Mataayo 11

ɄYohana ʉMwotsi ikʉvasuungʼa avakongi va mwene kwa Yɨɨsʉ

(Luuka 7:18-35)

1ɄYɨɨsʉ wʉ amalile ʉkʉvamanyiisa avakongi va mwene kɨtsigo na vavɨlɨ (12) ikulongwi itso, akahega palya. Akalʉta kʉ vʉtsenge ʉvʉlɨ pongosu wa kʉ Galilaya kulʉmbɨlɨla nʉ kʉvamanyiisa avaanu ɨlimenyu lya Ngʉlʉve.

2ɄYohana wʉ akʉngilwe mu kɨkʉngwa, alɨkʉpʉlɨka itsʉ ʉKɨlɨsiti aavombaga. Pwʉ akavasuungʼa avakongi va mwene kwa Yɨɨsʉ pakʉta vakambʉʉtse vate, 3“Ʉve nda veeve Kɨlɨsiti ʉvɨ avanyamalago vaatsovile ʉkʉta aliitsa evo tʉmpʉlɨkɨlage ʉjyʉnge?” 4Pwʉ ʉYɨɨsʉ akavaanda avakongi va Yohana valya akata, “Bɨhagi mukambʉʉle ʉYohana gooni ʉgwʉ mugaweene nʉ kʉpʉlɨka, 5manya avabosu vilola, avalema vigenda, avanya bʉʉba vivalatsiwa, avatsivatsi vipʉlɨka, avaswe vitsʉʉka. Ikange, avagatsu vilʉmbɨlɨlwa ɨLivangɨli.#11:5 Imbombo itsʉ ʉYɨɨsʉ itsova mu lʉkɨndɨ ʉlʉ, tsʉ tsyatsovilwe nʉ nyamalago ʉYesaya ʉkʉta alavomba ʉKɨlɨsiti (Mesiya), alaava ikwitsa (Yesaya 26:19; 29:18-19; 35:5-6; 61:1). 6Inʼgatalʉsu ʉmuunu ʉvaveetsaga ʉvɨ nikɨpɨnza nʉʉne!”

7Avakongi va Yohana wʉ vahegile apo, ʉYɨɨsʉ akatengʉla ʉkʉkɨvʉʉla ɨkɨpʉga kya vaanu ikulongwi tsa Yohana ʉMwotsi akata, “Ʉpwʉ mukalʉtiige kʉ lʉkɨnga, mukahʉʉvɨliige ʉkʉtsikʉmbona ʉmuunu ʉvɨ alɨ ndeeti? Mukahʉʉvɨliige ʉkʉmbona ʉmuunu ʉvɨ avyʉta ligʉgʉ ɨlyʉ lidepanika wʉ lipuulwa nɨ mepo? Baako, 8lɨno mukalʉtiige kwilola ʉmuunu ʉvɨ alɨ ndeeti? Ʉmuunu ʉvɨ aswalile ɨmisabwa gya lʉtogo? Baako, avaanu aviswala ɨmisabwa gya lʉtogo vitaama mu nyumba itsa kɨkʉlʉdeeva. 9Lɨno, pwʉ mukalʉtiige kwilola ʉmuunu ʉvɨ alɨ ndeeti? Mukahʉʉvɨliige ʉkʉmbona ʉnyamalago? Mukagolwise! Ndikʉvavʉʉla ʉkʉta ʉYohana nanyamalago vʉvʉle, apeene ʉjwa vɨ mbaha ʉkʉlʉtɨɨlɨla pa nyamalago. 10Ʉjwa vɨ mwene ʉvɨ ʉVʉvɨge ʉVʉvalatse waavɨgilwe ndee ʉkʉkongana nʉ mwene, ‘Lola, ndikʉnsuungʼa ʉmbombi vango alongole paave, ʉjwa vɨ mwene inotsaaga ɨnzɨla jyave.’#Malaki 3:1 11Tsa jɨlweli ndikʉvavʉʉla ʉkʉta, kʉ vaanu vooni, navoniiki ʉvaveetsaga ʉvɨ ʉmwene imbaha ʉkʉlʉtɨɨlɨla kwa Yohana ʉMwotsi. Napeene, ʉmuunu ʉvibedwa mu Lʉdeeva lwa Kʉkyanya, vɨ mbaha ʉkʉlʉtɨɨlɨla kwa Yohana. 12Ʉkʉhʉma pa nsɨkɨ ʉgwʉ ʉYohana ʉMwotsi aalʉmbɨlɨlaga, ʉkʉsika ɨleelo, ʉLʉdeeva lwa Kʉkyanya luvoneka kʉ maka. Naveene avanya maka, vigela ʉkʉlʉkava kʉ maka. 13Indagɨlo tsa Moose na vanyamalago vooni vaatsovile amalago ʉkʉsika pa nsɨkɨ ʉgwʉ ʉYohana aavoniike. 14Lɨno mungave munogwa ʉkwɨdɨka amamenyu ga veene, pwʉ ndikʉvavʉʉla ʉkʉta ʉYohana vɨ vɨ Eliya#11:14 Eliya Ʉvʉganulu wa litaawa ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉlya ʉvɨ aatsowaagwa ʉkʉta aliitsa. 15Ʉvɨ ipʉlɨka, vɨ apʉlɨkage.

