.
Na ɔya na Yaƒet bawɔ bawɔ ku Sem bawɔ bawɔ badi bete lɛlɔ.
Na Kanaan unwini Yaƒet kabla ɔblane.”
28Na ɔnantu ɔmmɔ kama ni, Noa ɔ́sɔ úlie ngba akwa eti maatɛ (350). 29Anwuɔsu akwa ani ƒui na Noa ɔ́ƒɔ asa na úkpi ndi akwa eti leevu-yaalenwi (950).
Jelenleg kiválasztva:
Ala Kalɔ Buse 9: lef
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
