ປະຖົມມະການ 14
14
ອັບຣາມຊ່ວຍຊີວິດຂອງໂລດ
1ມີກະສັດສີ່ຄົນດັ່ງນີ້: ເຈົ້າອຳຣາເຟນແຫ່ງນະຄອນບາບີໂລນ, ເຈົ້າອາຣິໂອກແຫ່ງນະຄອນເອນລາຊາ, ເຈົ້າເຄໂດລາໂອເມແຫ່ງນະຄອນເອລາມ ແລະເຈົ້າຕີດານແຫ່ງນະຄອນກົວອິມ; 2ກະສັດເຫຼົ່ານີ້ໄດ້ເຮັດເສິກກັບກະສັດຫ້າຄົນດັ່ງນີ້: ເຈົ້າເບຣາແຫ່ງນະຄອນໂຊໂດມ, ເຈົ້າບີຊາແຫ່ງນະຄອນໂກໂມຣາ, ເຈົ້າຊີນັບແຫ່ງນະຄອນອັດມາ, ເຈົ້າເຊເມເບແຫ່ງນະຄອນເຊບົວອິມ ແລະເຈົ້າແຫ່ງນະຄອນເບລາ (ຫລືໂຊອາ). 3ກະສັດທັງຫ້າຄົນນີ້ຮ່ວມກັນເຂົ້າເປັນພັນທະມິດ ແລະໂຮມກຳລັງກັນຢູ່ໃນທົ່ງຮາບພຽງສິດດິມ ຊຶ່ງໃນປັດຈຸບັນນີ້ແມ່ນທະເລຕາຍ. 4ກະສັດທັງຫ້ານັ້ນຢູ່ໃຕ້ອຳນາດຂອງກະສັດເຄໂດລາໂອເມ ເປັນເວລາສິບສອງປີ; ແຕ່ໃນປີທີສິບສາມ ບັນດາກະສັດທັງຫ້າກໍພາກັນກະບົດຂຶ້ນ. 5ໃນປີທີສິບສີ່ ເຄໂດລາໂອເມພ້ອມທັງພັນທະມິດໄດ້ຍົກທັບມາປາບ ພວກເຣຟາອີມແຫ່ງນະຄອນອັດຊະຕາໂຣດ-ການາອີມ, ພວກຊູຊິມແຫ່ງນະຄອນຮາມ, ພວກເອມິມທີ່ທົ່ງນາຂອງນະຄອນກີຣິອາດທາອິມ, 6ແລະພວກໂຮຣີທີ່ເນີນພູຂອງດິນແດນເອໂດມ; ໂດຍໄລ່ຕິດຕາມພວກເຂົາໄປ ຈົນຮອດເມືອງເອນປາຣານໃກ້ທະເລຊາຍ. 7ແລ້ວພວກເຂົາກໍໄດ້ເຄື່ອນທັບມາເຖິງເມືອງກາເດັດ. (ເມືອງນີ້ມີຊື່ອີກວ່າເອນມິດສະປັດ.) ພວກເຂົາໄດ້ເອົາຊະນະທຸກເມືອງຂອງຊາວອາມາເຫຼັກ ຕະຫລອດທັງຊາວອາໂມ ທີ່ອາໄສຢູ່ໃນເມືອງຮາຊາໂຊນຕາມາ.