16“Lɨno, ndɨvahwananie nɨ kɨki avaanu va kɨvʉmbʉkʉ ɨkɨ? Vahwaniine na vaana ʉwʉ vikina pa kɨvanza, pwʉ vikʉvavʉʉla avajyavo viita, 17‘Lola, twavatovye isiwɨɨwɨ sya lʉhekelo, namwaneme! Twavɨmbye ʉlwɨmbo lwa lʉsʉsʉvalo, pange mulɨle!’ 18Vʉvʉle vʉle wʉ mulɨwo najyʉnyie! ɄYohana ʉMwotsi ʉpwʉ iitsile, naalitsage pange kʉnywa,#11:18 Naalitsage pange kʉnywa Ʉkʉtsova ewo kwʉ kʉta ʉYohana naalitsage ɨkyakʉlya ɨkyʉ avaanu vooni vaalitsaga isigono syoni. Ʉmwene ʉnsɨkɨ mwongosu ɨɨdɨndaga ʉkʉlya. Alɨkʉvomba ewo ndʉwʉ avanyamalago avange ava katale vaavombaga kʉ nongwa jya mbombo jya Ngʉlʉve. mukata, ‘Alɨ nɨ mepo ɨmbiivi.’ 19Napeene, ʉne, ndɨ Mwana va Muunu nditsile, ndiilya nʉ kʉnywa ndʉwʉ vivomba avange, mwita, ‘Lola! Ʉjʉ nya mwojo ikange nʼgaatsi! Ikange immanyaani va vasangʉtsi va songo na vatulanongwa!’ Ʉweene ʉvʉmanyi vuvoneka mu mbombo tsa mwene.”

Ʉvʉtsenge ʉwaamʼbeelile ʉYɨɨsʉ

(Luuka 10:13-15)

20Pwʉ ʉYɨɨsʉ akatengʉla ʉkʉvʉtanila ʉvʉtsenge ʉmwʉ aavombile isidego syongosu ʉlwakʉva avaanu va vʉtsenge ʉwa navaalaate imbiivi tsa veene akata, 21“Muswe vʉvʉle ʉnyie nyɨ vaanu va vʉtsenge wa Kolazini, nʉʉnyie nyɨ va vʉtsenge wa Betisaida ʉlwakʉva isidego isyʉ ndɨvombile kwanyie, syale sive sivombiike mu vʉtsenge wa kʉ Tilo nʉ wa kʉ Sidoni, avaanu va mu vʉtsenge ʉwa vaale viweesa ʉkʉpela imbiivi. Vaale viweesa ʉkʉvonia ʉkʉpela imbiivi tsa veene kʉ nzɨla jya kʉswala amagunila nʉ kwɨbaka ɨlyela.#11:21 Kolazini na Betisaida waale vʉtsenge wa Vayahudi. Avaanu va vʉtsenge ʉvʉ vʉvɨlɨ vɨɨvonaga ʉkʉta vavalatse ʉkʉlʉtɨɨlɨla avaanu va vʉtsenge ʉvʉnge ndʉ wa Tilo nʉ wa Sidoni. Vɨɨvonaga ewo pakʉva aveene vaale Vayahudi, ikange vaahalilwe nʉ Ngʉlʉve vave vaanu va mwene. 22Lɨno, ndikʉvavʉʉla ʉkʉta pa kɨgono kya vʉhɨgi, ʉvʉpala waanyie vʉlaava vʉvaha, ʉkʉlʉtɨɨlɨla kʉ vʉpala wa vaanu va kʉ Tilo na va kʉ Sidoni. 23Najyʉnyie nyɨ vaanu va mu Kapelenaumu, mukɨvona ʉkʉta mulasika kʉkyanya kwa Ngʉlʉve? Baako, najɨlaave ewo! ɄNgʉlʉve alaviisa ʉkʉsika kʉ vʉswe, manya isidego isikavombilwe kwanyie syale sive syavombilwe na mu vʉtsenge wa Sodoma, pwʉ ʉvʉtsenge ʉwa waale wiiva pwʉvʉle ʉkʉsika ɨleelo. 24Lɨno ndikʉvavʉʉla ʉkʉta pa kɨgono kya vʉhɨgi, ʉvʉpala waanyie vʉlaava vʉvaha, ʉkʉlʉtɨɨlɨla kʉ vʉpala wa vaanu va kʉ Sodoma.”

