Mataayo 9

ɄYɨɨsʉ ikʉmponia ʉmuunu ʉnya vʉtamu wa kʉsugujuka

(Maliko 2:1-12; Luuka 5:17-26)

1ɄYɨɨsʉ akiingila mu waato, akalovoka ɨnyanza jya Galilaya, akasika kʉ vʉtsenge wa kʉ myave.#9:1 Vʉtsenge wa kʉ myave Ʉvʉtsenge ʉvʉ waale wa Kapelenaumu (Mataayo 4:13). 2Pwʉ avaanu vaninie vakiitsa kʉ mwene kʉnʉ vampɨmbile ʉmuunu ʉvɨ aasugujwike ʉmmana, agonile pa kɨtanda. ɄYɨɨsʉ wʉ aweene valɨ nʉ lwɨdɨko kʉ mwene, akambʉʉla ʉvɨ aasugujwike ʉmmana, akata, “Mwana vango, hekelaga, ʉsyɨkɨliiwe imbiivi tsyako.” 3Pwʉ avamanyisi va ndagɨlo vaninie avaalepwo apo, vakɨtsosa mu numbula tsa veene vakata, “Lola, ʉmuunu ʉjʉ ikʉnkinila ʉNgʉlʉve!” 4ɄYɨɨsʉ akagamanya amasaago ga veene ago, akavavʉʉtsa akata, “Kɨki musaaga amaviivi mu numbula tsiinyo? 5Lɨno! Lyebeepe lɨlɨku, ʉkʉmbʉʉla ʉvasugujwike ʉmmana ʉkʉta, ‘Ʉsyɨkɨliiwe imbiivi tsyako,’ evo ʉkʉmbʉʉla ʉkʉta, ‘Ɨma, ʉgendage’? 6Ndinogwa mulʉmanye ʉkʉta ʉMwana va Muunu alɨ nʉ vʉtavʉlɨlwa pa kɨlʉnga wa kʉsyɨkɨla imbiivi.” Pwʉ akambʉʉla ʉvɨ aasugujwike ʉmmana akata, “Ɨma, toola ɨkɨtanda kyako, ʉvujage kʉ nyumba jyako.” 7Pwʉ ʉmuunu ʉjwa akɨɨma, akahega, alɨkʉvuja kʉ myave. 8Avaanu avaale palya wʉ vagaweene ago, vakadwada siitso, nʉ kʉnʼginia ʉNgʉlʉve ʉvɨ aavapye avaanu amaka ndaago.

ɄYɨɨsʉ ikʉmwɨlanga ʉMataayo ʉkʉta ankongage

(Maliko 2:13-17; Luuka 5:27-32)

9ɄYɨɨsʉ wʉ ahegile apo akambona ʉmuunu mpamato ʉvɨ aatambʉlwagwa Mataayo. Ʉjwa aataamile apoonu ʉpwʉ aasonzaaga ɨsongo. ɄYɨɨsʉ akambʉʉla akata, “Tʉvʉʉke ʉngʼongage.” Baaho, ʉMataayo akahega, alɨkʉnkonga ʉYɨɨsʉ. 10Pwʉ ʉYɨɨsʉ akabɨha kwilya ɨkyakʉlya kwa Mataayo. Lola, wʉ valɨ mu nyumba ʉmwa, vakiingila avasangʉtsi va songo vongosu na vatulanongwa avange, vakataama, valɨkʉlya paninie nʉ Yɨɨsʉ na vakongi va mwene. 11AVafalisayo wʉ vagaweene ago, vakavavʉʉla avakongi va mwene avo vakata, “Kɨki ʉmmanyisi viinyo iilya paninie na vasangʉtsi va songo na vatulanongwa?” 12ɄYɨɨsʉ wʉ apʉliike ago akavavʉʉla akata, “Avatava vatamu navilonda ʉnʼganga, veene avatamu wʉ veene vilonda ʉnʼganga. 13Pwʉ lɨno mubɨhage mukɨmanyiise ɨkitsowa mu mamenyu aga, ‘Ndilonda ɨkɨsa kyene, nandilonda isyavʉpe.’#Hoseya 6:6 Nanditsili kukʉvɨɨlanga avikɨvona vagolosu, ndɨviitsye avatulanongwa.”

