Matiu 2
2
Amǝ'sǝle amur anlero yiua sǝn Yesu
1À ɓǝl Yesu a Betalami, a nzali Yahudi, a baku mǝnana Hirǝdus nda murǝm ngga. Tu anzǝm ɓǝl Yesu ka, amǝ'sǝle amur anlero pur nǝ takuli sǝ à yiu a Urǝshalima, 2à yì ɗiban ama, “Murǝm mala amǝ Yahudi mǝnana à loa ɓǝle ka, nda ake? Sǝm sǝn nlero mala ɓǝle a takuli, nda sǝm yiua peri abani ka.”
3Lang murǝm Hirǝdus ok mǝnia yì cau ka, ban ɓiki wi andǝ aɓwana kat a Urǝshalima mǝnana à ok ce ka. 4Pǝlǝa tunǝ agbani pǝris andǝ amǝkani Nggurcau rambǝia, sǝ ɗia ce ban mǝnana à nǝ̀ ɓǝl Kǝrǝsti kam ngga. 5Sǝ à ne wi ama, “A Betalami a bu-nzali Yahudi. Mǝnia ka nda cau mǝnana mǝɓangna mala Ɓakuli gilǝ ka:
6“ ‘We Betalami,
a nzali Yahudi,
a gatti pale ɗang
a ta amurǝma
mala nzali Yahudi.
Acemǝnana a ɓalǝo
sǝ murǝm nǝ̀ puro,
mǝnana nǝ̀ yal
aɓwana mem
amǝ Isǝrayila ka.’#2:6 Ɓalli gbal aɓa: Mik 5:2.”
7Hirǝdus pǝlǝa tunǝ amǝ'sǝlǝgir mǝnia ka aɓa sǝmbǝrǝa sǝ ɗia pepe pwari mana à sǝna nleroe nǝi ka. 8Pǝlǝa nea wia ama, “Wu kyane a Betalami wu kya alta ban mune ɓukɓuk, ɓǝ̀ wu kumǝni ka, wu nyare wu yi banggam, mim gbal ka mǝ nǝ ká peri abani.”
9Lang à ongŋǝna cau mala murǝm ngga, à pǝlǝa à bwal njar malea aban o. Sǝ à nda rǝ o ka, kara à sǝn nlero mǝnana à sǝni ɗiɗyal a takuli ka, puro akia wia dǝmbǝa aban ká, sǝ yi came amur ban mǝnana mune pak kam ngga. 10Banɓoaria wia kǝrkǝr arǝ sǝn mǝnia yì nlero ka. 11À nǝ̀ kutio a ɓala ka, à sǝn muna andǝ ngge Maryamu, sǝ à ɓun a ɓadǝmbǝi, à peri. Pǝlǝa à panzǝki agǝna malea sǝ à pe wi aɓoro zǝnariya, andǝ lubban andǝ mǝr. 12Ɓakuli nun kiria a lorǝo ama ɓǝa kǝa nyar aban Hirǝdus ɗang. Pǝlǝa à twal ɓe njargula ɗang à nyare a nzali malea.
À ɓang nǝ Yesu à um nǝi a nzali Masar
13Lang amǝ'sǝle amur anlero umna ka, mǝturonjar mala Mǝtalabangŋo pusǝrǝi aban Yisǝfu a lorǝo sǝ banggi wi ama, “Lo twal muna andǝ ngge wu ɓangŋa wu o a nzali Masar. Wu duk kano she ɓǝn bangŋǝno ama wu nyar ka, acemǝnana Hirǝdus na nǝ̀ ngga alta muna ama nǝ̀ wali.”
14Sǝ Yisǝfu lo twal muna andǝ ngge àkǝ̀ bu dui sǝ à o a nzali Masar. 15Akano sǝ kya do ba lú mala Hirǝdus. Mǝnia ka yi lumsǝ cau mala Mǝtalabangŋo mana pur a kun mǝɓangna male ama,
“Aɓa nzali Masar sǝ ǝn tunǝ munem.”#2:15 Ɓalli gbal aɓa: Hos 11:1.
Hirǝdus wal amuna-burana amǝkeke a Betalami
16Lang Hirǝdus yi sǝlǝ ama amǝno yì amǝ'sǝlǝgir ɓosǝkini ka, bumi lul kǝrkǝr. Pǝlǝa tasǝ asoje a Betalami andǝ ala mana a nkanggari ka à wal amuna-burana mǝkeke kat mǝnana pǝlǝa malea ɓari andǝ a mǝnana à bwal raka, kārǝí arǝ pwari mǝnana ongŋǝna ce nǝi a kun amǝ'sǝlǝgir ka.
17Aɓa mǝno anggo ka sǝ cau mǝnana pur a kun Irmya mǝɓangna ka yi lumsǝo, mana ama:
18“À ok ɓuà mala
ɓeɓwa a Rama,
ɓuà keban andǝ
bumkiɗikea mǝkǝrkǝr nì.
Rahila na kǝ ɓuà
ace amuni ka.
Ɓinǝ girikiban,
acemǝnana à wukina kat.”#2:18 Ɓalli gbal aɓa: Ir 31:15.
Yisǝfu andǝ Maryamu twal Yesu a nyare a Nazarat
19A nzǝm lú mala Hirǝdus ka, mǝturonjar mala Mǝtalabangŋo pusǝrǝi aban Yisǝfu a lorǝo a nzali Masar. 20Mǝturonjar ne wi ama, “Lo twal muna andǝ ngge, nyare a nzali Isǝrayila, ace mǝnana Hirǝdus andǝ aɓwana mana à alkiyita yilǝmi muna ka à wukina.”
21Pǝlǝa Yisǝfu lo twal muna andǝ ngge, sǝ à nyare a nzali Isǝrayila. 22Sǝ lang Yisǝfu ok ama Arkilawus na duk murǝm Yahudi a nzǝm lú mala tarrí Hirǝdus ka, ɓangciu pakki wi arǝ ka a Yahudi. Sǝ mǝturonjar nunkiri a lorǝo ka, pǝlǝa o a bui mala amǝ Galili. 23Nda à wario à kya do a ɓekǝ la mǝnana à tunǝki ama Nazarat ka. Mǝnia ka nda lumsǝ cau mala amǝ'ɓangna mala Ɓakuli mana ama, “À nǝ̀ tunǝi ama ɓwa Nazarat.”
Jelenleg kiválasztva:
Matiu 2: mbu
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Wycliffe Bible Translators, Inc. and © The Nigeria Bible Translation Trust 2016