8ຕໍ່ມາ ບັນດາກະສັດແຫ່ງນະຄອນໂຊໂດມ, ໂກໂມຣາ, ອັດມາ, ເຊບົວອິມ ແລະເບລາ (ທີ່ເອີ້ນວ່າໂຊອາ) ໄດ້ທ້ອນໂຮມກຳລັງກັນທີ່ທົ່ງຮາບພຽງສິດດິມ 9ເພື່ອສູ້ຮົບກັບເຈົ້າເຄໂດລາໂອເມແຫ່ງນະຄອນເອລາມ, ເຈົ້າຕີດານແຫ່ງນະຄອນກົວອິມ, ເຈົ້າອຳຣາເຟນແຫ່ງນະຄອນບາບີໂລນ ແລະເຈົ້າອາຣິໂອກແຫ່ງນະຄອນເອນລາຊາຄື: ກະສັດຫ້າຄົນຕໍ່ສູ້ກະສັດສີ່ຄົນ. 10ທີ່ທົ່ງຮາບພຽງຂອງສິດດິມເຕັມໄປດ້ວຍບໍ່ນໍ້າມັນດິບ ເວລາກະສັດແຫ່ງໂຊໂດມ ແລະໂກໂມຣາ ພະຍາຍາມເອົາຕົວຫລົບໜີຈາກການສູ້ຮົບ ທັງສອງຈຶ່ງຕົກລົງໃນບໍ່ນັ້ນ; ສ່ວນກະສັດຄົນອື່ນຕ່າງກໍຫລົບລີ້ ເອົາຕົວລອດໄປທາງເນີນພູ. 11ກະສັດທັງສີ່ຢຶດເອົາສິ່ງຂອງທັງໝົດ ພ້ອມສະບຽງອາຫານໃນເມືອງໂຊໂດມ ແລະໂກໂມຣາ ແລ້ວໜີໄປຈາກເມືອງ. 12ໂລດຜູ້ເປັນຫລານຊາຍຂອງອັບຣາມ ທີ່ອາໄສຢູ່ໃນເມືອງໂຊໂດມໃນເວລານັ້ນກໍຖືກຈັບໄປດ້ວຍ ແລະຊັບສິນເງິນຄຳທັງໝົດກໍຖືກຢຶດເອົາໄປເຊັ່ນກັນ.
13ແຕ່ມີຊາຍຄົນໜຶ່ງປົບໜີມາໄດ້ ຈຶ່ງບອກເລື່ອງໃຫ້ອັບຣາມຄົນເຮັບເຣີຮູ້ ຊຶ່ງໃນເວລານັ້ນເພິ່ນອາໄສຢູ່ໃກ້ຕົ້ນໄມ້ສັກສິດຂອງມຳເຣ ຊາວອາໂມ. ມຳເຣເປັນອ້າຍຂອງເອັດຊະໂຄນ ແລະອາເນ. ສ່ວນຄົນພວກນີ້ເປັນພັນທະມິດຂອງອັບຣາມ. 14ເມື່ອອັບຣາມໄດ້ຍິນວ່າ ຫລານຊາຍຂອງຕົນຖືກຈັບໄປ; ເພິ່ນຈຶ່ງລະດົມເອົານັກຮົບຈຳນວນ 318 ຄົນ ໃນຄ້າຍພັກຂອງຕົນ ແລະໄລ່ຕິດຕາມກະສັດທັງສີ່ໄປຈົນເຖິງເມືອງດານ. 15ຢູ່ໃນທີ່ນັ້ນ ອັບຣາມໄດ້ແຍກກຳລັງອອກເປັນສອງໝວດ; ແລ້ວເພິ່ນກໍບຸກໂຈມຕີສັດຕູໃນເວລາກາງຄືນ ແລະເອົາຊະນະພວກເຂົາ. ຄົນຂອງອັບຣາມຍັງໄດ້ໄລ່ຕິດຕາມພວກເຂົາໄປຈົນເຖິງເມືອງໂຮບາ ທາງທິດເໜືອຂອງເມືອງດາມັສກັດ, 16ແລະຢຶດເອົາຊັບສົມບັດເງິນຄຳກັບເຂົ້າຂອງທັງໝົດຄືນມາໄດ້. ເພິ່ນຍັງນຳເອົາໂລດຫລານຊາຍຂອງຕົນແລະຊັບສົມບັດຂອງລາວ ພ້ອມທັງພວກແມ່ຍິງ ແລະຄົນອື່ນໆກັບຄືນມາດ້ວຍ.
