Matthew 10

Chin nannakhan Hesus chin himpolo ta chugwa an apostol na

1Enajakhan Hesus chin himpolo ta chugwa an adalana ja inchatana chicha hi apfalinan an mangpakak hi napukhit an ispiritu an khun mehoꞌlong. Inchat na khu hay apfalinan cha an mangpatenong an amin hi chokhoh. 2Ja hay hato chi ngachan hay hachi himpolo ta chugwa an nginadnana hi apostol. Chin nahhun ja hi Simon an nangadnan hi Peter, ja hi Andrew an akhi na, ja hi James an empfalay Zebedee, ja hi John an akhi na, 3ja hi Philip, ja hi Bartolomew, ja hi Tomas, ja hi Matthew an chin khun munhenger hi pakha, ja hi James an empfalay Alfeus, ja hi Tadeus, 4ja hi Simon an oha an Zealot, ja hi Judas Iskariot an hijay mangngina ay Hesus. 5Hennag Hesus hay hato himpolo ta chugwa ja hijah tay chi imbilina an inali na ay chicha hi, “Achi aju umuy hana pfuglay chi Hentil ja achi aju khu umuy hana pfuglay chi Samaritan. 6Hay pahhunon ju gwot niꞌ an omajan ja hana gwachaan hachi holag Israel an amat cha hi karnero an na-utaw. 7An amin chi omajan ju ja mangaskasaba aju ja allon ju hi, ‘Achi mapfajag hot machakngan hini Pun-ap-apugwan Apo Jos hi tatakhu.’ 8Epatenong ju hana mumpunchokhoh, ja tinakhu ju hana natoy ja akhahan ju khu hana na-unit, ja pun-epakak ju hana napukhit an ispiritu an nun-ehoꞌlong. Ja achi aju mumpapfajad, ti agkhuy ju pfinajachan hitay apfalinan an nichat ay chaꞌju. 9Achi aju mun-ochon hi pihu, 10ja hape-eng. Achi aju mun-ochon hi hay pun-orkhan ju ja hay hapato ja hay pfunguhan. Ti an amin hana muntamu ja kalintikhan cha an omagwat hana mahapor cha ay ni takhu an piꞌtamuwan cha.

11Nu omatam aju ay ni ohan pfuglay ja tikhan ju hay takhu an mamhod an mangajakhan ay chaꞌju, ja meꞌheto aju ay hija ingkhana hi akakan ju ay nuy an pfuglay. 12Nu humikhop aju ay ni pfalay ja allon ju hi, ‘Pomhod hini piꞌtakhuwan ju an nunheto ay tay an pfalay.’ 13Ja nu hini nunheto ay ni pummangiliyan ju ja apfuluton cha hitay allon ju hot pomhod cha. Muti achi cha ayya apfuluton hot mumpfangngad hini bindisyon ay chaꞌju. 14Ja nu khulat ta hana tatakhu ay nuy an pfuglay ja achi chaꞌju podhon an mangiliyon ja achi cha egngor hini itudtuchu ju, ja pumpuꞌpu-an ju hay chapor an nep-ot ay ni chapan ju hi akakan ju ay nuy an pfalay wenno pfuglay.#10:14 Aton cha hitay ta panginnilaan an taynan cha hana tatakhu ay chuy an pfuglay ta un cha ikhad, ja hugijon Apo Jos chicha khapo hi achi cha pammatiyan ay ni hapit na. 15Umannung hitay alloꞌ ay chaꞌju an umali ayya hini arkhaw an Panugijan Apo Jos hi tatakhu, ja machamchamot hini dusan hana tatakhu ay nuy an pfuglay mu hachi tatakhu ad Sodom ja Gomorah an khenhob Apo Jos chin timpon Abraham.

16Tan pfaaloꞌ chaꞌju an amat hi naꞌna-unnud an karnero an umuy hana achaan chi tatakhu an amat hi mun-apfungot an khenger. Hotti manomnom ja maꞌma-ulloy aju koma. 17Tikhagwun ju, ti gwacha mangkay hana tatakhu an pfumuhur ay chaꞌju. Ijuy chaꞌju hana hugi ta echalom chaꞌju, ja ipahuplit chaꞌju hichi sinagoga. 18Ja ijuy chaꞌju hana gobernador ja ar-ari khapo hi immunuchan ju ay ha-in. Ja hinuy chi timpo an puntihtikhuwan ju ay chicha ja hana Hentil ay ni hapit u. 19Nu echalom chaꞌju ja achi aju madanakhan hi hay allon ju an ehongpfat ju ay chicha. Ti ay nuy an timpo an humanguwan ju ja ituchun Apo Jos hay ehongpfat ju. 20Ti pfu-un chaꞌju ja angkhay chi munhapit, an hini Espiritun Apo Jos chi mangchalan ay chaꞌju. 21,22Ay nuy an timpo ja pfuhulon chaꞌju an amin hi tatakhu khapo ay ni nangunuchan ju ay ha-in. Hana uchumna ja anong un hana a-akhi cha ja epfaag cha hana ap-apo ta patajon cha. Amat khu hina chi aton ni oha an ammod hay empfalay na. Ja hana ungunga, chuꞌkhon cha hana a-ammod cha ja empapatoy cha chicha. Muti hana mangedpor hay hato ingkhanah atajan cha an achi cha epfot hini pammati cha, ja miꞌtakhu cha. 23Nu palikhaton chaꞌju ay ni oha an pfuglay ja lomajaw aju ta umuy aju ay ni oha. Umannung hitay alloꞌ, an achi ju pachaꞌpuhon an lawlagwon an amin hana apfuglapfuglay ad Israel hot umali hini arkhaw an pumpfangngachaꞌ an Na-ilangitan an Takhu.”

