San Juan 12
12
Baroob Li perfum guiaꞌ Jesús
(Mt. 26:6‑13; Mr. 14:3‑9)
1Za xhoꞌp dxej riaadx gal pascw, chi we Jesús Betania, lod zojb Lazr, xin basbanman. 2Ni been reeman tijb guialraw par xche ni gudawnë reeman Jesús. Mart guleꞌc guialraw guin, guiáad Lazr na̱j tijb bén gurenë laa reeman xan mex. 3Dxel cwaꞌ Li cost garol lijtr perfum ni lasajc wayëjx, najcchaawnën ganax nardo, baroobimin guiaꞌ Jesús abiꞌ bacwiidxnë guidxguijquimin. Guidibczi lënü guin baree nejxh. 4Dxel Judas Iscariote, xin na̱j tijb ree xbejn Jesús, xin bayü laaman, rëbix:
5―¿Chexc ad gudoꞌt perfum guin? Zagdxeli nidoꞌn ziꞌct rüjn tijb bejn gan tib ijz, din nüjnan yudar bénprob ree.
6Ad guial yuꞌtix xgab bénprob guin ree zeel rëbix zian, rëbix zian guial najx xin gubaan. Abiꞌ guial laax naaz bols yuꞌ milia, rbanx ni rudëë reeman rguꞌchaawix. 7Dxel rëb Jesús lojx:
―Guzujr biinan. Ma badxeꞌxgajm naj perfum guin par chi guidxin dxej guiguieꞌchan. 8Din bénprob guin ree zianczi zaꞌnë reeman lëjt, per naj ad ziantczi gazunëꞌn lëjt.
Bayaꞌn reeman diidx gugüjt reeman Lazr
9Bén guixiuj bén Israel gogbee zaꞌ Jesús Betania, abiꞌ wej reeman yagaj, ad par guguiaatzi reeman Jesús, në par guguiaa reeman Lazr, xin basbanman. 10Zeel bayaꞌn ree bixhioz rniabee diidx guial në Lazr gugüjt reeman. 11Din por laax dád zien ree bejn cayrii loj reeman, abiꞌ caliladx reeman Jesús.
Bagajpdioz ree bejn Jesús ziꞌc rey
(Mt. 21:1‑11; Mr. 11:1‑11; Lc. 19:28‑40)
12Chi bareguiaal, zien daꞌt ree bén zë lanij pascw Jerusalén gogbee guidxin Jesús yagaj, 13dxel cwaꞌ reeman zijn, brii reeman bigchaagloj reeman laaman, rbidxaꞌ reeman rëb reeman:
―¡Benzaꞌc bendxoon na̱j Dios! ¡Nüjnleꞌman Bén guxhaalaman! ¡Nüjnleꞌman bén na̱j rey Israel!
14Bidxaagloj Jesús tijb burdoo, abiꞌ gudxibaman laab, persi gojc ziꞌc ca loj xtiidx Dios lod rëb:
15Bén Sión, ad rdxebidi.
Gol baguiaa, laa xreydi zëëd,
dxiibaman tijb burdoo.
16Yaloj ad bigniaꞌt ree xbejn Jesús ni cayajc. Per chi ma bayëꞌpaman xanyabaa, dxel bigniaꞌ reeman guial zian ca loj xtiidx Dios xcwentaman, zeel gojc zian.
17Bén guzu ree con Jesús chi guredxaman Lazr din yariix lën baa, basban tëëman laax loj ree bengüt, rusnuu rü reeman diidx loj ree bejn ni baguiaa reeman. 18Zeel zien ree bejn brii bigchaagloj laaman, guial gogbee reeman milagr beenman. 19Dxel rëb loj lasaꞌ ree bénfarisew:
―Gol baguiaa nial graczi bejn zinal laax, achetri zajc yaguieen ree.
Yuꞌ ree bén grieg raguiil Jesús
20Loj gra ree bén we lanij bignajchiꞌ reeman Dios Jerusalén, noꞌch bëlzi ree bén grieg, 21gubig reeman loj Felip, bén za guiedx Betsaida, ni rigaꞌ niz Galilea, guzajc reeman liaadx rëb reeman:
―Dad, rayënan yaneenëꞌn Jesús.
22Abiꞌ wej Felip biguiedxaman loj Andrejs, dxel wej grop reeman bicojn reeman Jesús. 23Badxiꞌ Jesúsan rëbaman:
―Ma bidxin hor par Bén guxhaal Dios, guiëtaman abiꞌ yabanman. 24Diidxliczi rnin, ziꞌc tijb xob bal idan chuꞌ luyuj najz najn tijbzi, per bal chuꞌn luyuj zajcxhiejn. 25Bén ru mazri xgab naabzi por guialnaban yuꞌ loj guidxliuj guie, yuꞌ dxej gunijtaman laan, per bén ru mazri xgab güünman ziꞌc rën Dios, xhietëëz sacaman, zajpaman guialnaban tiblayaa con laaman. 26Bal chu rën güün ni rënan guidnalaman naj, lod gazun, nëgajcaman su. Bén güün ni rënan, guiën da Dadan laaman.