Ikulongwi tsa kwɨdɨnda ʉkʉlya ɨkyakʉlya

(Maliko 2:18-22; Luuka 5:33-39)

14Pwʉ avakongi va Yohana ʉMwotsi vakalʉta kwa Yɨɨsʉ, vakambʉʉtsa vakata, “Kɨki ʉwe na Vafalisayo tukɨdɨnda ʉkʉlya ɨkyakʉlya, aveene avakongi vaako navikɨdɨnda?” 15ɄYɨɨsʉ akavaanda akata, “Avaanu ʉwʉ vɨlangilwe viitse kʉ vʉtegʉlanie, viweesa ndeeti ʉkʉsʉsʉvala wʉ valɨ paninie nʉ ntegʉlanʼdala? Lola, gʉliitsa ʉnsɨkɨ ʉgwʉ ʉntegʉlanʼdala alahetsiwa pagati pa veene, apo pwʉ valɨdɨndaga ʉkʉlya. 16Nakʉli ʉmuunu ʉvɨ ihonela ɨkɨlaka ɨkɨpya mu nsabwa ʉndaala. Angave ivomba ɨlyo, ɨkɨlaka ɨkyo nakɨkahaave ʉkʉpapʉka pa nsabwa ʉndaala, ikange apakadwemwike pikwongelela ʉkʉdwemuka. 17Ikange, avaanu naviduudila ɨdivai ɨɨmya mu sipako isya ngwembe isilaala. Ɨngave viduudila, ɨdivai ɨjyo ɨɨmya jibatsʉla isipako isyo, pwʉ ɨdivai jiduudika, nasyene isipako sya ngwembe sinangɨka. Avaanu viduudila ɨdivai ɨɨmya mu sipako isipya. Apo, isipako isyo isipya nɨ divai ɨɨmya, syoni sitsiga vʉnonu!”#9:17 Mu kɨhwananitso ɨkɨ, ʉnsabwa ʉndaala ni sipako sya ngwembe isilaala tsʉ manyiiso evo inyiiho tsa katale. Isiinu isipya tsʉ manyiiso iimya tsa Yɨɨsʉ. Ɨngave avaanu vikonga imanyiiso indaala ni mya, viweesa ʉkʉnanga tsyoni.

ɄYɨɨsʉ ikʉmponia ʉnʼdala nʉ kʉntsʉʉsa ʉmmɨnza

(Maliko 5:21-43; Luuka 8:40-56)

18Lola, ʉYɨɨsʉ wʉ apitsiige itsova na vaanu avo, akiitsa ʉndongotsi mpamato, akasugama pavʉlongolo pa mwene, akambʉʉla akata, “Ʉmwalɨvango atʉlekile lɨlɨno lɨno. Napeene, ndidoova wiitse, ʉkamwabaase, pakʉta atsʉʉke, ave mwʉmi.” 19Pwʉ ʉYɨɨsʉ paninie na vakongi va mwene vakɨɨma, vakankonga ʉndongotsi ʉjwa. 20Lola, mu nsɨkɨ gʉʉgwa, ʉnʼdala ʉvɨ aale kwimali#9:20 Ʉnʼdala ʉvɨ aale kwimali natavʉlɨlwe ʉkwɨhanza mu kɨpʉga kya vaanu nakʉ kʉmwibata ʉmuunu ʉjyʉnge. Ʉnʼdala ʉjʉ aale va kʉgʉngʉla, manya aalamile ikange najyʉ muunu ʉvɨ aamwabaasaaga namwene aamwambʉhitsaaga ʉvʉlami. Lola Valawi 15:25-33. kʉ myaka kɨtsigo na gɨvɨlɨ (12), akiitsa kʉnsana kwa Yɨɨsʉ, akaabaasa ʉvʉsivilo wa nsabwa gwa mwene, 21manya aasaagaga mu numbula jya mwene ʉkʉta, “Ndɨngaabaase ndagʉve nsabwa gwa mwene, ndipona.” 22Lola, wʉ abaasiitse, baaho ʉYɨɨsʉ akagalamuka kʉnsana. Wʉ ambwene ʉnʼdala ʉjwa, akambʉʉla akata, “Mwalɨvango, wɨkangatse ɨnumbula! ɄNgʉlʉve akʉponiitse kʉ nzɨla jya lwɨdɨko lwako!” Baaho, ʉnʼdala ʉjwa akapona.

23ɄYɨɨsʉ wʉ asiike mu nyumba jya ndongotsi ʉjwa, akavavona avaanu vongosu valʉndamiine, valɨ pa kʉlɨla ɨkɨlɨlo. Avange vaatovaga isiwɨɨwɨ. 24ɄYɨɨsʉ akavavʉʉla akata, “Muhege apa! Ʉmwana ʉjʉ naswili, agoneelye itʉlʉ.” Avaanu avo vakatengʉla ʉkʉmmeka ʉYɨɨsʉ. 25Pwʉ akavahʉmya kʉnzi, akiingila kʉ kɨjumba kya kʉgati ʉkwʉ vaagoniitse ʉnsimba gwa mmɨnza ʉjwa, akamwibata ɨkɨvoko, pwʉ ʉmmɨnza ʉjwa akɨɨma. 26Ikulongwi itso tsikavaala mu kɨlʉnga kɨlya kyoni.

