Mataayo 10

ɄYɨɨsʉ ikʉvasuungʼa avapositili va mwene kɨtsigo na vavɨlɨ

(Maliko 3:13-19; 6:7-13; Luuka 6:12-16; 9:1-6)

1ɄYɨɨsʉ akavɨɨlanga avapositili va mwene kɨtsigo na vavɨlɨ (12), akavapa amaka ga kʉswɨma imepo imbiivi nʉ kʉponia isitamu syoni nʉ vʉdekedeke wa mihana. 2Amataawa ga vapositili#10:2 Vapositili Ɨlɨ litaawa lya Kɨyunaani. Ʉvʉganulu wa lyene kwʉ kʉta avaanu ʉwʉ vasuungʼilwe. avo kɨtsigo na vavɨlɨ gwʉ aga: ʉntatsi vɨ Simoni (ʉvɨ ʉYɨɨsʉ aampye ɨlitaawa ɨlɨ Petulo), ʉAndeleya ʉlʉkololwe va Simoni, ʉYakobo nʉ nnunaave ʉYohana, avaale vaana va Zebedayo, 3ʉFilipo, ʉBatulumayo, ʉTomasi, ʉMataayo ʉnsangʉtsi va songo, ʉYakobo ʉmwana va Alufayo, ʉTadeo, 4ʉSimoni ʉNkanaani#10:4 ɄSimoni ʉNkanaani ɄSimoni ʉjʉ aale na mataawa gavɨlɨ, lipamato vɨ Simoni Nkanaani, ɨlɨnge vɨ Simoni Nʼzelote (Mataayo 10:4; Luuka 6:15). Amataawa aga gavɨlɨ Nkanaani na Nʼzelote kwʉ kʉta ʉmuunu ʉnya vʉsʉʉkwa wa kʉva nʉ vʉvopolwa mu kɨlʉnga kya mwene ʉkʉhʉma kʉ Valooma. nʉ Yuuda Isikalioti,#10:4 Isikalioti Ʉvʉganulu wa litaawa ɨlɨ ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉvɨ kʉmbele iitsile akammendama ʉYɨɨsʉ.

5ɄYɨɨsʉ akavasuungʼa avo kɨtsigo na vavɨlɨ, akavalagɨla akata, “Mulekage ʉkʉlʉta kʉ vaanu avatava Vaisilahɨli, ikange mulekage ʉkwingila mu vʉtsenge ʉvʉveetsaga wa Vasamaliya. 6Apeene mulʉtage kʉ Vaisilahɨli, ʉwʉ vajagile ʉta ngʼolo. 7Wʉ mwilʉta ʉkwa, mulʉmbɨlɨlage ʉkʉta, ‘ɄLʉdeeva lwa Kʉkyanya lʉhegelye.’ 8Muvaponiage avatamu, muvatsʉʉsaage avaswe, muvavalatsaage avanya bʉʉba nʉ kʉswɨma imepo imbiivi. ɄNgʉlʉve avapye vʉvʉle amaka ago, pwʉ najyʉnyie muvatangage avaanu vʉvʉle, kɨtsila lʉhombo. 9Mwɨlekelwe ʉkʉgega ɨmbopo ɨjɨveetsaga, indalama, 10ɨmisuku, ɨmisabwa gya kwandʉlania, isilaatu sya kwandʉlania, pange misaga, manya ʉmbombi anogye ʉkʉtangɨlwa isiinu isyʉ ilonda ave nasyo ʉkʉhʉma kʉ vaanu ʉwʉ ikʉvavombela. 11Mu vʉtsenge ʉvʉveetsaga evo mu litsumbe ɨlɨveetsaga ɨlyʉ jʉmukwingila, jʉmulondage ʉmuunu ʉvɨ anogye ʉkʉvʉʉpɨlɨla ʉnyie. Pwʉ mutaamage kʉ mwene ʉkʉsika ʉpwʉ mwihega ʉkwa. 12Wʉ mukwingila mu nyumba musaamusaage muteetsage, ‘ɄNgʉlʉve avape ʉlʉnotsehetso mu nyumba ʉmʉ.’ 13Pwʉ ɨngave avenenyumba avo jʉvikʉvʉʉpɨlɨla ʉnyie, ʉNgʉlʉve jiikʉvapa ʉlʉnotsehetso. Lɨno ɨngave navakavʉʉpɨlɨle ʉnyie, apo ʉlʉnotsehetso lusigala nʉʉnyie. 14Ɨngave ʉmuunu ibeela ʉkʉvʉʉpɨlɨla evo ʉkʉpʉlɨhɨtsa ɨkulongwi ɨjyʉ mwitsova, pwʉ mukungʼuunage ʉlʉsumbe ʉlʉlɨ mu silʉnde siinyo wʉ mwihʉma mu nyumba ɨjyo evo mu vʉtsenge ʉwa.#10:14 Mukungʼuunage ʉlʉsumbe Ʉvʉganulu wa mamenyu ʉkʉkungʼuuna ʉlʉsumbe lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. 15Tsa jɨlweli ndikʉvavʉʉla ʉkʉta, ɨkɨgono kya vʉhɨgi avaanu va vʉtsenge ʉwa valaava nʉ vʉkʉvɨlwa ʉvʉvaha, ʉkʉlʉtɨɨlɨla ʉvʉkʉvɨlwa wa vaanu va kʉ Sodoma na kʉ Gomola!#10:15 Sodoma na kʉ Gomola ɄNgʉlʉve aakobwise nʉ mwoto avaanu va vʉtsenge ʉwa wʉ vʉvɨlɨ kʉ nongwa jya mbiivi tsa veene (Vʉtengʉlɨlo 19:24-29).

