Maatosa 13

Zerethi Zeriya Ura Leemiso

(Mar 4:1-9; Luqa 8:4-8)

1He gallas Yesuusi soope keyidi abba gaxan uttis. 2Daro derey iya yuushuwan shiiqin asaa abba gaxan aggaagidi wogolon gelidi uttis.#Luqa 5:1. 3Asaas darobaa leemison yaagidi odis:

“Issi goshshanchoy zerethi zeranaw keyis. 4I zeriya wode issi issi zerethati oge gaxan wodhidosona; entaka kafoti yidi maxi midosona. 5Issi issi zerethati garsan shaalloy de7iya biitta bolla wodhidosona. Daro biitti bayna gisho ellesidi dolis. 6Shin away keyin shullis; xaphoy bayna gisho melis. 7Issi issi zerethay aguntha giddon wodhis; agunthay diccidi he dolaa cuullis. 8Harati qassi aradda biitta bolla wodhis; dolidi ayfe ayfis. Issoy xeeta, issoy usupun tamma, issoy qassi hastama ayfis. 9Si7iya haythi de7iya uray si7o” yaagis.

10Yesuusa tamaareti iyako shiiqidi, “Ayis neeni deriyas leemison oday?” yaagidi oychidosona.

11I zaaridi, “Hintew salo kawotethaa xuuraa eray imetis, shin entaw imetibeenna. 12De7iya ubbaas guzhetana, iyaw darana, shin baynaysafe hari attoshin iyaw de7iyaraka eketana.#Maato 25:29; Mar 4:25; Luqa 8:18; 19:26. 13Hessa gisho, taani enti, xeellishe demmonna mela, si7ishe si7onna mela woyko akeekona mela entaw leemison odayis.

14“Isayaasi ba maxaafan odidaysi enta bolla poletis. I odishe,

“ ‘Hinte sissi si7eeta, shin akeekeketa;

hinte xeelleta, shin be7eketa.

15Ayis giiko, ha asaa wozanay zel7umis;

banta haythaa erishe tullisidosona,

banta ayfiya goozidosona.

Hessi bayneko enti banta ayfiyan be7idi,

banta haythan si7idi,

banta wozanan akeekidi,

taako simmana,

taka enta pathanashin’ yaagis.

16“Shin hinte ayfeti be7iya gishonne hinte haythati si7iya gisho hinte anjetidaysata.#Luqa 10:23-24. 17Ta hintew tuma odayis; daro nabetinne xilloti hinte be7eysa be7anawunne hinte si7eysa si7anaw amotidosona, shin entaw hanibeenna.

18“Hiza, ha zerethi zeriya uraa leemisuwa si7ite. 19Oge gaxan wodhida zerethi leemisoy haysa: salo kawotethaa qaala si7idi akeekona uraa wozanape Xalahey yidi iya wozanan de7iya zeretha maxi diggees. 20Shaalloy garsan de7iya biitta bolla zeretidaysi qaala si7idi ellesidi ufaysan ekeyisata. 21Shin xapho yeddanaw danda7onna gisho daro gam7okona. Qaala gaason metoy woyko goodetethi yaa wode ellesi dhubetoosona. 22Aguntha gaathan zeretidaysi qaala si7is, shin ha alamiya duussaa Hirgaynne duretetha qofay qaala cuulliya gisho ayfe ayfonna attees. 23Shin aradda biittan zeretida zerethay akeekan qaala si7iya uraa. I ayfe ayfees; issoy xeeta, issoy usupun tamma issoy qassi hastama ayfees” yaagis.

Leeshsho Leemiso

24Yesuusi entaw hara leemiso odis, “Xoossaa kawotethay ba goshshan lo77o zerethi zerida uraa daanees. 25Shin asi ubbay dhiskin iya morkey yidi gistiya giddon leeshsho zeridi bis. 26Gistey diccidi ayfiya wode leeshshoy iya giddon bentis.

27“Gadiya godaa aylleti godaako bidi, ‘Godaw, ne goshshan ne lo77o zerethi zerabikisho? Yaatin, leeshshoy awupe yidee?’ yaagidosona.

28“I entako, ‘Hessa morkey oothis’ yaagis.

“Aylleti godaako, ‘Nu bidi leeshuwa shoddana mela koyay?’ yaagidosona.

29“Shin I, ‘Atto bochofite; hinte leeshuwa shoddayis gishin gistey shodetana. 30Bochofite; caka wodey gakanaw issife dicco. He wode cakiya asata leeshuwa sinthatidi maxidi taman xuugganaw mirqen mirqen qachite. Shin gistiya shiishidi ta shaaliyan qolite’ yaagana” yaagis.

