Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Esa ngianjaga (6) mosá á jaí á Pasáka, Yéso ɗáge na Bɛtanía, ka nji nde Lajálɔ, mmbé ɗánjujúkisi ka kukuwa ɗátú kau. Kó, ɗáɓáɔ́mbi kakɛ eea á ɔgɔgɔ, Maatá áɔ̌únaneaga ka mɛja. Lajálɔ ɗátú ka ɓakpa nde ɗáɓáigi kimoci na Yéso. Malía â gǎkɛ ɔbɛɗa ngbanda á nkoki moci nnde ɓáɓɔngisigi ánjá na maya nde ɓáɔɔphana Nadɔ esombi í n'ákpɛ. Áosia ú k'écinji á Yéso, áɔkɔmbɛa ú na sekamɔ̌ akɛ. Endu áotúma na su á nkoki.
Mpɔ, ka ɓagoigi ndea Yéso, ina akɛ Yúda Isikaliɔ́ta, mmbé antɔngande Yéso, áogea, «Ka nyɔngɔ éke nde ɓékésombisi nkoki nde ka imɔna mia isaɔ (300) na gabea á ɓaúki?» Ɗákáyɔngi gǎkɛ ɓó ka nyɔngɔ á ngomi á ɓaúki, ɗátú ndiu ka nyɔngɔ nde ɗátú nkukuɓa. Yɛ, aámbé ɗáokumbaga njombi á imɔna, na bɛɗa kau ka phɔakɛ sasakɛ. Mpɔ, Yéso â gǎkɛ ogea: «Nɗeketani nke ndɔ caa! Nga, agi ɓó ka ɓɔngisiaga esa á úmba ani.» Ɓoɓande na ɓaúki esa bui, eme gǎkɛ, kéɓɛku na ɓenu esa bui.

Cɔ, usɛsɛ ángbó á Ɓayúda ɓáɔɔ́ka gea, Yéso ɗátú na Bɛtanía. Kaɓondɔ, ɓáoga kó, nna tɔndɔ ka nyɔngɔ á Yéso, ɗátú gǎkɛ phɔtɔ ka nyɔngɔ á ɔna ka Lajálɔ, mmbé Yéso ɗánjujúkisi ka kukuwa. Ɓagbɛga á ɓatoɓeigi-phɛ́a, ɓâ phɔtɔ obisa moangɔ á mowa á Lajálɔ. Nga, Ɓayúda ɓásii ɗáɓěɗu ka nyɔngɔ á Lajálɔ, ɓáomɓeekea Yéso.


Mama í, usɛsɛ ángbó á ɓakpa ɓunde ɗáɓákiɗi ka jaí á Pasáka ɓáɔɔ́ka gea, Yéso aobika na Yɛusalɛ́ma. Ɓâ gǎkɛ ɔbɛɗa kasa á mbia, ɓáoga omɓondeaga ka ngba, na ɓáɔyɔnga k'ɛ́sɔ akpɛ te: «Obebɔ ka Mokonga! Ambe Mokonga ábisɛ njaga akɛ gǔ á mmbé abiki k'ína á Mɔkɔta! Mokonga ábisɛ njaga akɛ gǔ á moamɛ ndea Ɓaisilaɛ́li!»
Wa, Yéso áondonda miki á mponda, áokambea gǔ akɛ, ɓíndɔ ɗáɓáɗundu suɓi á Ɓuku á Mokonga gea:
«Ɓato á ka Sayúni, ɓókóɓangɛmbɛ!
Moamɛ nɛnu abiki,
Akǎmbi gǔ á miki á mponda.»
Ɓagoigi nɛkɛ ɗáɓákáengekisi phɔ́ kema ndɔ. Ɓî Mokonga ɗántáisi gǎkɛ Yéso ka ɓoombia, mpɔ ɓáokanisia nyɔngɔ nde ɗáɓáɗundu ka phɔakɛ, n'índe ɓakpa ɓásii ɗáɓátɔtɔkisi ka phɔakɛ.
Cɔ, usɛsɛ á ɓakpa nde ɗáɓátú na Yéso mbenɔ nde ɗámɔphani Lajálɔ suɓi á bóta ka jujúkisa akɛ sɔsɔɓɛ á ɓasí, ɓɔ ɓáunge ɗáɓáɔtɔmiaga nnde ɗáɓáɔni. Kaɓondɔ unge, usɛsɛ á ɓakpa ɗáɓábiki omɓondeaga, ka nyɔngɔ nde ɓakpa ɗáɓáɔ́ki gea, yɛ aámbé ɗátɔtɔkisi mphangiɔ á ketangaɔ ndɔɔ. Ɓaphaisáyɔ ɓâ gǎkɛ ɔyɔngaga sɔsɔɓɛ aɓɔ gea: «Cɔ, ɓɔɔni? Ɓéké ye ɔtɔka ka kema nga, ɓakpa ɓɔbu ɓámɓi.»

