Matìyò 9

Yesò chʉʼ wù kənkwaʼkə kə

(Mak 2.1-12; Luk 5.17-26)

1Yesò kwen a nkanuʼ bwènə̀ dyàŋ dyʉ̀ a ntə̀ʼ yi a ghə̀ ntsi tsu. 2Viʼi vətsen və lyɨ̀ wìʼ vì nə̀ wen mu ghə̀ kwaʼkə li, a Yesò, ghə̀ nyoŋ a ghàm. Yesò nè yen byɨmə yì a vəwenə nkiʼi ə gàʼ à wù kənkwaʼkə yì la, “Kə a fwaynə a wàyn ghom. Ma lyesə li nku mbyɨ shəsə.”

3Ndìʼsə̀sə təsoʼ sə tsensə zhʉ alì mù sə gàʼà tò a vəwenə a tətyɨm la, “Wìʼ ghèn telə̀ Nyìngòŋ.”

4No zhʉ̀ kò, Yesò kɨ təkwòʼtə̀ tə vəwenə mù bèm à vəwenə la, “Ghə̀ŋ kwòʼtə nyʉ̀ byɨvə alə̀ byìʼì gho? 5A bwaʼmə kəkò, əgàʼ la, ‘Və lyesəli nku mbyɨ shəsə’ mu, əgàʼ la, ‘Lu jeʼ a?’ 6Ma diʼi à ghə̀ŋ luwen la Wàyn Wìʼ kiʼi adyòʼ a kwi nse ə lyesə ku mbyɨsə viʼi.” Ghə̀ gàʼ alì mù gàʼ à wù kənkwaʼkə yì la, “lu lyɨ ghàm ə wu mpfwo.”

7Wìʼ ayì lu sə jèʼè pfwo. 8Viʼi nè yen alì sə fàyn no ŋàŋ, bè mù sə̀ kuʼsə Nyìngòŋ ando ghə̀ ku nki àdyoʼ a ghèn à viʼi.

Yesò tsuʼ Matìyò a nə̀ ndzɨ̀mtə̀ bàm wen

(Mak 2.13-17; Luk 5.27-32)

9Yesò lù fa tsu sə dyʉ̀ yen wìʼ, a zhiʼi wen ndìʼ Matìyò, ghə̀ ŋwʉʼ atò yì a və tinə kənsè tsu Yesò gàʼ à wen la, “Dzɨ̀mtə̀ mo.”

No a zhʉ kò, ghə̀ lù sə dzɨ̀mtə̀ dyʉ̀ fa wen a bàm.

10Yesò nə̀ dyʉ̀ ŋwʉʼ a kəshi kə kəzhɨ a ngə̀ŋ Matìyò, viʼi a və tinə kənsè bènə̀ viʼi və byɨvə vətsenəvə, no vəghoʼo bè ŋwʉʼ wenə ndzɨ̀mtə̀sə bàm ə wen. 11Və Falàsi vətsenəvə yen ali mù bèm a ndzɨ̀mtə̀sə bàm Yesò la, “Byìʼì ghò a ndìʼsə̀ ghə̀ŋ zhɨ wenə viʼi tinə kənsè bènə̀ viʼi və byɨvə vətsenəvə a?”

12Yesò zhʉ kənyʉ̀ a vəwenə gàʼà bwensə̀ bèm à vəwenə la, “Wìʼ a ghə̀ diʼi to kò kəŋ wù kəfʉ. A nə̀ kəŋə tò viʼi vyì a və kwaʼkə. 13Ghə̀ŋ dyʉ̀ kəŋ kɨ̀ kənyʉ̀ kənkə a Nyìngòŋ gàʼ à wenə ŋwàʼlə̀ la, ‘Mà kusə shɨnsə a viʼi, kə ghə̀ŋ nə̀ shə̀ tò nyamsə a mo.’ Ma ko tə vi ə tisə viʼi vyì a və sə ti akayn, mà tə vi ə tisə viʼi və byɨvə.”

