Marqqoosa 15
15
Yesuusa Philaaxoosago kanggida
(Maato. 27:1-2, 11-14; Luqa. 23:1-5; Waha. 18:28-38)
1Wontta gooda ellisii kahinunts hyalaquntsi, cimuntsi, higge asttamaaruntsin firdda shangguntsi ubba shiiqii zorinttida. Unttii Yesuusa accii kanggi Philaaxoosas aatsii inggidda.
2Philaaxoosa eego, «Neenii Ayhudunts kaati?» yaga7i oocida.
Yesuusa mahi, «Ne gayda» yagayda.
3Kahinunts hyalaquntsi Yesuusa gaama bazara mootida. 4Yezin Philaaxoosa mahi Yesuusago, «Nees mahizebaz baa? Unttii neella akko mooto ke7izako bo7oso?» yagayda.
5Yezin Yesuusa mellebaz mahanxi ixxin, Philaaxoosa gaama qoppida.
Yesuusa hyayqqo ga7i firddida
(Maato. 27:15-26; Luqa. 23:13-25; Waha. 18:39-40; 19:1-16)
6Philaaxoosas Faasiga Ba7aale bonchchize qammite asuntsi koyze fettii asi achchappa billize woga yene. 7Ye wode fettii Barbaana gaaze atstse kachchi dentsii shemppo wodhide asuntsara wolla achi keetstsa yene. 8Gaama asuntsi Philaaxoosago yi7i tiinoppa yiizitera gam7ide fana oochchode gaar eza oocida. 9Philaaxoosa asuntsana mahi, «Taanii yinttis Ayhudunts kaatiza billode gaar koyane?» yaga7i oocida. 10Yinno E ga7idanna, kahinunts hyalaquntsi Yesuusa qanaatii aatsii inggidanno erize gisho.
11Yezin kahinunts hyalaquntsi E gisho Barbaana billode gaar, yentsi shiiqide asuntsi Philaaxoosa woossode gaar asuntsana zorida. 12Philaaxoosa mahi, «Yeezin, yin Ayhude kaati gaazaya wayssa?» yagayda.
13Asuntsi Philaaxoosalla afa uukki, «Masqalalla afa eza suxxo» yagayda.
14Philaaxoosa asuntsago, «Akkoso? E akko iita baz oochchido?» yagayda.
Yezin asuntsi tiinostippa gujjii uukki, «Masqalalla eza suxxo» yagayda.
15Philaaxoosa asuntsana ufayssodes koyi, Barbaana asuntsis billida; yeyzi allanggara Yesuusa garafii, masqalalla afa suxxode gaar aatsii inggida.
Wottaddaruntsi Yesuusa leqqida
(Maato. 27:27-31; Waha. 19:2-3)
16Yinnippa maaqqii, wottaddaruntsi Yesuusa ekkii Piratoriya gaaze Poolis xaaba kanggi, melle wottaddaruntsana ubba fettilla xeegida. 17Mahi zoqo afula eza mayzida; anggatsi zawude giigizii, E ommite gaddida. 18Yinnippa maaqqii, eego, «Ayhudunts kaatizayo saro» yaga7i, kushe dentsida. 19E ommite gufera guuddida; mahi eella cuttida; bunqquntii ees goynida. 20Eza toochidannippa maaqqii zoqo afula eeppa qaarii ekkii, E afultto eza ma7isii masqalalla afa eza suxxodes ekkii kanggida.
Yesuusa suxxida
(Maato. 27:32-44; Luqa. 23:26-43; Waha. 19:17-27)
21Un hyanggitera, Iskkinddirenen Rufoosa aday, Simoona gaaze Qereena sa7a asi, gaxareppa katama ye7izera yellintti, Yesuusa masqala wolqqara toossida.#Rome 16:13 22Yeyzi Golggotta gaaze bessa Yesuusa kanggida. «Golggotta» gaazanna «Omma ota» ga7e. 23Hyargaame fana karbbe gaaze gaalla worqqinttide woyne uzho ga7i ees inggida. Yezin E uzhanxi ixxida. 24Unttii masqalalla afa eza suxxida. Oona akko yellodyezakon ga7i E afultto shagii ixa olida.
