Хьунухь 1
1
Эвел дуьньядин ва инсаниятдин тарих
(1–11 кьилер)
Дуьнья халкь авун
1Сифтени-сифте Аллагьди цаварни чил халкь авуна.
2Чил акунар авачиз ва ичӀи тир, цин деринрин винел мичӀивал алай, ва Аллагьдин руьгь ятарин винелай элкъвезвай.
3Аллагьди лагьана: «Экв хьурай». Экв пайда хьана. 4Аллагьдиз экв хъсан яз акуна ва ам мичӀивиликай чара авуна, 5экуьниз – «югъ», мичӀивилизни «йиф» лагьана тӀварар гана.
Няни хьана, пакама алукьна – сад лагьай югъ.
6Аллагьди лагьана: «Цин юкьва вичи яд кьве чкадал пай ийидай тагъ хьурай». 7Гьа икӀ хьунни авуна. Аллагьди тагъ халкь авуна, ва тагъдин кӀаник квай ятар тагъдин винел алай ятарикай чара авуна, 8ва тагъдиз «цав» лагьана тӀвар гана.
Няни хьана, пакама алукьна – кьвед лагьай югъ.
9Аллагьди лагьана: «Цавун кӀаник квай яд са чкадал кӀватӀ хьурай – къурамат пайда хьана». Гьа икӀ хьунни авуна. 10Аллагьди къураматдиз «чил» лагьана тӀвар гана, кӀватӀ хьайи ятариз – «гьуьл». Аллагьдиз ибур хъсан яз жагъана.
11Аллагьди лагьана: «Чиляй набататар экъечӀрай: тум гъидай векьер ва цил авай майва гъидай гьар жуьредин тарар». Гьа икӀ хьунни авуна. 12Чили набататар гана: тум гудай гьар жуьредин векьер ва цил авай майваяр гъидай гьар жуьредин тарар. Аллагьдиз ибур хъсан яз акуна.
13Няни хьана, пакама алукьна – пуд лагьай югъ.
14Аллагьди лагьана: «Цавун тагъда югъ йифекай чара авун патал, вахтар къалуриз йикъар ва йисар алцумун патал чӀехи чирагъар хьурай. 15Абуру цавун тагъдай нур гуз чил ишигълаван авурай». ГьакӀ хьунни авуна. 16Аллагьди зурба кьве чирагъ туькӀуьрна: екеди – югъ идара авун патал, гъвечӀиди – йиф идара авун патал ва гьакӀни гъетер. 17-18Аллагьди абур чилиз экв гун, йикъарни йифер идара авун, экв мичӀекай чара авун патал цавун тагъда экӀяна. Аллагьдиз им гьикьван хъсан ятӀа акуна.
19Няни хьана, пакама алукьна – кьуд лагьай югъ.
20Аллагьди лагьана: «Це алахьна физ чан алай затӀар хьурай. Чилин винелай, цавун тагъда къушари лув гурай». 21Аллагьди гьуьлуьн чӀехи чурчулар ва це гьар патахъди алахьна физвай чан алай затӀарин гьар жуьредин жинсер ва лув гудай гьар жуьредин къушар халкьна.
Аллагьдиз ибур гьикьван хъсан ятӀа акуна 22ва абуруз хийир-дуьа авуна: «Куьне куь тум-кьадар артух ая. Гьуьлуьн ятар квелди ацӀура. Чилелни гзаф кьадар къушар хьурай».
23Няни хьана, пакама алукьна – вад лагьай югъ.
24Аллагьди лагьана: «Чили чан алай затӀарин гьар жуьредин жинсер арадал гъурай: малар, куьлуь-шуьлуьяр ва вагьшияр». ГьакӀ хьунни авуна. 25Аллагьди гьар жуьредин вагьшияр, ва чеб чилин винел виринра дуьшуьш жезвай гзаф кьадар чан алай затӀар халкьна. Аллагьдиз им гьикьван хъсан ятӀа акуна.
26Аллагьди лагьана: «Инсан – Чи къамат ва Чи тегьер – халкь ийин. Ада гьуьлера авай гъетерал, цавара авай къушарал, маларал, вири вагьшийрал ва чилел алай кьван чан алай вири куьлуь-шуьлуьйрал агъавал авун патал». 27Аллагьди Вичин къамат тир инсан халкь авуна, Аллагьдин къамат Ада халкь авуна, Эркекни дишиди халкь авуна.
28Аллагьди абуруз ихьтин гафаралди хийир-дуьа авуна: «Куьне куь тум-кьадар артух ая, чилер тирвал бине кутур ва абуруз иесивал ая. Гьуьлера авай гъетерални цавара авай ничхиррал ва чилел алай вири гьайванрал агъавал ая».
29Аллагьди лагьана: «Ингье, за квез суьрсет яз чилел алай кьван тум гъидай вири векьер-кьалар, гьар садахъ вичин майва авай ва майвадани цилер авай вири тарар гузва. 30Гьайванриз ва ничхирриз, чилел алай чан квай вири куьлуь-шуьлуьйриз – чпин беденда уьмуьрдин нефес авай вирибуруз – За тӀуьн яз къацу набататар гузва».
ГьакӀ хьунни авуна. 31Аллагь вичи халкь авурбуруз килигна – абур гзаф хъсан тир.
Няни хьана, пакама алукьна – ругуд лагьай югъ.
Jelenleg kiválasztva:
Хьунухь 1: ЛезПК
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2010-2024