Və bèm kənyʉ̀ a Yesò byìʼì bamə ə chʉ̀

(Mak 2.18-22; Luk 5.33-39)

14Ndzɨ̀mtə̀sə bàm ə Joyn Ku amù sə tsensə nvi li ə bèm a Yesò la, “Byìʼì gho a yès viʼi Falàsi ə bamə əchʉ̀, ndzɨ̀mtə̀sə bàm ə wù sə ko bamə a?”

15Yesò ə bèm a vəwenə la, lɨm wùwì lə laʼa viʼi akəshi kə lam, və vi, və a ndì dì ghə̀ bu dìʼ to tsu lo? Kətsi kə lə vi, ə və lyɨ lù nə̀ lɨm wùwì fa vəwenə a ntìntìn, ə vəwenə mu ə bamə chʉ̀.

16“Wìʼ zì kò ghə̀ lə̀ lyɨ̀ kəbàs kə ndisə kə fikə ə bàʼsə ndisə musə tsu. Ghə̀ ne ali, kə basə kə ndisə a kì a bwənsə ə tsuʼmə, ə sə ə tsuʼmə a zhʉ a yì, bè tuʼtə ghoʼsə kəbʉʼ a kì a və yi bàʼsə. 17Kə lə diʼ to ndə̀ŋndəŋ ando viʼi ko tɨmə ə wye məlyʉ̀ʼ kenla mə to li a vəsaʼ və gwʉ̀ nyamsə musə. Və ne ali, ə vəsaʼ a vyi sə baykə, və a gho məlyʉ̀ʼ ə gho vəsaʼ. Və lèmə̀ bòŋsə wye tò məlyʉ̀ʼ kenla mə to li a vəsaʼ və fivə. Və ne alì, ko kəfo kə a lè.”

Yesò ə lusə wàyn wùwì fa ə pfʉ ə be chʉʼʉ wùwì ə tsen

(Mak 5.21-43; Luk 8.40-56)

18Yesò ə bu gàʼa tò gàʼa, wù ə kətʉ ə viʼi və Jus ə tsen ə vi ə laŋtə a wen alwi ashɨ ə gàʼa la, “Wyè ghom pfʉ li toʼ luwen lə̀ alì ma kəŋ la wù vi ə kùmə̀ wen toʼ kùmə̀ ə ndi ghə̀ bwənsə lu.”

19Yesò ə lu tò lu wenə ndzɨ̀mtə̀sə bàm ə wen ə mu sə dyʉ̀ abàm ə wìʼ a yi.

20To alì, wùwì ə tsen ə vi fa abàm ə Yesò, mu ghə̀ nlaʼtə to alə̀ yenə zhʉ ə wen, mu kwaʼa a yi ə kuli ngəʼ a wen a ngwʉʼ njʉ̀sə̀ bò, ə kùm əsoŋ ə ndisə ə Yesò. 21Ghə̀ nə̀ nkumə ali byɨmə to no la ghə̀ sətsèn kum tò ndisə wen, ə ghə̀ a to.

22Yesò ə kaʼsə ə yen wen ə mù gàʼ la, “Kə wu faynə a wàyn ə ghom. Byɨmə ə wu ne li wù to.” A diʼ toʼ zhʉ yi a wùwì a yi ə to tsu.

23Yesò ə ne dyʉ̀ zaʼa a ngə̀ŋ ə wù ə kətʉ a yi ə kwen yen viʼi, və ghoʼo no alə̀, vətsenəvə bʉʼ fo, vətsenəvə dì. 24Ghə̀ gàʼa a vəwenə la, “Ghə̀ŋ fʉ. Wàyn ghèn ko pfʉ pfʉ, ghə̀ bʉnə bʉnə.” Vəwenə mu sə chyeʼ wen tò chyeʼ. 25A sə ə diʼ to ando viʼi fʉ a kəbəŋ, ghə̀ kwen dyʉ̀ a ngə̀ŋ ə ghaʼ kəvu kə wàyn a yi, no a zhʉ ko, ghə̀ lu tò lu. 26Soʼgho kənyʉ̀ a kyi ə waŋ tò əshi ə tsèm ashə əloʼ na yì.

