Népszerű bibliai igeversek innen: Matius 6

Megosztás

Jadi, tolobih doholu goyapcam Koraja'an Allah huatan kobondaran-Nyo. Somuonyo paca'an ditambahan ko kolai. Ongko lopas nantai, somuo kopontikan kaitn paca'an dionju' ko kaitn jam.

Obai nantai, ari ni'in jangan kuatir mongona'i ari hobu'. Hobu' urusan hobu'. Ado cukup banya' kosusahan dalapm soari pakai' dipikiran.”

“Obai nantai, jangan kuatir mongona'i makatan damo minuman pakai' hidup kaitn. Jangan kuatir mongona'i pakai'an pakai' bukakng-tubuh kaitn. Hidup lobih pontikng doi' pomakatn. Bukakng-tubuh lobih pontikng doi' pakai'an.

Apo watu kaitn bodoa, mansu'cam ko dalapm kamar kaitn, ongko tutupcam lawakng. Bodoacam ko Allah Bopai kaitn inyo ado di tompat tobumbutn nantai. Ongko bayo Allah Bopai kaitn inyo ulih mongotohu'i hal nantai, Sio paca'an moonji'i upah ko kaitn.

Obai nantai, kohonda'nyo kaitn bodoa sama'an ni'in: ‘Bopai koi inyo ado di sorugo, suciam damo Duatn. Datakngcam Koraja'an Duatn. Jadicam kohonda' Duatn di dunia samo sama'an di sorugo.

Onji'icam koi ari ni'in pomakatn socukupnyo.

Amputicam kosalahan koi, samo sama'an koi pan moamputi sotiap urakng inyo bosalah ko koi.

Jangan mombaba' koi ko dalapm poncoba'an apo lopasan koi doi' kuaso jahat. Obai Duatn inyo umputn koraja'an, kuaso agatn komulia'an sampai somanah-manahnyo. Amin’.

Jadi, amputicam boko urakng inyo bulah kosalahan ko kaitn. Obai aman kaitn moamputi sia', ongko Allah Bopai kaitn di sorugo pan paca'an moamputi boko dosa kaitn.

Porotiancam boko burukng inyo trobakng. Sia' kinyo botanam-bocuba', huatan kinyo bohanyi di lakau. Sia' kinyo monyimpatn pomakatn dalapm jurukng. Apo Allah Bopai kaitn di sorugo moonji'i pomakatn oca' sia' ulih hidup. Pasti kaitn jouh lobih borogo daripado boko burukng nantai!

“Jangan mongumpulan kodampuan pakai' diri kaitn di dunia ni'in. Bubu' ongko togar morusa' bando barakng di dunia ni'in. Apotolagi', pongolit ulih mansu' ko tompat ponyimpatan bando barakng nantai ongko mongolitnyo. Apo kaitn gola' mongumpulan kodampuan pakai' di sorugo. Bubu' ongko togar kinyo morusa' bando barakng di sorugo. Pongolit kinyo ulih mansu' ongko mongolitnyo. Obai di mono kodampuan kaitn ado, di santai jam hati kaitn ado.”

“Co mungkitn siku' urakng hulutn bokorojo pakai' duo urakng habakng. Aman io molabuhan hal nantai, io bayo paca'an mongasihi salah siku' habakngnyo apo bonci' agatn inyo siku'nyo. Io bayo paca'an sotia ko siku' habakng, apo kinyo sotia agatn inyo siku'nyo. Ubo nian jam agatn kaitn. Co mungkitn kaitn monjadi hulutn Allah huatan co mungkitn monjadi hulutn kodampuan kaitn.”

Rumput di padakng tumbuh somontaro mo, opat ditota' ongko dicucul, tomansu' boko kombakng bakukng nantai. Apo Allah totap bulahnyo boi'. Pasti Allah paca'an monulukng kaitn lobih daripado rumput huatan kombakng di padakng. Apo kaitn kurakng pocayo!

Apo, timpu kaitn moonju' sumbakan pakai' urakng jaro, labuhan nantai socaro bototapu'. Ongko bayo Allah Bopai kaitn inyo ulih mongotohu'i hal nantai, kinyo urakng bukai. Ongko, Sio paca'an moonji'i upah ko kaitn.”

“Boboi'cam timpu kaitn molabuhan porbuatan boi' inyo sosuai agatn agama. Jangan molabuhan porbuatan nantai di hadapan urakng oca' ditiat sia'. Obai aman kaitn bulah sama'an nian, Bopai kaitn di sorugo kinyo paca'an moonji'i upah ko kaitn obai porbuatan boi' nantai.

“Watu kaitn bolampah, jangan mato-muho kaitn kotiat'an salu'. Boko urakng inyo pompadah boi' molabuhan sama'an nantai. Sia' songajo bulah mato-muho sia' kotiat'an salu' oca' urakng bukai tohu obai sia' tongahan bolampah. Kotakng bondar inyo Aku pandiran ni'in: Sia' udah mondapat upah sia' doi' sosamo monsio. Apo watu kaitn bolampah, tapusi mato-muho agatn minya'i kopala' kaitn sama'an biaso. Ongko, urakng bukai kinyo mongotohu'i obai kaitn tongahan bolampah. Obai Allah Bopai kaitn inyo kinyo kotiat'an inyo ulih moniant hal nantai. Ongko, Sio paca'an moonji'i upah ko kaitn.”