Rugojn Jesús guial guiëtaman
27Rëb tëë Jesús:
―Dád yuꞌn xgab. ¿Xhie guiën? ¿Zën ya: “Dad, babëë naj loj ni gazaagdiajn”? Per ad zëtan zian, din par zian zialan. 28Dad, balüü xguialrniabeel.
Dxel biguien chaꞌ bejn xanyabaa rëbaman:
―¡Ma balü da guialrniabeen, per gulünan stijb!
29Riguiejn ree bén rigaꞌ yagaj, zeel rëb reeman:
―Guziaawan guridxaꞌ.
Per yuꞌ reeman rëb:
―Tijb anjlan gunee laaman.
30Dxel rëb Jesús:
―Ad por najtan biguien chaꞌ bejn, por lëjtan. 31Ma bidxin dxej gac guialguxtis loj guidxliuj, yan yarii bén rniabee lojn. 32Per chi guilies reeman naj ya loj guidxliuj guie, dxel guiꞌt graloj bejn lon.
33Zian basigniaꞌman xhienaag guiëtaman. 34Badxiꞌ ree bén guinan rëb reeman:
―Dunujn rayagbee rëb loj ley, Cristo guiban tiblayaa. ¿Chexc zeel nal, rayal guilies reeman Bén zëëd xanyabaa? ¿Chunin na̱j Bén zëëd xanyabaa?
35Rëb Jesús loj reeman:
―Ad zien dxejtri sunë bajl guie lëjt. Gol guza laꞌtgaj zaꞌnëdi bajl guie, chitëë guiniaaz guiaal lëjt. Din bén rza loj xcay, ad ragbeetaman ban cheman. 36Gol bililadx bajl guie, laꞌtgaj zaꞌnëdan, din gaquidi xbejnan.
Chi gulox gunee Jesús zian, dxel baquieꞌchlojman loj reeman.
Ad bililadxt ree bejn Jesús
37Majsi been Jesús zien daꞌt milagr baguiaa reeman, ad bililadxt reeman. 38Zian gojc cumplid ni bacaa Isaías bén badëë xtiidx Dios loj ree bejn, rëban:
Dad, ¿chu ma bililadx ruson radëëdan?
¿Chu loj ma balüü Dios xguialrniabeeman?
39Zianan zeel ad gojct nililadx reeman, din në ze bacaa Isaías:
40Dios basiaaw guiaaloj reeman,
bascajy tëëman xquiarguiejn reeman,
chitëë guguiaa reeman chigniaꞌ tëë reeman,
chitëë yadxiꞌ loj reeman lon, abiꞌ ad zayüntan laa reeman.
41Rëb Isaías zian guial baguiaaman xbiani Jesús, zeel bazaꞌtaman laaman.
42Per niꞌczi zian, dád zien ree bén zojbloj bililadx Jesús. Per ad rëbt reeman loj ree bejn zian, guial rdxeb reeman yabëë ree bénfarisew laa reeman lod ricaagdiajg reeman xtiidx Dios, 43din mazri rën reeman guiën ree bejn laa reeman, guial guiën Dios laa reeman.
Rniee Jesús ziꞌc rniabee xDadaman
44Gunee Jesús rejs rëbaman:
―Bén rliladx naj, ad najtzan rliladxaman, në da Dadan bén guxhaal naj. 45Bén ruguiaa naj, në bén guxhaal naj ruguiaaman. 46Naj na̱j bajl, bialan loj guidxliuj guie, chitëë yayaꞌn ree bén rliladx naj loj xcay. 47Bal chu guien da diidxan abiꞌ ad zuzoobtaman laan, ad najt gudëd laaman casti, din ad bialtan din gudëdan casti, bialan din yabën laa reeman loj dol. 48Bén ad rënt naj ad rucaagdiajg tëëtaman da diidxan, mal yuꞌ ni gudëëd laaman casti: diidx ni rën, laan gudëëd laaman casti chi guidxin dxej. 49Din ad ni rbëguictan rnien. Da Dadan, Bén guxhaal naj rniabee ni ganen ni gulü tëën, 50zeel ragbeen, ni rniabee da Dadan runee guialnaban tiblayaa. Zianan zeel ni rnin rulünan ziꞌc rniabeeman.
Chwazi Kounye ya:
San Juan 12: zas
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2010, Wycliffe Bible Translators, Inc. All rights reserved.