24Ja inalin khu Hesus hi, “Hini mun-ad-achar ja achi nangatngato mu hini mehtolo na. Ja hini takhala ja achi napfagpfagto mu hini apo na. 25Hotti nu ma-apfoholan hini mehtolo, ja nomnomon ni khun mitudtuchugwan an anong un hija ja ma-apfoholan khu. Ja amat khu ay ni himpfut, an ma-apfoholan nu ma-apfoholan hini apo na. Ja ay ha-in an apo ju, ja tayya an ma-apfoholanaꞌ, ti nan allon cha hi un ha-in hi Beelzebul an ap-apon chi napukhit an ispiritu. Hotti achi mehalla an omom-omod an pfuhulon chaꞌju an tatakhuꞌ.

26Hotti achi aju toma-ot ay chicha. Ti an amin hana ililiꞌ-ud cha an aton an achi ma-innila ad ugwani muti gwa han arkhaw an ma-innila chamchama. 27Hotti nu amat heto ja an amin hana inaliꞌ ay chaꞌju ad ugwani an immiꞌ-igway ta-o, ja epagngor jun to hi achaan chi tatakhu. Ad ugwani ja i-am-amu heto unig muti iꞌgwap jun to hichi pfutayna. 28Ja achi aju toma-ot hay hana umali an mamatoy ay ni achor ju, ti ma-id olog cha an mamatoy ay ni lennagwa ju. Eta-ot juwot niꞌ hi Apo Jos an gway apfalinana an mamaꞌ-i ay ni achor ja lennagwa hichi impferno. 29Anila ju an anong un hini chugwa an pfucheng an mahalape, ja ma-id oh-ohha hi makhah ay tay lota nu achi apfuluton Jos Ama. 30Ja anong un hay hana pfuuꞌ ju ja pfinibpfilang na. 31Hotti achi aju toma-ot, ti napfarpfalor aju mu hay hana cho-or an pfucheng. 32An amin hana achi mangpfa-in an mangpa-innila hi nidchuman cha ay ha-in, ja achiꞌ khu ipfa-in chicha an ipa-innila hichi gwachaan Ama ad langit. 33Muti hay hana mangpfa-in ay ha-in hi hangon hana tatakhu, ipfa-in u khu chicha hichi gwachaan Ama ad langit.

34Un chah khemhon ju un hay apanuhan ju chi immaliyaꞌ heto lota? Achi amat heto, ti hitay immaliyaꞌ ja mangchat hi punchichinnuꞌ-ukhan ju. 35Khapo ay ha-in ja chuꞌkhon ni lala-e hinuy ammod na an lala-e, ja chuꞌkhon ni pfupfai hinuy ammod na an pfupfai, ja chuꞌkhon ni na-apo an pfupfai hini ammod ni ahagwa na. 36Hana pfuhur ni ohan takhu an namati ja hana a-akhi na. 37Hini ayya takhu an ot-ottong chi pamhod na ay ni ammod na wenno empfalay na mu hini pamhod na ay ha-in ja achiꞌ ipfilang hi takhuꞌ. 38Ja achiꞌ ipfilang hi takhuꞌ hini achi mami-ug ay ni kros na ta unuchonaꞌ.#10:38 mami-ug ay ni kros na: hay podhona an hapiton ja hodlona hana likhat an umali khapoh pangunuchana ay Hesus anong un hijay chumalat hi i na atajan. 39Ti hini ayya takhu an mangpa-ennongan ay ni piꞌtakhuwana heto lota ja angkhay, ja achi miꞌtakhu ay Apo Jos. Muti hini takhu an man-ug ay ni piꞌtakhuwana heto lota khapo hi pangunuchana ay ha-in, ja miꞌtakhu ay Apo Jos hi ma-id chi pogpogna.

40Hini mangakhamid ay chaꞌju ja inakhamichaꞌ khu. Ja hini mangakhamid ay ha-in ja inakhamid na hi Ama an nannag ay ha-in. 41Hini mangakhamid ay ni profetan Apo Jos khapo ta profeta ja michatan hi lagpfu an hihiya ay ni lagpfun chi ohan profeta. Ja hini mangakhamid ay ni magpong an takhu khapo ta magpong ja michat ay hija hini lagpfun chi oha an magpong an takhu. 42Ja alloꞌ ay chaꞌju an hini takhu an tomolong hi oha an nabnababba an namati khapo hi pangunuchana ay ha-in, anong un himpfahpfahhu hi chanum chi ichat na hi inumona, ja gwachay linagpfu na ay nuy an enat na.”

Jelenleg kiválasztva:

Matthew 10: ifu

Kiemelés

Megosztás

Másolás