Cɔ, ka Ɓagiíki ɗáɓátú sɔsɔɓɛ á ɓunde ɗáɓábiki ka Yɛusalɛ́ma, k'aphe á ɗokomisa á Mokonga, ka mbenɔ á jaí á Pasáka. Ɓɔ, ɓáɔnsɛkɛɗɛa Philípɔ, nto á Bɛtɛsaída á ka Galiláya. Ɓáongea: «Mɔkɔta, ɓekondi ɓɛ́mɔnɛ Yéso.» Philípɔ áoga ongoɗea Andeé, mpɔ ɓɔbu ɓaɓɛ ɓáoga ongoɗea Yéso. Yéso áǒsikisia te: «Cɔ, mbenɔ ajú ye tɔ, nnde Mokonga anɗokomisande Muna-Nkpa. Nenóngoɗi ɗoni gea, mbuka á nganɔ a tɔ ojiga sasakɛ ámbé kágumbɛ ka oɗo na phoa. A ye gǎkɛ ogua ka oɗo na phoa, áɔgɔmbisa mbuka ásii. Nkpa nde akondi amba á enda akɛ, aɓúngisande. Mmbé gǎkɛ aokangea enda akɛ ka mokonda nde, aámbaeka enda ndɔ mɛyɔ. Kaɓɛ nkpa n'akondi bɛɗaneagani ambe ámoɓeɛ. Ɔma nde ne ɓei, aunge mbɛɗanigi nɛmɔ aɓande phɔtɔ. Abɛ anɗokomisande mmbé aɔmɔbɛɗaneaga.

Cɔ, kɛ̌kɛnde měma ani aágátani. Neyɔngande kema sina? Neyɔngande, Abɛ, komoɗeketeɛmbɛ ka tambaga á mbenɔ ndee. A ndiu ka nyɔngɔ índɔ unge nebiki kau ka mbenɔ ndee. Abɛ, ɗokomisa ina akɔ.» Mpɔ, ɛsɔ áɔɔ́kɛkana n'atóki na koba gea te: «Ne yé ɗokomisi na neɗokomisande goto.» Usɛsɛ á ɓakpa ɓunde ɗáɓátú wa, ɓî ɓáɔ́ki ye ɛsɔ ndɔ, ɓáogea: «Ande ɓáoka á mbua.» Ɓunɛngbo ɓáogea: «Malaéka aámbé ɗáyɔngigi na yɛ.»
Yéso â gǎkɛ ǒsikisia: «Nna ka nyɔngɔ ani unge ɛsɔ ndɔ aɔ́kɛkani, a ndiu ka nyɔngɔ anu. Kɛ̌kɛnde unge Mokonga atenande nyɔngɔ á ka mokonda. Kɛ̌kɛnde, amɓeagande phɔtɔ moamɛ á ka mokonda ndee. Eme gǎkɛ, mbenɔ nde ɓámotáisande ka mokonda nde, něɓoteande ɓakpa ɓɔbu.» Yéso ɗáyɔngi ɓó ka úbisa á etéte á kukuwa nde akuwande.
Cɔ, usɛsɛ á ɓakpa ndɔ, ɓáonsikisia ɓe: «Ɓuku ɛ́ɔphi asongoɗi gea: ‹Kiísito aendande mɛyɔ.› Cɔ, ɔyɔngi gea, ɓántáisande Muna-Nkpa ka ɓo? Muna-Nkpa ndɔ, ande ani?» Yéso áǒngoɗea: «Owanga a phɔ́tɔ sɔsɔɓɛ anu ka mbenɔ ábɔa. Tambani ɓî ɓo phɔ́tɔ na owanga, ka gea, kaiphiɔ kanódondɛmbɛ kángá á ɓá na mosenda í. Nga, nkpa nde aotamba ka kaiphiɔ, nnaoúba ɔma nde aoga. Cɔ, ɓî owanga a phɔ́tɔ sɔsɔɓɛ anu, ɓeekeani tɔ wa ka gea, ɓóɓɛ ɓakpa ndea owanga ndɔɔ.»
Mbusa á yɔnga akɛ ɓó, Yéso áoga, áɔ̌sɔmɛana ɗanga na usɛsɛ á ɓakpa ndɔɔ.