25Un masqalalla afa eza suxxize wode wonttappa hyaydzdzii saate. 26Un, «Ayhudunts kaat» yaga7i eza mootize xuufe xaafii gaddida. 27Yesuusara lam77i faanuntsana feta eeppa mizaqi zalara hyankkaya eeppa workkita zalara masqalalla afa suxxida. 28Geeshi Maxaafite, «Iita baz oochchide asuntsara E faydinttida» ga7inttidanna folinttida.#Isa. 53:12
29Ogera aadhize asuntsi Yesuusa leqqii, fa ommito en7izi cazhida; «Zambbay! Xoozze Keetsito lalii hyaydzdzii qamma gidda keexizayo, ne ommito ashsho;#Maz. 22:7; 109:25; Mar. 14:58; Waha. 2:19 30ane masqalizeppa wodhdhii nena ashsho» yagayda.
31Yinnii gaara, kahinunts hyalaquntsi higge tamaarssizuntsara fettilla Yesuusa leqqii, «Melluntsana ashshida, yezin fana ashshodes dandda7oos; 32nuunii bi7i ammanode gaar Kiristtoosa, Isra7eele Kaati, ane masqalappa hyatte wodhdho» yagayda. Mahi melle atto yezin, eera masqalalla afa suxunttiduntsappa eza leqqida.
Yesuusa hyayqqida
(Maato. 27:45-56; Luqa. 23:44-49; Waha. 19:28-30)
33Izippun saateppa dentsii, uddufun saate yellodes sa7ita ubba dhumida. 34Uddufun saate Yesuusa fa qaaltto dhoqi yiizii, «Elohee, Elohee, laama sabaqitani?» yagayda. Yinnii bilitsita, «Ta Xoozayo, ta Xoozayo, tana akkos ashshido?» ga7e.#Maz. 22:1
35Ize eqqide asappa fete fete yinno si7i, «Yikke, Eeliyaasa xeegane» yagayda. 36Yentsi asuntsappa fete woxxii, gurba fuzara caala woyne baazhii; gufe bertstsalla gaddii, «Naagote; Eeliyaasa masqalappa eza ketstsodes ye7odyezako ane bo7oda» yaga7i Yesuusa doonago ushshodes shiishida.#Maz. 69:21
37Yesuusa fa qaaltto dhoqi yiizii uukki, hyayqqida.
38Xoozze Keetstsa suxunttide magaraajita wokkappa sulle gaxa yellodes, lam77i kezii feedhinttii wodhdhida.#Keze 26:31 39Masqalzeppa tiino zalara ize eqqide fettii mato hyalaqize, Yesuusa wayzi hyayqqezako bi7ide wode «Hyay atstse turo Xoozze Na7a» yagayda.
40Yinno hyaakora eqqii be7ize eerats maachuntsi yene. Un gidda Magdela Mayrama, geezze Yayqooban Yoosa intta Mayramiran Salooma yene. 41Yentsi maachuntsi Yesuusa Galila yeze wode eza kaalliduntsanan eza mokkiduntsana mahi Yesuusara wolla Yerusalaame hyanggide melle gaama maachuntsi ize yene.#Luqa. 8:2-3
Yesuusa mooginttida
(Maato. 27:57-61; Luqa. 23:50-56; Waha. 19:38-42)
42-43Sa7ita uguride wode shiiqide asunts gidda bonchchinttide Ayhude shangguntsappa fete, Yoosefa gaaze atstse, Xoozze ka7itumo yo7odanno naagitera yeze, Armmatiyasa katama asi yezay yi7ida. Wonttistte Sambbatas giiginttize qamma maaqqide gisho Yoosefa miinggi Philaaxoosago hyanggi, Yesuusa ahito ekkodes woossida. 44Philaaxoosa Yesuusa hyayqqidanno si7ide wode gaama qoppida; mato hyalaqiza xeegii, «E hyayqqi gam7ida?» yaga7i oocida. 45Philaaxoosa Yesuusa hyayqqidanno mato hyalaqizeppa si7i E ahito Yoosefas inggida. 46Yoosefa moogo afula wonggi; Yesuusa ahito masqalappa ketstsii, afulara xaaxii, shuchchappa woocinttide booza gidda E ahito moogida. Mahi yinna booziti doontte damma shuchchi gol7izi gaddida. 47Magdela Mayramiran Yoosa intta Mayrama Yesuusa ahito un aanne gaddizako be7ine.
Chwazi Kounye ya:
Marqqoosa 15: OydaNTL
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The word for the World Ethiopia