Kwa Yɨɨsʉ kwʉlʉle ʉlʉgatalʉko

(Luuka 10:21-22)

25Mu nsɨkɨ ʉgwa ʉYɨɨsʉ akatsova akata, “Gwe Daada, ʉve veeve Ntwa va kʉkyanya na paasi, ndikʉkʉsaana. Ndikʉkʉsaana ʉlwakʉva amamenyu aga ʉvasihile avaanu avanya lʉhala na vamanyi, apeene ʉvavoniitse avaanu ʉwʉ vikɨjisa nda vaana avadebe. 26Ʉgolwise Daada, itso tsivye ndʉwʉ ʉnogilwe.

27“ɄDaada vango amye syoni. Kange nakʉli ʉvɨ ammanyile ʉMwana, apeene jyʉ Daada mwene. Ikange, nakʉli ʉvɨ ammanyile ʉDaada, apeene jyʉ Mwana, nʉ muunu ʉvaveetsaga ʉvɨ ʉMwana inogwa ʉkʉmbonia.

28“Mwitsage kwane ʉnyie nyɨ vooni nyɨ mugatatsiwa ikange mwɨtwɨkile ɨmitsigo ɨmitsito, ʉne jʉndikʉvapa ʉlʉgatalʉko. 29Mwɨdɨke ʉkʉlongotsiwa nʉʉne#11:29 Mwɨdɨke ʉkʉlongotsiwa nʉʉne kwʉ kʉta ʉkʉmwɨdɨka ʉYɨɨsʉ nʉ kʉnkonga. ndɨ senga ɨjɨvegye ɨlijoki.#11:29 Ɨlijoki kyʉ kɨbɨkɨ ɨkɨtsito ɨkɨgolwike. Ɨkɨbɨkɨ ɨkyo avaanu viswalɨtsa mu singo tsa senga wʉ tsilɨma evo wʉ tsikwega ɨmitsigo. Kʉ Vayahudi, ʉkʉtsikonga indagɨlo tsa Ngʉlʉve kwahwaniine nʉ kʉvegala ɨlijoki lya ndagɨlo (Mbombo tsa Vapositili 15:10; Vagalatiya 5:1). Kange mumanyilage kwane, manya ʉne ndɨlɨ nʼdeke ikange ndɨlɨ nya lwɨjiso. Ɨlyo jʉlikʉvapelela muve nʉ lʉgatalʉko lwa jɨlweli mu numbula tsiinyo, 30manya ɨlijoki lyango lyebeepe#11:30 Ɨlijoki lyango lyebeepe ɄYɨɨsʉ apa ikʉtʉmanyiisa ʉkʉta tʉmmʉʉvɨlage ʉmwene mwene ʉlwakʉva ikʉtʉlongotsa, ikʉtʉsaja, ikʉtʉloleela nʉ kʉtʉpa amaka ga kʉvomba ʉvʉnogwe wa Ngʉlʉve. ʉkʉgega, ikange ʉntsigo gwango nagwene mwebeepe.”

Jelenleg kiválasztva:

Mataayo 11: zga

Kiemelés

Megosztás

Másolás