Ohuchaaka 21
21
Ohwiibulwa hwa Yisaka
1Omwaami yaberesa Saara ehabi koti lu yali yamusuubisa. 2#Abaib 11:11.Saara yanyoola amabaanga, yeebulira Abburahamu mu bukofu bwae omwaana musyaani. Omwaana yeebulwa mu biha byeene bi Nasaae yali amuboleere. 3Abburahamu yakuliha omwaana oyo Yisaka. 4#Huc 17:12; Biho 7:8.Yisaka niyamala endaalo chitaanu-na-chidatu, Abburahamu yamuheba koti lu Nasaae yali yamulagira. 5Abburahamu niyeebula Yisaka, yali neende emyaaka emia ndala (100) eky'obuhuluundu. 6Mani Saara yaboola ati, “Nasaae yandeteere esangaalo neende enjeho. Buli muundu onasiwulire achia ohucheha naange.” 7Mani Saara yameedaho ati, “Wiina mweene owali naamanyire ati, Saara omuhasi wa Abburahamu yesi anyala ohwiibula omwaana yaamunuunia hu mbeere chae? Nae bone, mbano mwiibuliire omwaana musyaani mu bukofu bwae.”
8Omwaana oyo yahula, mani hu ludaalo lu bamutusira hu lubeere, Abburahamu yahola esidyaalo sihoongo.
Hagari neende Yisimaeli beeruswa
9Ao mani Saara yeemao yaabona omwaana yi Hagari omuhasi Mumisiri yi yebulira Abburahamu naabaya neende Yisaka omwaana wae. 10#Gal 4:29,30.Saara yababona mani yaboolera Abburahamu ati, “Yirusa omuhasi muwaambe wuno atule ano neende omwaana wae oyo. Olwohuba omwaana w'omuhasi omuhalaabani wuno haba saahoyera ohunyoolaho hu myaandu kyao, ekichia ohuba obusiha bwa Yisaka omwaana waange.” 11Esiindu sino syanyaasa muno Abburahamu mu bibaaso, olwohuba Yisimaeli yesi yali omwaana wae. 12#Rom 9:7; Abaib 11:18.Mani Nasaae yaboolera Abburahamu ati, “Oteyendeherera muno ebidiira hu mwaana wa Hagari omuwaambe wao. Hola buli siindu si Saara ahuboolera, olwohuba abeechuhulu ba ndahusuubisa bachia ohutula mu Yisaka sa. 13Nae omwaana w'omuhasi muwaambe oyo, yesi njia ohumuba abaana baangi, mani beehole esyaalo. Olwohuba oyo yesi mwaana wao niye.” 14Nibwahya echuli mu mabwiibwi, Abburahamu yaberesa Hagari ebyohulya neende esikiingiro sy'eseero sichuulemo amaachi. Abburahamu yata omwaana oyo hu mukoongo kwa Hagari, mani yaamuseebula. Hagari yaawaao mani yakeendaanira mu sichiimi sya Bberisebba.
15Nae amaachi komu sikiingiro sy'eseero esyo nikawaamo, Hagari yaleha omwaana oyo mu siiniha sy'omusaala kuundi. 16Mani yeseenda yehala emiita emia ndala (100) eyalehooho neende omwaana oyo. Yaboola mu mwooyo kwae ati, “Haba siinyala ohwesimiirisa ohubona omwaana waange naafwa.” Niyali niyehaale ao yatingaala omwaana wae, mani yatuunduha yaalira. 17Nasaae yawulira omwaana n'alira mani malaika wa Nasaae naatula Muukulu n'alaanga Hagari naamuboolera ati, “Hagari, siina syeene esihunyaasa ebibaaso? Otatya daawe. Nasaae awuliire omwaana oyo n'alira. 18Siingira, okiinge omwaana oyo, omwaakate bulai. Njia ohuhola esyaalo sihoongo ohutula mu beechuhulu bae.” 19Nasaae yamwaamula emoni, mani yaabona esulo y'amaachi. Yachia yaadaya amaachi, yeechusa esikiingiro sy'amaachi sy'eseero esyo, mani yaaberesa omwaana amaachi kaandi ohung'wa. 20Mani omwaana oyo yaahula Nasaae naali nae. Yisimaeli yamenya mu sichiimi sya Parani, mani yaaba omuchweenufu muno mu hulwaanira obuyiingo. 21Ng'ina yamunyoolera omuhasi ohutula mu syaalo sy'e Misiri.
Embuliirisania akatikaati wa Abburahamu neende Abbimeleki
22 #
Huc 26:26. Ao mu biha ebyo, Abbimeleki neende Fikoli omuhoongo w'eye lyae, bachia baaboolera Abburahamu bati, “Nasaae ali naawe mu buli siindu sy'ohola. 23Bulaanu sakira mu moni wa Nasaae ndeechubire oti, soochia huumbacha kata sa ohubacha abaana baange kata sa abeechuhulu baange. Koti lu mbeere omuwulisi yooli, mbaasa endi wesi ochia ohuba omuwulisi yi ndi neende eyo yoosi y'ochia ohumenyaanga.” 24Abburahamu yaboola ati, “Ndeechuba.”
25Bulaanu Abburahamu yekanyiirisira Abbimeleki ebidiira hu sulo yi bahalaabani ba Abbimeleki bali bawaamba. 26Abbimeleki yeemao yaboola ati, “Haba siimanyire owasihola daawe. Haandi haba simumbooleraangaho esiindu syoosi. Lwaleero nilwo olutaangira ohusiwulira.” 27Mani Abburahamu yaaberesa Abbimeleki amakoondi neende eng'oombe, mani boombi bahola endagaano. 28Abburahamu yawulamo amakoondi madoto kataanu-na-kabiri ohutula mu hoonge yae. 29Abbimeleki yateeba Abburahamu ati, “Lwasiina wawuulemo amakoondi madoto kataanu-na-kabiri?” 30Nae Abburahamu yakobolamo ati, “Fukiirira huberese amakoondi madoto kataanu-na-kabiri kano. Sino sinyale ohwomiisa siti, niise owayaba esulo yino.” 31Sakira, abuundu ao alaangwa Bberisebba. Olwohuba ao niwo yi boombi baholera esichubo. 32Nibamala ohuholera endagaano yino Bberisebba, Abbimeleki neende Fikoli bakobola mu syaalo sy'Abafilisiti. 33Mani Abburahamu n'ataaka omusaala mutamarisiki Bberisebba, mani yeenamirao Omwaami, Nasaae w'endaalo choosi. 34Abburahamu yamenya mu syaalo sy'Abafilisiti ohumala embaka yiyeraho.
Jelenleg kiválasztva:
Ohuchaaka 21: SAMIA
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©Bible Society of Kenya, 2019
©Bible Society of Uganda, 2019