Ʉvʉkʉvɨlwa ʉvukwitsa

(Maliko 13:9-13; Luuka 21:12-17)

16“Lola, ndikʉvasuungʼa ndi ngʼolo itsigenda pagatinagati pa ngʼekeeva. Pwʉ muveetsage vanya lʉhala ʉngata nzoka ikange muveetsage vadeke ʉngata ngʉndya.#10:16 AVayahudi vaavonaga ingʼolo sidɨɨmo isilonda sive nʉ vʉloleeli wa vaanu. Ingʼekeeva sikanu isikali ikange sibudi. Inzoka tsilɨ nɨ sumu, tsilɨ nʉ lʉhala ikange nzonga. Ingʉndya vaavonaga ʉkʉta syʉ sidege isyeleele. 17Mwɨlolelage, avaanu valavahɨlɨkaga pa vʉhɨgi nʉ kʉvatova mu masinagogi ga veene. 18Ikange valavahɨlɨkaga ʉnyie pavʉlongolo pa vatwa na pa vakʉlʉdeeva mukahɨgwagwe pakʉva mukʉngʼonga ʉne. Pa nsɨkɨ ʉgwa mulaveetsaga vaanu va kʉhʉmya ʉwooleletsi wa kulongwi tsyango pavʉlongolo pa veene na pa vaanu avatava Vayahudi. 19Apo ʉpwʉ valaava vikʉvahɨlɨka pa vʉhɨgi, mwitse mulekage ʉkʉdwada ʉkʉta jʉmwitsova kɨki, evo jʉmukwanda kɨki. Lola, mulapeewaagwa itsa kʉtsova pa nsɨkɨ gʉʉgwa, 20manya namulaave nyienyie nyɨ mulatsovaga, apeene alaava vɨ Mepo va Dadajiinyo ʉvɨ alatsovaga mu nʼgati mwanyie. 21Kʉ nsɨkɨ ʉgwa, avanamuunu valahendamanaga ʉkʉta ʉjyʉnge abudwagwe. Ʉdadaaje alammendamaga ʉmwana va mwene, naveene avaana valavasambʉkɨlaga avahotsi nʉ kʉvapelela vabudwagwe. 22Avaanu vooni valavasʉʉla ʉnyie kʉ nongwa jyane. Ʉmwene ʉvɨ ikɨjʉmɨɨlɨtsa ʉkʉsika kʉ vʉmalɨlo vɨ mwene alapokwa. 23Ɨngave wʉ mulʉmbɨlɨla, avaanu va vʉtsenge vʉninie vikʉvapelela ʉvʉkʉvɨlwa, pwʉ mwitse munyililage kʉ vʉtsenge ʉvʉnge. Jɨlweli ndikʉvavʉʉla ʉkʉta namulamale ʉkʉgenda mu vʉtsenge wooni wa Vaisilahɨli wʉ ʉMwana va Muunu nakiliwiiki mu kɨlʉnga nʉ vʉtwa wa mwene. 24Ʉvimanyila, nakaweese ʉkʉva nʉ vʉmanyi ʉkʉlʉtɨɨlɨla ʉmmanyisi va mwene. Ʉmbanda namwene nakaweese ʉkʉva nʉ wɨɨmɨkiwa ʉkʉlʉtɨɨlɨla ʉntwa va mwene. 25Ʉvimanyila pannogye ahekelage wʉ ivona alɨ ndʉ mmanyisi va mwene, najyʉ mbanda namwene ahekelage wʉ ivona alɨ ndʉ ntwa va mwene. Ɨngave vikʉmwɨlanga ʉmwenenyumba ʉkʉta vɨ Belizebuli,#10:25 Belizebuli Ɨlɨ litaawa lya Setano, ʉmbaha va mepo imbiivi tsyoni. ndeeti, navakavɨɨlangage amataawa amaviivi siitso avaanu avalɨ mu nyumba jya mwene?