Ayfe Guutha Mithee Leemiso

(Mar 4:30-32; Luqa 13:18-19)

31Qassi hara leemiso yaagidi odis; “Salo kawotethay issi asi ba goshshan bakida guutha mithee ayfe daanees. 32He mithee ayfey hara mitha ayfetape guutha, shin iya dolaa diccida hara mithata ubbaafe aadhada gitatawusu. I tashiyan kafoti keexidi uttana gakanaw wolqaama mithi gidawusu” yaagis.

Irsho Leemiso

(Luqa 13:20-21)

33Kaallidika, Yesuusi hara leemiso odis; “Salo kawotethay issi maccasi heedzu gabate dhiille eka munuqada, munuqay dendana mela iyan gujida irsho daanees” yaagis.

34Yesuusi deriyas he leemisuwa ubbaa odis. Leemisoy bayna issibaaka odibeenna. 35Nabey ba maxaafan,

“Taani ta doona, leemison dooyana;

saloynne sa7i medhetoosape,

geemmidaysa odayis”

yaagidi odidaysi hessan poletis.#Maz 78:2.

Leeshsho Leemiso Birshetha

36Yesuusi deriya moyzidi soo gelis. Iya tamaareti iyako shiiqidi, “Goshshan de7iya leeshuwa birshethaa nuus oda” yaagidosona.

37I zaaridi, “Lo77o zerethi zeriday Asa Na7a. 38Goshshay ha alamiya. Lo77o zerethay salo kawotethaa nayta. Leeshshoy Xalahe nayta. 39Leeshuwa zeriday morkiya Xalahe. Caka wodey, wode wursethi; cakeysati kiitanchota.

40“Leeshshoy maxetidi taman xuugeteysa mela wodiya wursethan hessada hanana. 41Asa Na7ay ba kiitanchota kiittana. Enti nagaras gaaso gideysatanne iita oothiya ubbaa maxidi iya kawotethaafe kessana. 42Maxi shiishidi yeehoynne acha garcethi de7iya to7onna taman yeggana. 43He wode xilloti banta Aawa kawotethan awada poo7ana. Si7iya haythi de7ey si7o!

44“Xoossaa kawotethay goshshan moogetida miishe daanees. Issi asi he miishiya demmidi zaari moogis. Daro ufaytidi bidi baw de7iyaba ubbaa bayzidi he goshsha gadiya shammis.

45“Hessadaka, qassi salo kawotethay inqu geetetiya al7o shuchata koyiya zal7ancho daanees. 46Daro al7o inquwa demmidi bidi baw de7iyaba ubbaa bayzidi iya shammis.

Molo Oykiya Gite Leemiso

47“Qassi Xoossaa kawotethay abban yegetida dumma dumma qommo molo oykiya gitiya daanees. 48Molo oykiya asati moloy gitiyan kumin abbaafe gaxa kessidosona. Yan uttidi lo77uwa qori qori daachon yeggidosona, shin iita molota wora holidosona. 49Wodiya wursethan hessatho hanana. Kiitanchoti yidi nagaranchota xillotape shaakidi, 50yeehoynne acha garcethi de7iya to7onna taman yeggana.

51“Ha ubbay hintew gelidee?” yaagidi enta oychis.

Enti zaaridi, “Ee” yaagidosona.

52Yesuusi, “Hiza, salo kawotethaa eraa ekidi higgiya tamaarsiya ubbay, ba minjida shaluwape oorathaanne gal7a kessiya ase daanees” yaagis.

Yesuusi Naazireten Ixetis

(Mar 6:1-6; Luqa 4:16-30)

53Yesuusi ha leemisuwa odi wursidaape guye yaape dendidi bis. 54Ba yeletida biitta bidi ayhude woosa keethan deriya tamaarsis. Enti malaaletidi, “Ha uray ha cincatethaanne ha malaatata oothiya wolqaa awupe ekidee? 55Haysi anaaxiya na7aa gidenneyee? Iya aaye sunthay Mayraamo gidennee? Iya ishati Yayqooba, Yoosefa, Simoonanne Yihuda gidokonaayee? 56Iya micheti nuura de7oosona gidokona? Yaatin, ha uray ha ubbaa awupe ekidee?” yaagidosona. 57Hessa gisho, I giyaba ekonna ixidosona.#Yoha 4:43.

Shin Yesuusi, “Nabey ba yeletida biittaninne ba soo asaa matan bonchetenna” yaagis. 58Enti ammanonna ixida gisho daro malaatata he bessan oothibeenna.

Jelenleg kiválasztva:

Maatosa 13: GFBLVF

Kiemelés

Megosztás

Másolás