Luglaa 12
12
Kɔraawiizi n yir Abram wia
1A hɔl bɛl, Kɔraawiizi ŋɔ Abram be, “Lii i hɛri ni i nɛra ani i mɛɛ dia, ka izi la hɛri bɛl min niŋ baglii.
2N daŋ gil i naanna wazi,
ń kissii,
di tɛi sɔnzeŋ,
di gil i birgi
nɛkpila maa hiini.#Gale 3:9
3N daŋ kissi banla maa n niŋ kissii,
banla maa ge
n niŋ seei nua,
n ge daŋ see baa nua.
Hɛri nɛra maa
daŋ na hiinaa lii i be.”
4Awia, Abram faa izi di lii a hɛri, gunla Kɔraawiizi n bagluu la. Lɔt faa duu ba ra la. Binni tokkoahoro ni fidaanuere Abram faa di, ka haa izi bol la banna yir Haran la. 5Unna la la, u kpogli u haaŋ Sarai, u niuhambie biibaal Lɔt, di kpa ba daama ni ba yoma maa baŋ dɔɔwɛ Haran jaa, di ga hel Keenan hɛri.
6Baŋ faa ra vol a Keenan hɛri la, ba ga hel Mɔrɛ daazeŋ bɛl n du Sɛkɛm zɛɛ. A saŋa hiŋ, Keenan hinaa faa du a de hɛri hiŋ. 7Denii Kɔraawiizi ba Abram be di wa ŋɔ u be, “N daŋ kpa hɛri naa tɛɛ i naanna.”#Lug 13:15-16; Gbɔg 34:4 Awia, u faa ma mbusu lizibɔr de, tɛɛ Kɔraawiizi, dikuu uŋ ba u be de la wia.
8Abram faa kaa izi de, di la a hɛri giŋgimee bɔr n du bola la banna yir Bɛtɛl#12:8 Bɛtɛl zɛɛrɛ Kɔraawiizi Dia. wiifurii, di ga baŋ u tanti dia de, Bɛtɛl du wiicholii, Ai ge du wiifurii. Denii u faa ma mbusu lizibɔr di jaami Kɔraawiizi. 9Abram faa kaa izi di ra la Nɛgɛv#12:9 Nɛgɛv sɔŋ bɛllɛ Juda wiifurii nodig wiikakag hɛribɔduma. barii.
Abram n du Ijip wia
10A saŋa hiŋ, lɔzi faa chol Keenan hɛri werge. Guŋ wia, Abram faa izi ú ga so Ijip hɛri tama mɔɔ. 11Banna la gaa dugli Ijip hɛri, Abram ŋɔ u haaŋ Sarai be, “I ɛɛ toloorii werge. 12Di Ijip hina naa haŋ wa nai, ba daŋ ŋɔ, ‘U haannɛ keŋ.’ Denii bá kpuŋ ka gilii. 13Di ba wa ŋɔ guŋ, hiŋwaa ŋɔ lugɔ n niuhambiere hiŋ. Ba daŋ ɛɛŋ nɛnnɛ, di gil n kpui dikuu i wia.”
14Baŋ wa hel de, wibii maa, Ijip hina la ra ŋɔ Sarai wessi wia. 15Ijip koori nabɔnzi n wa nau, ba chɔluu di ra tɛɛ a koori, di kpogluu zuu u kooridia. 16Baŋ ɛɛ gunla, denii Ijip koori ɛɛ Abram nɛnnɛ, di tɛu peeza ni nauna, kaubala ni a niinazi, yombaala, yoŋhaana ani nyugmazi.
17Ka Kɔraawiizi faa gil wiilkpega chol Ijip koori ni u diahina ni, dikuu Abram haaŋ Sarai wia. 18Denii Ijip koori yir Abram, di pɛɛzuu, “Ɛrɛɛ i ɛɛŋ kennei? Bɛɛ wiarɛ haa n be ŋɔwɛɛ lugɔ i haannɛi? 19Ɛrɛɛ wiarɛ i kanni kara lugɔ i niuhambiere, n kuu guŋ wia di kpauwɛi? I haaŋ hinnɛ keŋ! Kpogli i kuŋ di ra la!” 20Denii Ijip koori faa kpa ba ni ba daama maa du u laallɔɔra nonee, ba duŋŋi baa di lii Ijip hɛri.
Jelenleg kiválasztva:
Luglaa 12: vag
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