Ʉvakʉnʼdwada vɨ Ngʉlʉve mwene

(Luuka 12:2-9)

26“Pwʉ lɨno mulekage ʉkʉvadwada avaanu avo, manya ɨkɨɨnu ɨkɨveetsaga ɨkyʉ kɨgubikiilwe, kɨlagubukulwa, ikange ɨkɨveetsaga ɨkyʉ kɨsihamiike, kɨlaava pavʉvalasu. 27Tsyoni itsʉ ndikʉvavʉʉla kʉvʉtiitu, mutsitsovage pavʉvalasu. Ikange, gooni ʉgwʉ mupʉlɨka kʉvʉtiitu pa kulongwi tsa Lʉdeeva lwa Kʉkyanya, mugalʉmbɨlɨlage pavʉvalasu. 28Mulekage ʉkʉvadwada avibuda ʉmmana gwene, wʉ aveene naviweesa ʉkʉbuda ɨnumbula. Munʼdwadage ʉNgʉlʉve mwene ʉvɨ iweesa ʉkwongometsa ʉmmana paninie nɨ numbula mu mwoto gwa sikutsooni. 29Ndeeti, isidege sivɨlɨ nasigʉtsiwa kʉ ndalama ndebe vʉvʉle? Paninie nɨɨlyo nakɨkʉli ɨkɨdege mwisyo ɨkyʉ kiigwa paasi kɨtsila vʉnogwe wa Dadajiinyo. 30Lɨno kʉ lʉvasu lwanyie, ʉNgʉlʉve avalile natsi nzwɨlɨ tsa mitwe giinyo. 31Pwʉ lɨno mulekage ʉkʉdwada ʉlwakʉva ʉnyie mulɨ nawo ʉwɨɨmɨkiwa ʉkʉlʉtɨɨlɨla isidege.

32“Ʉmuunu ʉvaveetsaga ʉvɨ ikɨpaala kʉ vaanu ʉkʉta ikʉngʼonga ʉne, najyʉne ndɨlantsova ʉjwa ʉkʉta inkongi vango pavʉlongolo pa Daada ʉvɨ alɨ kʉkyanya. 33Lɨno, ʉvaveetsaga ʉvɨ ikʉmbeela pavʉlongolo pa vaanu, najyʉne ndɨlamʼbeela pavʉlongolo pa Daada ʉvɨ alɨ kʉkyanya.

