Dɨvi sagaa' Evɨramɨ waja kya'na' Gotɨyai Evɨramɨmɨ wɨda' “Lɨka nadɨkwosɨ'dɨka! Nɨmɨ gɨmɨnyɨ mwata tinya'na saabyainyɨbɨsainyɨ gɨmaredaavɨdeinyɨra. Gɨlyɨvɨta naanga gɨzaavɨdeinyɨ.” Kuda' sa' Evɨramɨ Gotɨyarɨ “Nyɨbwaalɨ' nyɨjaadeinyɨ daaka? Kanyɨjaava'gɨzɨ nɨmɨ kabala'mujɨ Elɨyaizai nyɨdaayadei nɨmɨre gɨlyɨvɨta yuya mamaari yadelyɨra.” Mi'na kuda' Gotɨyai wɨdɨna ya' “Elɨyaizai gɨlyɨvɨsa mamaari yadengɨra. Jɨwaalɨ' kaimɨraaya pwai kyawakɨna'gɨzɨ gamɨzai maaradengɨra. Sɨlɨngaamɨnyangɨ jɨlanganaawa! Sɨlɨngaamɨnya kwalaalya warɨka ke'nɨngɨ jɨlanganaawa! Gɨmɨre kaimɨraaya kwalaalya avaaina yɨma'nɨpɨ'dengɨra.” Sara kuda' Evɨramɨ “Gotɨyai nebwi nyɨdɨwa',” yawɨraka wɨlɨmwagara'. Sara kulɨmwagara' Gotɨyai dɨnyɨna ya' “A'mwe sai sara yawɨ'manɨkei dahaa' a'mwe yɨda'maraangei wɨmwaaihɨwe'na dɨwana.” Sara dɨnyɨna yaka Gotɨyai wɨda' “Gɨmɨnyɨ kwaaka Kalɨthɨyadaasɨ gɨmakulaabena kwaaka dava gɨzaave.” Kuda' Evɨramɨ wɨda' “Gotɨyaigɨ, kwaake' nɨmɨre' be yawɨta'na yawɨrɨde'neka?” Wɨdɨna kya' Gotɨyai wɨda' “Jɨlɨkyaawaryara dɨnyɨmakulaama!” Sara wɨdɨna kya' Evɨramɨ sara yɨna ya'. Mi'na makulaabaka bulatamaworipu'na yaka wakɨna ya'. Yuta maalɨkeraavɨ tamakɨna ya'. Yuta pwara pɨlavamarina “Mɨwɨta tɨka nyɨna yaana!” deva sagaa' Evɨramɨ tɨnna wanganna yaka marirɨgalaasɨna ya'. Dɨvidaasɨ nyɨlyai walakya'negaa' nyɨla daavɨna kya' Evɨramɨ pɨgasaai waja ya'nyɨna yaka lɨka yɨna ya'. Mi'na lɨka yɨna kya' Gotɨyai wɨda' “Evɨramɨ, gɨmɨ a'mwe nei jɨma'nadeigɨ sagaa' dɨvaideigɨnyɨ. Dahaa'na mɨ'. Gɨmɨre kaimɨraayara kwaaka pɨbanna wɨna yapɨjɨ saba mwaaibɨ'derera. Kwaaka saba mwaalyara ‘A'mwera kumɨzara wawɨnya nedaayɨpɨ'dera yaadeinaava,’ kadapɨjɨ yɨma'nɨpɨ'derera. Wawɨnya wɨdaayɨpɨ'dera kyapɨjɨ kwarame naanga 400 kwavɨlavojɨ sara yɨkamaangera yɨpɨ'derera. Nɨmɨ karama'mujɨ yɨ gɨmɨre kaimɨraayara ayawɨnna wɨdasaabɨdere. Yɨ gɨlyɨvɨkɨraya kɨnɨjɨ kaanna makabɨna yɨpɨ'dere,” wɨda'. Mi'na kuda' sawɨsa' mena kajɨnna' Evɨramɨ dara wanganake' “Ai, dɨke' mɨwɨsangɨ tɨnnyaba danapɨraala'manɨka!” Kada' Gotɨyai gannya kɨwɨnya' wɨda' “Kwaaka davakɨ sarɨmɨnɨdakaavihɨrɨna yɨhɨzaawevakɨ,” wɨda' Gotɨyai.