Ohuchaaka 16
16
Hagari neende Yisimaeli
1Sarai, omuhasi wa Abburamu yali omukuumba nataamwiibuliraho omwaana yeesi. Nae Sarai yali neende omuhalaabani muhasi ohutula Misiri olaangwa Hagari. 2Sarai yaboolera Abburamu ati, “Bona, mbao Omwaami siyaanganya ohuhwiibulira abaana. Lwasiina sooyira omuwaambe waange muhasi wuno? Awuundi nyala ndanyoola abaana ohumubitiramo.” Abburamu yafukiirisania neende bi Sarai yamuboolera. 3Bino byaliwo Abburamu n'amalire mu Kanani embaka y'emyaaka ehumi. Sarai, omuhasi wae yabukula omuhalaabani wae muhasi olaangwa Hagari Omumisiri, mani naamuberesa Abburamu wamwe abe omuhasi wae. 4Abburamu yaba neende Hagari, mani yanyoola amabaanga. Nae Hagari niyabona ati ali aasito, yachaaka ohulekeeresa Sarai omuhoongo wae. 5Sarai yaboolera Abburamu ati, “Niiwe okera Hagari niyaambisamo emoni. Ndahuba omuhalaabani waange oyo endi abe naawe, nae niyabona ati ali aasito, yachaaka ohuundekeeresa sa. Leha Omwaami atuheerengeo omusaango ese naawe.” 6Nae Abburamu yaboolera Sarai ati, “Bona, omuwaambe wao oyo ali mu bunyala bwao, muholere syosi-syoosi syooba n'odaha.” Sarai yachaaka ohusaandya Hagari muno, mani niyeyiruhira n'awaao.
7Nae malaika w'Omwaami yanyoola Hagari mu siparara niyehaale aambi neende esulo y'amaachi, esulo yiri hu ngira yichia Suuri. 8Mani malaika yamuteeba ati, “Ewe Hagari, omuwaambe wa Sarai, otula yeena haandi oli ohuchia yeena?” Nae yamukobolamo ati, “Ndi ohwiiruha nindeeyiba hu Sarai omuhoongo waange.” 9Nae malaika w'Omwaami yamuboolera ati, “Kobola eyiri omuhoongo wao mani omuwulireenge.” 10Malaika w'Omwaami yamuboolera ati, “Njia ohwiingiya abeechuhulu bao babe abaangi abatanyala ohubalwa.” 11“Ochia ohwiibula omwaana musyaani, omukulihe Yisimaeli; olwohuba Omwaami awuliire amaliro kao. 12Achia ohuba koti esuhiri, achia ohulwaania buli muundu, haandi buli muundu amulwaanie. Haba saachia ohumenya alala neende abanaluyia bae.” 13Hagari niyeteeba omweene ati, “Mubwadyeeri bweene, mbweene Nasaae mani ndadoong'a omulamu ohusikaniaayaangaho?” Mani yalaanga Omwaami wali alomaloome nae ati, “Nasaae obona.” 14Sakira abaandu balaanga esulo yiri akatikaati wa Kadesi neende Bberedi bati, “Esulo y'Omulamu Mweene Owumbona”.
15 #
Gal 4:22. Hagari niyeebulira Abburamu omwaana musyaani, mani Abburamu yalaanga omwaana oyo Yisimaeli. 16Ebiha bi Hagari yeebuliramo Yisimaeli, Abburamu yali neende emyaaka amahumi kataanu-na-kadatu neende kisaasaba eky'obuhuluundu.
Jelenleg kiválasztva:
Ohuchaaka 16: SAMIA
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©Bible Society of Kenya, 2019
©Bible Society of Uganda, 2019
