នាវនតើម 3
3
នតើមគែសនាវតីសឞូនុយ្ស
1នតើមនើសគែសទូមល៝ម់ឞេសជេងមពោមពា(ឆ្យុម)ឞ្រី ពាង់ឞ្លាវរាលាម់នាវរាលាវឞូ ដាសមាមពោមពា(ឆ្យុម)អាបាៈអេងតាឞ្រីអីឞ្រាសយេហោវា លែៈជេសញជេង។ គែសទូនារឞេសនៃអោបមាឞូអូរអីនៃ៖ “ហើយយោស ងាន់លាសកោរាញឞ្រាសលាសនើស៖ «មោអ៝ន់ខាន់អៃមៃឆាព្លៃទឹងលែៈតាមីរអ្យា?»”#នតម ១២:៩; ២០:២ 2ឞូអូរអីនៃអើសមាពាង់៖ “លិចនទ្រីអោស ព្លៃតាមីរអ្យាកោរាញឞ្រាសអ៝ន់ហេនឆាទាទេ 3តើមព្លៃអីងក្លាងមីរអីនៃទូតើមទើម កោរាញឞ្រាសលាស៖ «ព្លៃតើមឆីអីងក្លាងមីរអីនៃមោអោសអ៝ន់ខាន់អៃមៃឆា មោអោសអ៝ន់ខាន់អៃមៃពាស លាសឆាលាសពាសខាន់អៃមៃមរាខឹតរ៝» នទ្រីលាសព្រែនើស”។ 4ឞេសលាសមាឞូអូរអីនៃជឹត៖ “មោខឹតអោសយោស ខាន់អៃមៃមោខឹតវាៈ។ 5កោរាញឞ្រាសពាង់គឹត លាសខាន់អៃមៃឆា មាត់មរាអាង រីមើទឹងខាន់អៃមៃជេងតឹមឞានមាកោរាញឞ្រាសនើម គឹតនាល់នទើអ្វែសនទើអ្យើសដ៝ង់អេៈ”។ 6ជេសរីឞូអូរអីនៃឆៃព្លៃឆីអីនៃទុមអ្វែសងាន់ អុចមាឆារ៝ ពាង់កើញគែសនាវគឹតឞ្លាវអីរី នហ៝មាត៝ត់ពាង់ពែៈឆា។ អីឆាយពាង់គុដាសពាង់នើមតានៃដ៝ង់ ជេសរីពាៈអ៝ន់អីឆាយពាង់ឆា អីឆាយពាង់ឆាដ៝ង់។ 7ជេសឆាព្លៃអីនៃ មាត់ខាន់ពាង់ឆៃអាងងាន់រ៝ នហ៝មាគឹតលាសឆាក់ខាន់ពាង់នើមគុលាហោកដ៝ង់ ជេសរីខាន់ពាង់ពែៈនហារាវី ជឹងតឹមងក្រេបជានឞ៝កគៃមាមឞាន់ឆាក់ជាន់ខាន់ពាង់នើម។
8ត៝ត់នារវែតញឆ្រិញរិញនអីករាងេតនៃ ខាន់ពាង់តាង់នតែសឞ្រាសយេហោវា ហាន់ឞ្រោៈរ៝ៈមីរនៃ ខាន់ពាង់ទូញច្វាត់ក្រាបតាន៝ម់តើមឆីតាមីរនៃរ៝ គៃមាលើយអ៝ន់ឞ្រាសយេហោវា ឆៃ។#នម ១៣៩:៧-១០; យេរ ២៣:២៤ 9ជេសរីឞ្រាសយេហោវា ក្វាល់អីឆាយរី៖ “ហើយអាដាម់ #៣:៩៖ «ហើយអាដាម់ » មោលាស៖ «ហើយឞូនុយ្ស» តានាវងើយហេឞ្រើ«អាដាម់ »រាញា «ឞូនុយ្ស»ដ៝ង់។ អាសមៃហ្យើ?”#២:៧ 10ពាង់អើស៖ “គ៝ប់តាង់មៃហាន់រ៝ៈមីរនៃ គ៝ប់ក្លាចញឆ៝រ់ងាន់ យ៝រលាសគ៝ប់នើសគុឆាក់លាហោកទើម កើតនទ្រីទឹងគ៝ប់ក្រាបកោរាញឞ្រាសមេ”។ 11ឞ្រាសយេហោវា អោបជឹត៖ “ឞូម៝សមឞើសមាមៃ ទឹងមៃគឹតលាសគុលាហោក? គឹតមៃគែសឆាព្លៃឆីអីគ៝ប់ឞ្វៃមោអ៝ន់មៃឆានើសមោ?” 12អាដាម់ #៣:១២៖ «អាដាម់ » មោលាស៖ «ឞូនុយ្ស»។អើស៖ “ឞូអូរអីមៃអ៝ន់គុនទ្រែលគ៝ប់នើស ពាង់អ៝ន់ព្លៃអីនៃមាគ៝ប់ ជេសរីគ៝ប់ឆាដ៝ង់”។ 13ជេសរីឞ្រាសយេហោវា លាសឞូអូរអីនៃ៖ “ម៝សជានអៃកើតនទ្រីរី?” ឞូអូរអីនៃអើស៖ “ឞេសទែមរោសដាៈគ៝ប់ឆា ទឹងគ៝ប់ឆាព្លៃឆីអីនៃនើស កោរាញឞ្រាសមេ”។#២កោ ១១:៣; ១តម ២:១៤
14 ឞ្រាសយេហោវា លាសឞេស៖
“យ៝រមាមៃជាននអៃ
ទឹងលែៈមពោមពា(ឆ្យុម)អាបាៈអេង
អីតាឞ្រីតាប៝ន
