Génesis 4
4
Caín jare Abel
1Joko wi Adán jembireko Eva ipurúa jare oa imembɨ kuimbae. Jare Eva umbɨjee Caín,#4.1 Tee Caín uipota jei “ime ma anoi” hebreo ñee pe. echa’ä Eva jei: “Tumpa umee chewe chemembɨrä kuimbae,” jei. 2Joko wi Eva ipurúa ye jare oa Caín tɨwɨ Abel jee wae.
Jayawe Caín jare Abel ukuakuaa ma yawe, Abel ko jae owecha umɨñemoña wae. Jare Caín ko jae koo pe uparawɨkɨ wae.
3Amokue año uasa ma yawe, pëti ara Caín ueru umee waerä Tumpa pe amokue imbaewɨye iko pewa. 4Jare Abel uiparawo amokue wae iowecha reta imembɨrɨpɨ ikawiete wae, jare uyuka, jare ueru umee waerä Tumpa pe mɨmba isoo ikawiete wae jare ikɨra wae. Jare Tumpa uyerowia umae Abel re jare jokua jae ueru wae re. 5Erëi uyerowia’ä umae Caín re jare jokua jae ueru wae re. Jáeramo Caín pochɨete jare umbɨchaitɨ upɨta.
6Jayawe Tumpa upɨrandu Caín pe: “¿Maera pa ndepochɨ jare nembɨchaitɨ neï?” jei. 7“Ndiyapo yawe ikawi wae, ayerowiata amae nderé. Erëi iyandareko kawi ndiyé, echa’ä ndiyapo yawe ikawi mbae waeño, ndereko kachi nemɨamɨrita oï. Teko kachi ko mbaemɨmba pochɨ wae rami nepiäro oï ndeyɨpɨ rupi. Jae uipota nemɨamɨri oï. Erëi nde ndepuereta nemɨamɨri ndeyuwi jokua teko kachi,” jei Tumpa Caín pe.
8Pëti ara Caín jei tɨwɨ Abel pe: “Ya yawata mbɨrɨ rupi,” jei chupe. Jare mbɨrɨ ñonoï yawe, Caín uyuka tɨwɨ Abel.
9Jayawe Tumpa upɨrandu Caín pe: “¿Kiape pa oï nderɨwɨ Abel?” jei.
Jayawe Caín jei chupe: “Aikuaa’ä,” jei. “Jae’ä ko che cherɨwɨ iyandarekoa,” jei.
10Jare Tumpa jei chupe: “¿Mbae pa ndiyapo?” jei. “Aecha ndiyuka nderɨwɨ. Jare jae juwɨ ɨwɨ pe oï wae usapɨkai echa oï chewe aiporaraka waerä ndewe nderɨwɨ ndiyuka ramo,” jei. 11“Jáeramo, añawe kua ndiyapo jeko pewa, ndiko kawita’ä neï. Che nomoëta kua ɨwɨ wi, echa’ä ndepo pe etei ndepɨyere nderɨwɨ juwɨ kua ɨwɨ re ramo. 12Añawe wiwe, yepe tëi ndeparawɨkɨta täta ndeko pe, erëi yawɨyeta’ä ma ndewe mbae awe. Jare ndewatata opaete kerupi rupi jare ndikota ambɨe ɨwɨ pewa rami opaete ɨwɨ rupi ndeota wae rupi,” jei chupe.
13Jayawe Caín ipɨatɨtɨete jare jei Tumpa pe: “Kua ndiporarakata neï chewe wae chepuereta’ä amɨawäta,” jei. 14“¡Mase! Añawe nde chemombo ma neï kua ɨwɨ wi. Mbaetɨta ma chepuere ayu nderowai. Jare opaete kerupi ambɨe ɨwɨ pewa rami awatata. Jare ipotawe kía cherecha wae cheyukata ko,” jei.
15Jayawe Tumpa jei chupe: “Mbaetɨta ko jukuärái,” jei. “Kía nunga wae ndeyuka yawe, aiporarakaeteta ko chupe chiu wese ye ndewi,” jei chupe. Jare Tumpa oñono pëti marka Caín re, jukuärái kía nunga wae uecha yawe, uyukata’ä. 16Jayawe Caín oë Tumpa jowai wi jare oo iko waerä ɨwɨ Nod jee wae kotɨ. Jokua ɨwɨ oï mbaewɨyerenda Edén wi warasɨ oë wae kotɨ.
Caín iñemoñaa reta
17Joko wi Caín wɨreko jembireko jare jembireko ipurúa. Jare oa imembɨ kuimbae Enoc jee wae. Joko wi Caín uyapo pëti tëta wasu jare umbɨjee taɨ Enoc jee pe.
18Enoc ukuakuaa ma yawe, jae wɨreko jembireko jare oa imembɨ kuimbae Irad jee wae. Jare Irad ukuakuaa ma yawe, jae wɨreko jembireko jare oa imembɨ kuimbae Mejuyael jee wae. Jare Mejuyael ukuakuaa ma yawe, jae wɨreko jembireko jare oa imembɨ kuimbae Lamec jee wae.
19Jare Lamec ukuakuaa ma yawe, jae jembireko mokui – pëti jee Ada, jare ïruwe jee Zila. 20Jare Ada imembɨ kuimbae oa, Jabal jee wae. Jabal ko jae tenonde uruwatase jëta wakapi pewa wae jare mbaemɨmba tëta rupiwa umɨñemoña wae. 21Jare Jabal tɨwɨ jee Jubal. Jubal ko jae tenonde ikatuete umaembopu wae jare uyemimbɨ wae. 22Jare Zila imembɨ kuimbae oa wi, Tubal-Caín jee wae. Jae ikatuete uyapo waerä tembiporu jiero pewa jare bronce#4.22 Bronce ko jae pëti jiero iyu wae. pewa. Jare Tubal-Caín jindɨ jee Naamá.
23Pëti ara Lamec jei jembireko reta Ada jare Zila pe kuärái: “¡Piyapɨsaka kawi, chembireko reta! ¡Piyapɨsaka chiñee re!” jei. “Ayuka ma pëti taurusu wae chembɨpere ramo. 24Tumpa uiporarakata chiu wese ye kía nunga wae pe uyuka yawe Caín. Erëi kía nunga wae chembɨpereño yawe, jae uiporarata setenta y siete wese yewɨ.” Jukuärái jei.
Adán taɨ mbapɨa Set jee wae
25Adán jembireko Eva imembɨ ye kuimbae jare umbɨjee Set,#4.25 Tee Set uipota jei “uñemee wae” hebreo ñee pe. echa’ä Eva jei: “Tumpa umee chewe kua chemembɨ Abel ipepɨka pe Caín uyuka wae,” jei. 26Jare Set ukuakuaa ma yawe, wɨreko jembireko jare oa imembɨ kuimbae Enós jee wae. Joko wiwe amokue kuimbae reta umbɨpɨ imandúa reta Tumpa re jare umbutuicha reta Tumpa jee.
Jelenleg kiválasztva:
Génesis 4: gnwPB
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2017, Ethnos360 (New Tribes Mission). All rights reserved.