ເຈົ້າເມຄີເຊເດັກອວຍພອນອັບຣາມ
17ເມື່ອອັບຣາມກັບຄືນມາແຕ່ສູ້ຮົບ ແລະຊະນະເຈົ້າເຄໂດລາໂອເມ ແລະພັນທະມິດ; ກະສັດແຫ່ງນະຄອນໂຊໂດມກໍອອກມາຕ້ອນຮັບເພິ່ນຢູ່ທີ່ຮ່ອມພູຊາເວ (ມີຊື່ອີກວ່າຮ່ອມພູຂອງກະສັດ). 18ແລ້ວເຈົ້າເມຄີເຊເດັກຜູ້ທີ່ເປັນກະສັດແຫ່ງນະຄອນຊາເລັມ ທັງເປັນປະໂຣຫິດຂອງພຣະເຈົ້າອົງສູງສຸດ ກໍເອົາເຂົ້າຈີ່ກັບເຫຼົ້າອະງຸ່ນໃຫ້ອັບຣາມ ແລະອວຍພອນເພິ່ນ 19ໂດຍກ່າວວ່າ,
“ຂໍໃຫ້ພຣະເຈົ້າອົງຍິ່ງໃຫຍ່ແລະສູງສຸດ
ຜູ້ສ້າງສະຫວັນ ແລະແຜ່ນດິນໂລກ;
20ຈົ່ງຫັນມາອວຍພອນໃຫ້ອັບຣາມເຖີດ
ສາທຸການແດ່ພຣະເຈົ້າຜູ້ໃຫ້ຊະນະເຫຼົ່າສັດຕູ.”
ແລ້ວອັບຣາມກໍໄດ້ຖວາຍໜຶ່ງສ່ວນສິບໃນສິ່ງຂອງທັງໝົດ ຊຶ່ງເພິ່ນໄດ້ມາຈາກການສູ້ຮົບນັ້ນ ໃຫ້ແກ່ເມຄີເຊເດັກ.
21ກະສັດແຫ່ງນະຄອນໂຊໂດມກ່າວແກ່ອັບຣາມວ່າ, “ເຈົ້າຈົ່ງເອົາສິ່ງຂອງເຫຼົ່ານັ້ນໄປເຖີດ ຂໍສົ່ງຄົນຂອງເຮົາທັງໝົດຄືນກໍພໍແລ້ວ.”
22ແຕ່ອັບຣາມຕອບວ່າ, “ຂ້ານ້ອຍສາບານໄວ້ຢ່າງເຄັ່ງຄັດ ຢູ່ຊ້ອງໜ້າພຣະເຈົ້າຢາເວພຣະເຈົ້າຜູ້ສູງສຸດ ພຣະຜູ້ສ້າງສະຫວັນກັບແຜ່ນດິນໂລກແລ້ວວ່າ, 23ຂ້ານ້ອຍຈະບໍ່ເອົາສິ່ງໃດສິ່ງໜຶ່ງທີ່ເປັນຂອງທ່ານ ແມ່ນແຕ່ດ້າຍຫຍິບ ຫລືສາຍຮັດເກີບເສັ້ນໜຶ່ງ ເພື່ອທ່ານຈະບໍ່ກ່າວວ່າ, ‘ແມ່ນເຮົາທີ່ເຮັດໃຫ້ອັບຣາມເປັນຄົນຮັ່ງມີ.’ 24ຂ້ານ້ອຍຈະບໍ່ຮັບສິ່ງໃດເລີຍ ເວັ້ນໄວ້ແຕ່ສິ່ງທີ່ຄົນຂອງຂ້ານ້ອຍໄດ້ໃຊ້ໄປແລ້ວ ແລະສ່ວນທີ່ເຫຼືອນັ້ນ ຈົ່ງໃຫ້ພັນທະມິດຂອງຂ້ານ້ອຍແບ່ງປັນກັນສາ ຄື: ອາເນ, ເອັດຊະໂຄນ ແລະມຳເຣ.”
Jelenleg kiválasztva:
ປະຖົມມະການ 14: ພຄພ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ 2012 United Bible Societies. All Rights Reserved.