ɄYɨɨsʉ ikʉvaponia avabosu vavɨlɨ

27ɄYɨɨsʉ wʉ ahegile apo, avabosu vavɨlɨ vakankonga, vakooveela vakata, “Gwe Yɨɨsʉ, Mwana va nkʉlʉdeeva ʉDavʉdi,#9:27 Mwana va nkʉlʉdeeva ʉDavʉdi Lwale lwiho lwa Vayahudi ʉkʉmwɨlanga ndavʉle ʉmuunu ʉvɨ ahʉmile mu kɨkolo kya nkʉlʉdeeva ʉDavʉdi. Ikange vaalʉmanyile ʉkʉta ʉmwene vɨ Mesiya ʉviweesa ʉkʉponia isitamu sya veene. tudoova ʉtʉkolele ɨkɨsa!”#Zabuli 89:3-37; Yesaya 29:18-19; 35:5-6; Yelemiya 23:5-6; Ezekieli 34:23-24 28ɄYɨɨsʉ akiingila mu nyumba, avabosu avo naveene vakiingila ʉmwa. Pwʉ akavavʉʉtsa akata, “Ndeeti, mukwɨdɨka ʉkʉta ndiweesa ʉkʉvaponia?” Vakaanda vakata, “Eena, Ntwa! Tukwɨdɨka.” 29Pwʉ ʉYɨɨsʉ akavaabaasa amiiho ga veene, akavavʉʉla akata, “Ɨlɨ lɨvombeke kwanyie ʉkʉkongana nʉ lwɨdɨko lwinyo.” 30Ʉnsɨkɨ gʉʉgwa avabosu avo vakatengʉla ʉkʉlola. ɄYɨɨsʉ akavasimiilitsa kʉ maka akata, “Mwɨlekelwe ʉkʉmbʉʉla ʉmuunu ʉvaveetsaga ikulongwi itsi!” 31Paninie nɨɨlyo vakalʉta, vakapʉlɨsa ikulongwi tsa mwene mu kɨlʉnga kɨlya kyoni.

ɄYɨɨsʉ ikʉmponia ʉmuunu ʉvilemwa ʉkʉtsova

32Lola, avaanu valya wʉ vahegile apo, avaanu avange vakammɨlɨkɨla ʉYɨɨsʉ ʉmuunu ʉvɨ ibiitwe nɨ mepo ɨmbiivi. Ɨmepo ɨjyo jyampelye ʉmuunu ʉjwa ʉkʉlemwa ʉkʉtsova. 33ɄYɨɨsʉ akajɨswɨma ɨmepo ɨmbiivi ɨjyo. Wʉ jɨhʉmile, ʉmuunu ʉjwa akatengʉla ʉkʉtsova. Avaanu vongosu avaalepwo vakadega siitso, vakata, “Mu kɨlʉnga kyoni kya Isilahɨli natsigelili ʉkʉhʉmɨla nakɨgono kɨpamato itsilɨ ndiitsi!” 34Lɨno aVafalisayo vakɨtsosanza vakata, “Lola, iswɨma imepo imbiivi kʉ maka ga mbaha va mepo imbiivi!”

Avabeni vapitsiige navakwɨliili

35ɄYɨɨsʉ aatsʉngʉlaga mu vʉtsenge ʉvʉlɨ pongosu na mu matsumbe gooni. Ʉkwa alɨkwingila mu masinagogi ga veene, alɨkʉvamanyiisa avaanu, alɨkʉlʉmbɨlɨla ɨLivangɨli lya Lʉdeeva lwa Kʉkyanya, ikange alɨkʉvaponia avaanu isitamu syoni nʉ vʉdekedeke wa mihana gya veene. 36Wʉ alʉweene ʉlʉlʉndamano ʉlʉvaha lwa vaanu, akavakolela ɨkɨsa, ʉlwakʉva vaagatye, ikange vaale vatsila lʉtangɨlo ʉlʉveetsaga ndi ngʼolo itsivʉla nʼdɨɨmi. 37Pwʉ akavavʉʉla avakongi va mwene akata, “Isiinu mu kɨlɨmɨla simotiike, napeene avanya kʉbena vadebe. 38Pwʉ lɨno munʼdoove ʉmwenembene, ʉNtwa ʉNgʉlʉve, asuungʼe avaanu avange va kʉbena mu kɨlɨmɨla kya mwene.”

Jelenleg kiválasztva:

Mataayo 9: zga

Kiemelés

Megosztás

Másolás