Lii Lolo dhu Uru Tèka 17
17
Ama Lamatua paꞌèki lii pajaji dènge Abram dènge tadha suna
1Ropa umur Abram dꞌai 99 (ceo nguru ceo) tèu, LAMATUA mai padꞌelo iisi dènge ne. Ka Na peka dènge Abram, aku Nèngu na, “Jaꞌa ne, Ama Lamatua dhu Koasa Risi Eele. Èu hudꞌi madhutu taruu dadꞌèi Jaꞌa, dènge jꞌara mamuri èu hudꞌi mola. 2Jaꞌa neo paꞌèki lii pajaji dènge èu. Aa Jaꞌa neo pabèba kacanga ana-èpu èu.”
3Hèia Abram patitu kètu urutuu, ka na pacudꞌu kètu dꞌai rai. Ka Ama Lamatua tuhu hari lii padhai lii Na, aku Nèngu na, 4-5“Lii pajaji Jaꞌa dènge èu sèmi neꞌe ka: èèna na, èu jꞌajꞌi bèi-baki nèti suku ae-ae. Nèti èèna ka, èu pake ia ka ngara èu Abram (dhu sasoa na ‘ama dhu dhèu tadhe’), te ngaa Abraham (dhu sasoa na ‘bèi-baki nèti suku ae-ae’). 6Jaꞌa neo pabèba kacanga ana-èpu èu ae-ae. Jaꞌa pajꞌajꞌi si suku ae-ae. Aa Jaꞌa dedꞌe dhèu aae ae nèti rèngu sèra.
7Jaꞌa sanèdꞌe taruu lii pajaji Jaꞌa dènge èu, aa dènge ana-èpu èu sèra. Lii pajaji ne maꞌète boe toke taa-taa, lula Jaꞌa neꞌe ka Ama Lamatua nèti èu dènge ana-èpu mu. 8Rai Kanaꞌan ne aaꞌi-aaꞌi, bèli-camèdꞌa Jaꞌa hia mi èu dènge ana-èpu èu. Neꞌe ne, èu dhoka pea manubha di ètu neꞌe. Te ngaa èèna na, jꞌajꞌi mi unu ana-èpu èu toke taa-taa. Aa Jaꞌa jꞌajꞌi Ama Lamatua rèngu sèra kahèi. 9-10Te ngaa èu dènge ana-èpu èu sèra, hudꞌi kèpe paꞌèra lii pajaji ne, dènge dꞌara kateme ku. Dhèu mone aaꞌi-aaꞌi ra, hudꞌi suna ku. 11-13Neꞌe ne, mone aaꞌi-aaꞌi hudꞌi suna, mulai nèti umur aru lodꞌo. Aꞌari èu, dhèu-dhèu sabꞌa èu, dènge ènu dhu èu hèli more nèti rai leo, aaꞌi-aaꞌi ra hudꞌi suna si. Suna na jꞌajꞌi tadha mi ngiꞌu miu, dhu paꞌèki èdhi taa-taa. 14Mone mia dhu suna boe, rèngu sèra maso boe ètu dꞌara lii pajaji Jaꞌa ne, aa rèngu sèra jꞌajꞌi boe dhèu Jaꞌa kahèi.”
15Èle èèna ka, Ama Lamatua peka hari, aku Nèngu na, “Nèti deo neꞌe ne, èu paroa ia ka ngara dhèu èmu mu Sarai, te ngaa Sara. 16Èèna na Jaꞌa hia mamèngi ae-ae mi Sara, sèna ka nara iisi hia èu, ana mone ca dhèu. Tareꞌa! Bèli-camèdꞌa, Sara jꞌajꞌi bèi nèti suku ae-ae. Aa èèna na, Jaꞌa dedꞌe dhèu aae ae-ae nèti ana-èpu nèngu.”
17Hèia Abraham patitu kètu urutuu ka pacudꞌu kètu dꞌai rai. Te ngaa na mari ètu dꞌara. Na pangee, na, “Mone heka bhora dhu cangasu tèu sama sèmi jaꞌa ne, bisa abhu ana era? Aa Sara dhu heka gagoo-gagehu ne, dhu ceo nguru tèu kèna, nara iisi hari sa mia?” 18Ka na peka dènge Lamatua, aku nèngu na, “Hudꞌi ka laa, Ismael ka dhu abhu pusaka jaꞌa èèna ka, ngaa-ngaa tao boe.”
19Te ngaa aku Ama Lamatua na, “Aadꞌo sèmi èèna! Bèli-camèdꞌa, dhèu èmu mu Sara, nara iisi ana mone ca dhèu. Pangare ne Isak. Lii jaji Jaꞌa ne, lèke mi nèngu dènge ana-èpu na toke mia-mia. 20Jaꞌa tadèngi le ngaa dhu èu manèngi kahèi, hia Ismael. Nèti èèna ka, Jaꞌa hia berkat mi nèngu kahèi, aa hia ana-èpu na tabha ae. Bèli-camèdꞌa ana-èpu Ismael ne, jꞌajꞌi mi canguru dua kapala suku. Aa ana-èpu na suku èci dhu kapai. 21Masi ka sèmi èèna, lii pajaji Jaꞌa ne, lèke dhoka mi ana mu Isak di. Tèu mai ni, hèru sèmi neꞌe kahèi, Sara nara iisi le.” 22Ropa padhai lii nare, ka Ama Lamatua tèke eele Abraham.
23-27Lodꞌo èèna kahèi, Abraham tao dènge ka, madhutu sèmi lii paredha Ama Lamatua. Ka na suna. Na suna ana na, Ismael, dènge dhèu mone aaꞌi-aaꞌi dhu pea dènge ne. Lodꞌo èèna, umur Abraham 99 (ceo nguru ceo) tèu le, aa Ismael 13 (canguru tèlu) tèu.
Jelenleg kiválasztva:
Lii Lolo dhu Uru Tèka 17: nfaNTPO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2012, Wycliffe Bible Translators, Inc. All rights reserved
