Luglaa 14
14
Abram n lɛɛ Lɔt ha wia
1A guŋ saŋa, Sinar Koori Amrafɛl, Ɛlasa Koori Ariɔk, Ɛlam Koori Kɛdɔlayɔma ani Gɔyim Koori Tidal ɛɛ nuukpaŋ, 2di la bá ni Sɔdɔm Koori Bɛra, Gɔmɔra Koori Birsa, Adma Koori Sinab, Zɛbɔyim Koori Sɛmɛba ani Bɛla#14:2 Bɛla sɔŋ bɛllɛ Zoa. Koori lɔ laal. 3Sɔdɔm, Gɔmɔra, Adma ani Zɛbɔyim koora ni ba nɛra faa chaali yembɛl banna yir Sidim,#14:3 Sidim sɔŋ bɛllɛ Muuzensiwii. di ɛɛ sirya, 4dikuubɛɛwiai, binni fidaanɛɛ n bɛrɛɛ, Koori Kɛdɔlayɔmaa faa ra di kora ba ni. Ka a binni fidaahorohiŋ biini, ba faa vɛɛ u dɔɔra sɛɛi.
5A binni fidaanaazuhiŋ biini, Koori Kɛdɔlayɔma ni koora la u ni baa n ɛɛ nuukpaŋ la ga kpegli Rɛfa hina bolzeŋ Astɛrɔf Kanam,#14:5 Astɛrɔf Kanam ɛɛ Koori Ɔɔg bolzenne. di kpegli Zuz hina ge yembɛl banna yir Ham, di kaa kpegli Ɛm hina ge Savɛ Kiriatam lɛl biini, 6di kpegli Hɔri hina ge Sɛɛ giŋgimee hɛri guŋŋ di ga hel Ɛlparan n dugli hɛribɔduma. 7Denii ba bir har di la bol la banna yir Ɛn Mispat,#14:7 Ɛn Mispat sɔŋ bɛllɛ Kadɛs. di kaa ga kpegli Amalɛk ani Amɔri hina la ge gba n faa soge bol la banna yir Hazazɔn Tama.
8Too, banna lɔ a laal gunla, di Sɔdɔm, Gɔmɔra, Adma, Zɛbɔyim ani Bɛla koora gillɔ ba laallɔɔra ɛɛ sirya Sidim Waluu biini, 9di lɔ Ɛlam Koori Kɛdɔlayɔma ni Gɔyim, Babilɔn ani Ɛlasa koora laal. Koora banuere faa chemme di lɔ koora banaazu laal. 10Kotaal faa su a Sidim Waluu bɔɔni biinee, Sɔdɔm ni Gɔmɔra koora faa chɔ di ra lii a laal biini, ka chogli a bɔɔni biine, ka koora bahoro lawaa faa chɔ kaali bizenaa nyuuni. 11Denii a koora banaazu la foozi Sɔdɔm ni Gɔmɔra hina kuna ani ba diwee maa, di kaali. 12Ba faa kaa lau Abram niuhambie biibaal Lɔt gba, di paagi u kundɔɔlaa maa jaa di ra kaali, dikuu uŋ faa du Sɔdɔm wia.
13Ka nɛra la n chɔwɛɛ lii a laal biini la bɛl chɔ di wa ŋɔ Hibru hinuu Abram be. Di Abram sogo dugli Amɔri hinuu Mamrɛ daazenaa. A Mamrɛ ni u lulla Ɛskɔl, Anɛ ani Abram faa dɔɔ nuukpannɛ. 14Abram n wa nuuwɛ lugɔ ba lau Lɔtii la, u yir u dia balaa kalfaahoro ni fidiŋmantannaazi la un dɛɛzɛɛ nɛnnɛ, ba du kpeg. Ba chaali, di vɔɔ di ra duŋŋi koora banaazu la ni ba laallɔɔra luge, guŋŋ di ga huuzi baa bol la banna yir Dan. 15Baŋ ga huuzi baa la, Abram bargi u nɛra la, ba ra lɔ a laallɔɔra laal hamuŋa ni. Ba lɔ guŋŋ di wa kpegli ba dɔma la, ba chɔ yaari. Ka Abram faa haa duŋŋi baa guŋŋ di ga hel bol la banna yir Hɔba n du Damaskus wiifurii nomɛɛl wiikakag. 16Abram ni u laallɔɔra la faa foozi a kuna maa, di kpogli u lulli Lɔt ni u kundɔɔlaa, di kpa haana ani a nɛra baŋhina bir ba.
17Abram n jaa wa kpegli Koori Kɛdɔlayɔma ni u dɔŋa hina koora la n dɔɔ nuukpaŋ la, ka bir di ra ba la, Sɔdɔm koori lii chem u ni Savɛ Waluu banna yir Koori Waluu biini.
18Denii Salɛm Koori Mɛlkizɛdɛk n faa kaa ɛɛ Kɔraawiizi La N Kaali Kummaa la kizeehiŋ, kpa paanuu ni siŋ wa tɛu,#Hib 7:1-10; Lug 28:22 19ka kissuu, di ŋɔ,
“Kɔraawiizi La N Kaali Kummaa la kissii,
waabuu ta chiŋ
ni hɛri maa la.
20U dɔɔ jaannɛ uŋ hiinii,
i wer kpegli i dɔma.”
Uŋ wa ŋɔ guŋ tuŋ, Abram jaa bargi kuna la maa uŋ foozee u dɔma be la bɔra fi, di kpa a bɔkpaŋ tɛɛ Mɛlkizɛdɛk.
21Denii Sɔdɔm Koori ŋɔ Abram be, “Kpa n nɛra la maa baŋ faa laurɛɛ di tɛŋ, ka kpogli ba kuna lawaa maa hiŋ foozee la.”
22Ka Abram bir ŋɔ, “N teŋ hɛɛhzɔɔrɛ di ŋɔ nua tɛɛ Kɔraawiizi La N Kaali Kummaa la n ta chiŋ ni hɛri maa 23lugɔ màá lɛɛ kunjiga maa, haali u lugɔ gessibii gba, di lii i be, í ŋmɛnɛ maa gilɛɛ wa ŋɔ lugɔ hinuu gillɛ mìŋ́ Abram birgi dɔɔŋ. 24Màá lɛɛ kummaa, di anla n laallɔɔra n diwee la lɛi. Ka gil Anɛ, Ɛskɔl ani Mamrɛ hina la n duŋ la lawaa, na ba hora.”
Jelenleg kiválasztva:
Luglaa 14: vag
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