Yesò ə ne, viʼi və shɨfkəvə və bò ə bwənsə sə yenə əshi

27Yesò ə nlu li ə bè sə dyʉ̀, viʼi və shɨfkəvə vətsenəvə mu sə dyʉ̀ tò a wenə a bàm, və bò, dzàŋ gàʼa tò la, “Kusə shɨnsə a yès a Wàyn Fòyn Devìt!”

28Ghə̀ dyʉ̀ kwen a ngə̀ŋ, viʼi a vyə ə vi ə bùmtə wen tsu. Ghə̀ bèm a vəwenə la, “Ghə̀ŋ byɨmə nəmwèʼè la mà zi ə mà ne ə ghə̀ŋ bè yenə əshi a?”

Vəwenə bwènsə̀ la, “Yès ə byɨmə a Bobo.”

29Yesò ə kùm ashi ə vəwenə ə gàʼa la, “Nyìngòŋ ə nè, ə ghə̀ŋ bwənsə ə yenə, toʼ ndə̀ŋndəŋ ando ghə̀ŋ byɨmə li.” 30Vəwenə bwənsə mu sə yenə əshi. Yesò ə tensə a vəwenə la, “Kə wìʼ nə̀ zhʉ.”

31Alì, vəwenə fʉ ə dyʉ̀ ə mu sə jèʼè shə̀ʼtə̀ soʼgho a ghèn kùmə̀ Yesò toʼ ashə əloʼ na yì ə tsèm.

Yesò chʉʼ wìʼ a ghə̀ nko gaʼa

32Viʼi vyì a Yesò ə chʉʼʉ li ə ne sə ə lù və be vi nə̀ wìʼ a Yesò ghə̀ kiʼ kəzhwì kə byɨkə, ko ghə̀ be gàʼa. 33Yesò dzɨ̀mə̀ shisə kəzhwì kə byɨkə a kì alì, wìʼ a yi ə gàʼa. Ənòyn ə viʼi vyi ə sə dìʼ nə̀ kàynə ə gàʼa la, “vəghəŋ ko tɨmə yen nki kənyʉ̀ alə̀ aloʼ ə Islel a shə̀.”

34Alì viʼi Falàsi ə sə gaʼa dyʉ̀ tò la, “A ku fòyn əzhwì ə byɨvə əku adyòʼ la ghə̀ ə dzɨ̀mə̀ shisə əzhwì ə byɨvə avenə.”

Yesò ə sə kusə shinsə a viʼi

35Yesò ə sə jèʼè kwenə a ntə̀ʼ sə ghoʼkə sə nə̀ sə tyetəsə, ziʼi a aloʼ ntsentə ə vəwenə, shə̀ʼtə̀ ntɨm ə jùŋ byìʼì əfòyn ə Nyìngòŋ, bè chʉʼʉ tənkyì tə kwaʼa tò tə tsèm. 36A mu sə diʼ to ando ghə̀ yenə ənòyn ə viʼi vyi a ghə̀ ə fʉ vi, ghə̀ kusə shɨnsə a vəwenə byìʼì ando vəwenə ə nkiʼ ngəʼsə, sə ghoʼo, ko ə gyàmtə̀ ə ndiʼ. Vəwenə ndiʼ tò nə̀ byisə njɨ̀ kenə ntsɨ̀ŋ. 37Ghə̀ mu gàʼa ndzɨ̀mtə̀sə bàm ə wen la, “Fozhɨvə ə dìʼ a mə pfì, ghoʼo no alə̀, alì viʼi və pfi və tyetə. 38Ghə̀ŋ jɨ̀m li a Nyìngòŋ yi a ghə̀ diʼ tì sɨm la ghə̀ tɨm kwùʼsə̀ viʼi və shwèʼ və və fʉ pfì pfwo a venə.”

Jelenleg kiválasztva:

Matìyò 9: bbkDBLnt

Kiemelés

Megosztás

Másolás