Ʉmwʉ kʉveelye kʉtalamu ʉkʉnkonga ʉYɨɨsʉ

(Luuka 12:51-53; 14:26-27)

34“Mulekage ʉkʉsaaga ʉkʉta nditsile mu kɨlʉnga ɨkɨ pa vʉsumbe wa kʉvɨɨka ʉlʉnotsehetso. Baako! Nawʉ jɨlɨwo. Apeene, nditsile pa vʉsumbe wa kʉleeta ʉlʉsʉʉtɨngʼano, 35manya nditsile pakʉta ʉdadaaje nʉ nswambe vasʉʉtɨngʼanage, ʉvanyina nʉ mwalɨve vasʉʉtɨngʼanage, vʉvʉle vʉle ʉkɨjyʉva nʉ nkamwanave vasʉʉtɨngʼanage. 36Ikange, avalʉgʉ va muunu jʉviiva wʉ valya avaanu va mu nʼgati mu nyumba jya mwene.#Mika 7:6 37Ʉmuunu ʉvaveetsaga ʉvɨ anʼganile ʉdadaaje evo ʉvanyina ʉkʉlʉtɨɨlɨla pa kʉngana ʉne, ʉjwa nanogelaniili kwane. Ikange, ʉvaveetsaga ʉvɨ anʼganile ʉnswambe evo ʉmwalɨve, ʉkʉlʉtɨɨlɨla pa kʉngana ʉne, ʉjwa namwene nanogelaniili kwane. 38Ʉmuunu ʉvɨ nikɨtwɨka ɨkɨdamingʼanie kya mwene nʉ kʉngʼonga, nanogelaniili kwane.#10:38 Nikɨtwɨka ɨkɨdamingʼanie kya mwene kwʉ kʉta nikwɨdɨka ʉkʉkʉvɨlwa nʉ kʉswa pa kulongwi jya Yɨɨsʉ Kɨlɨsiti. 39Ʉmuunu ʉvaveetsaga ʉvɨ inogwa ʉkʉponia ʉwʉʉmi wa mwene, vɨ alawaambʉtsa. Ikange ʉmuunu ʉvaveetsaga ʉvɨ ikʉwaambʉtsa ʉwʉʉmi wa mwene pa kulongwi jyango, alavʉponia.

Avaanu avalʉʉpɨlɨla ʉlʉhombo

(Maliko 9:41)

40“Ʉmuunu ʉvaveetsaga ʉvɨ ikʉvʉʉpɨlɨla ʉnyie, pwʉ iiva ikʉnnyʉpɨlɨla ʉne. Ikange, ʉvaveetsaga ʉvɨ ikʉnnyʉpɨlɨla ʉne, iiva ikʉmwʉpɨlɨla ʉDaada ʉvɨ ansuungʼile ʉne. 41Ʉvaveetsaga ʉvɨ ikʉmwʉpɨlɨla ʉnyamalago pa kulongwi jya kʉta nyamalago, ʉNgʉlʉve alammomba ʉlʉhombo ndʉ lwa nyamalago. Ikange, ʉvaveetsaga ʉvɨ ikʉmwʉpɨlɨla ʉmuunu ʉnʼgolosu pamiiho ga Ngʉlʉve ʉlwakʉva inʼgolosu, ʉNgʉlʉve alammomba namwene ʉjwa ʉlʉhombo ndʉ lwa muunu ʉnʼgolosu. 42Tsa jɨlweli ndikʉvavʉʉla ʉkʉta, ʉvaveetsaga ʉvɨ ikʉmpa, ndakɨve kɨkombe kya magasi amatsitsimu, mpamato mu vaanu ava avibedwa, pakʉva nkongi vango, ʉNgʉlʉve alammomba ʉlʉhombo lwa mwene.”

Jelenleg kiválasztva:

Mataayo 10: zga

Kiemelés

Megosztás

Másolás