Ohuchaaka 23
23
Saara afwa mani Abburahamu yaakula eloba ly'ohusiihamo
1Saara yayiindira ohumala emyaaka emia ndala neende amahumi kabiri neende kitaanu-na-kibiri (127). 2Saara yafwiira Hebburoni mu syaalo sya Kanani, mani Abburahamu naamulira muno. 3Ao mani Abburahamu yasiingira yaaleha omulaambo kw'omuhasi wae, yaachia eyiri Abahiiti yababoolera ati, 4#Abaib 11:9,13; Biho 7:16. “Ese ndi walukeendwa owamenya ano yi muli. Muunguseho hu loba, siihemo omuhasi waange.” 5Abahiiti bamukobolamo bati, 6“Tekeeresa bi huboola ewe omwaami weefwe. Siiha omuhasi wao abuundu weefwe ahiramo obulai. Buli muundu yeesi hweefwe achia ohuba omusangaafu ohuhuberesa eng'ani, onyale ohumusiihamo.” 7Abburahamu yaguunama mu moni waabwe 8yaboola ati, “Nimufukiriire muti ese siihe ano omuhasi waange, mwekweede Efirooni omwaami wa Sohari, 9yaanguse eng'uungu eyiri Makipela, eyiri aambi neende endalo yae. Mumusabe ayiinguse, njia ohumutuunga obukusi bwoosi bulaanu buti nimubona, yibe eyaange y'ohusiihaangamo abafu baange.” 10Efirooni yesi yali niyehaale alala neende Abahiiti baandi, abuundu yi bebuusiraanga hu mulyaango kw'esiko. Efirooni Omuhiiti yaboolera Abburahamu abaandu boosi nibawulira ati, 11“Haba daawe omwaami waange ewe! Ndekeerese. Njia ohuhuberesa omukuunda, haandi huberese neende eng'uungu yirimo yosi, abaandu baange beene bano nibabona. Njia ohuhuberesa osiihemo omuhasi wao.” 12Abburahamu yaguunama mu moni wa Abahiiti 13mani yaboolera Efirooni abebulanwa bae boosi nibawulira ati, “Hwekongooya, otekeerese. Omukuunda kwoosi njia ohukukula hu bukusi. Fukiirira ngutuunge, mani siihemo omuhasi waange.” 14Efirooni yakobolamo ati, 15“Omwaami waange, omukuunda kuno kuhoyera ebituundu by'efeesa emia chine (400), esyo sihunyaasira siina? Ewe mala kasiihamo omuhasi wao.” 16Abburahamu yafukiirira, mani yapiimira Efirooni ebituundu by'efeesa emia chine (400), ohuchianakana neende ebipiimo bi bachurusi beehoonyeraanga.
17Mani eyo niyo engeri yi mukuunda kwa Efirooni okwa Makipela, okwali ebukwe wa Mamure, kweehola okwa Abburahamu. Omukuunda kuno kwalimo eng'uungu neende emisaala kyoosi ohwoola hu lwaaho lwaakwo. 18Abahiiti boosi abali muluhiiho mu mulyaango kw'esiko basimanya bulai bweene bati, omukuunda okwo kw'Abburahamu nikwo. 19Bino nibyawa, Abburahamu yasiiha Saara omuhasi wae mu ng'uungu eyiri mu mukuunda kwa Makipela okwali ebukwe wa Mamure mu syaalo sy'Abakanani. 20Omukuunda okwo alala neende eng'uungu yalimo, ebyali eby'Abahiiti, byeeholera elalira ebya Abburahamu, eby'ohusiihaangamo abafu bae.
Jelenleg kiválasztva:
Ohuchaaka 23: SAMIA
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©Bible Society of Kenya, 2019
©Bible Society of Uganda, 2019