Nanga ɓî Yéso ɗátɔtɔkisi ketangaɔ ásii mosá aɓɔ, ɗáɓákámɓeeki. Ɗáɓági ɓó ka gea, nyɔngɔ nde Isáya mɔtu-nyɔngɔ ndea Mokonga ɗáyɔngi gea:
«Mɔkɔta, ani mmbé aɓeeki ɓoabi nɛsu?
Ani mmbé, Mɔkɔta amphangi ɓukpɛkpɛ nɛkɛ?»
Isáya ɗáyɔngi phɔtɔ, ka nyɔngɔ éke nde ɓakpa nde ɗáɓákátɔki ɓeekea,
ɗáebisi ɓakeíme-íme,
â phɔtɔ obisa měma aɓɔ akpɛ
ka gea, ɓákaɔnaphɛmbɛ,
ɓákaúbaphɛmbɛ.
Ka nyɔngɔ índɔ unge Mokonga ɗági gea,
ɓákaepháiɛmbɛ kuɓî nɛɔ,
ka gea te, néamisɛ.
Isáya ɗáyɔngi ɓó nga, ɗáɔni ɓoombia ndea Yéso, áɔyɔnga gǔ akɛ. Nanga ɓó, ɓakɔta á Ɓayúda ɓásii, ɗáɓámɓeeki Yéso. Ɗáɓáeɓangi gǎkɛ Ɓaphaisáyɔ. Kaɓondɔ unge, ɗáɓákáyɔngi base ka gea, Ɓaphaisáyɔ ɓákáeɓeɛgɛmbɛ k'éndu á madondanɔ ndea Ɓayúda ka nyɔngɔ á Mokonga. Nga, ɓakɔta ndɔ ɗáɓáokonda obebɔ ndea ɓakpa, kɔnyɛ́nya nnde atóki ka Mokonga.

Cɔ, Yéso ɗáengoɗi ɓakpa k'ɛ́sɔ akpɛ gea: «Nkpa nde amoɓeeki, kámoɓeeki tɔndɔ eme, amɓeeki phɔtɔ mmbé amoteki. Mmbé amɔɔni, amɔni phɔtɔ mmbé amoteki.
Eme, nebiki ɓea owanga ka mokonda. Mmbé amoɓeeki, káikɛku ka keiphe. Kaɓɛ nkpa n'aɔ́ki ɓɔphɛi nɛmɔ na káambi, nna gǎkɛ eme aámbé netenande nyɔngɔ nɛkɛ. Nga, ɗébiki ka amisa á ɓato á ka mokonda, nna ka tena á nyɔngɔ nɛɓɔ. Nkpa nde amoyé, na nnaoɓeekea nyɔngɔ nɛmɔ ɓátenaeka nyɔngɔ nɛkɛ akpɛ. Nyɔngɔ nde ɗéyɔngi aunge, atenaeka nyɔngɔ akpɛ k'ésa á sungiaga á mokonda. Kɛ́yɔngi ka kɔkɔta nɛmɔ. Abɛ, mmbé amoteki, aámbé amososi ndiu nyɔngɔ bui nde akeni nɛ́tɔ̌miɛ ɓakpa, na goisaga aɓɔ ně. Neoúba gea, nyɔngɔ ndɔ amososi, aunge aǒɓopha ɓakpa enda á mɛyɔ. Ne gǎkɛ tɔ ɔyɔnga ɓíndɔ Abɛ amososi.»

Hallgasd meg Yoáni 12