ទូមល៝ម់មៃអ្យាគ៝ប់រាតាប់អ៝ន់មៃឞ្រោៈហូងមានទុល
នទ្រែលមាឆាលែរនែស
ទូញជារ់នាវរេសមៃ។
15ជេសរីគ៝ប់អ៝ន់គែសនាវតឹមលើសមៃ ដាសឞូអូរអីនៃ
នទ្រែលមារាន៝យទែសឞូអូរអីនៃ ដាសមាអីក៝នឆៅមៃតៃដ៝ង់
រាន៝យទែសពាង់តៃមរាជ៝តឞោកមៃ
ជេសរីមៃតៃមរាចោករាមាង់អ្យារ់រាន៝យទែសពាង់ដ៝ង់”។#នតម ១២:១៧
16ជេសរីឞ្រាសយេហោវា លាសមាឞូអូរអីនៃដ៝ង់៖
“ទោលអៃគុអ៝សគ៝ប់អ៝ន់អៃគែសនាវជេរហោរាលាវជឹត
អៃគែសនាវជីនទុលហោងាន់រ៝
នូយ្សនហ៝ម់អៃមរាអុចងាន់ម៝ត់ឞោកឆាយអៃ#៣:១៦៖ «នូយ្សនហ៝ម់អៃមរាអុចងាន់ម៝ត់ឞោកឆាយអៃ» មោលាស៖ «នូយ្សនហ៝ម់អៃអុចឆាយអៃហោដ៝ង់»។
តីសមាឆាយអៃម៝ត់ឞោកអៃ”។#អេផ ៥:២២-២៣
17ជេសរីឞ្រាសយេហោវា លាសអាដាម់ ដ៝ង់៖
“គ៝ប់រាតាប់នែសអ្យា មោអោសអ៝ន់គែសជេង
យ៝រមាមៃអ្យាត់នាវអូរមៃឆាព្លៃឞើសតើមឆីអីគ៝ប់មោអ៝ន់ឆានៃនើស
នទ្រីទឹងមៃជ៝យនទើឆោងឆាព៝ក់នែសរាអាសរាគាញ់អាប់នារទូញជារ់នាវរេសមៃ។#ហេឞ ៦:៨
18ជេសរីមៃឆោងឆានទើអីហ៝នលោសតាៈឞើសឞ្រីឞើសមីរ
យើនមានែសហ៝នរេបហ៝នល៝កដ៝ង់
19មៃជានការលោសរាហាលពាលមលៃងាន់
រីមើគែសនទើឆោងឆាមាឆ្យាម់ឆាក់ត៝ត់ខឹតងក្រែមាលេកតៃតានែស
យ៝រលាសគ៝ប់ឆ៝ៈម៝នមៃនើសតាៈឞើសនែសមោយ
កើតនទ្រីមៃមរាជេងតៃនែសមោយកើតអើមដ៝ង់”។#នម ១០៣:១៤; ករ ៣:២០; ១២:៧
20ជេសរីអាដាម់ តេៈរាញាអូរពាង់អីនៃក្វាល់លាស«អេវា »#៣:២០៖ តានាវងើយហេឞ្រើនតែសរាញា«អេវា »តឹមឞានមានតែស«នាវរេស»។ យ៝រលាសពាង់នើសអីមេៈទឹងលែៈរាងោចឞូនុយ្ស។ 21ជេសរីឞ្រាសយេហោវា ឆ៝ៈនតោមពោមពា(ឆ្យុម)ឆើមជានឞ៝កអាវឆើមញឆ៝សអ៝ន់មាខាន់ពាង់។
22 ឞ្រាសយេហោវា លាសអេងពាង់នើម៖ “អាបៃរីឞូនុយ្សជេងតឹមឞានមាឞ៝ន់ លែៈគឹតនាល់នទើអ្វែសនទើអ្យើស លាសនទ្រីគៃមាលើយអ៝ន់ខាន់ពាង់គែសនាវរេសនហ៝រ៝ លើយអោសអ៝ន់ខាន់ពាង់ពែៈឆាតៃព្លៃតើមឆីអ៝ន់នាវរេស”។#នតម ២២:១៤ 23នទ្រីទឹងឞ្រាសយេហោវា នត្រុតមព្រើសខាន់ពាង់ទូលោសឞើសមីរអេដែន នៃ អ៝ន់ខាន់ពាង់គុនតុកអេង ជានមីរព៝ក់នែសអីឞ្រាសយេហោវា ឆ៝ៈម៝នញជេងខាន់ពាង់នើស។ 24ជេសនត្រុតមព្រើសខាន់ពាង់ទូលោសឞើសមីរអេដែន អីនៃ ឞ្រាសយេហោវា អ៝ន់តោងពារ់ចេរូបីន#៣:២៤៖ «តោងពារ់ចេរូបីន» ពាង់អីឞូនុយ្សទូមពោលគុតាកាលើត្រោក គុជានការមាកោរាញឞ្រាសនើម។ នទ្រែលមាដាវអុញរាវាវញជ្រាង់ត្រ៝ង ក៝ប់ឞើសមពែសលោសនារមីរអេដែន នៃ គៃមាលើយអោសអ៝ន់ឞូនុយ្សព្លឹតៃតាតើមឆីអីអ៝ន់នាវរេសនហ៝រ៝។
Jelenleg kiválasztva:
នាវនតើម 3: cmoK
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© (Active) Wycliffe Bible Translators, Inc. All rights reserved.
