Jona 4
4
Ia Jona e kore tahania ia God
1Ma ia Jona e seko solehana tobana, me kore tahania ia God. 2Me nonginongi vania ia Yawe, me kori vahai de, “Yawe, ia meana vahai tu kori nohaa nau tahuna tu toha nau i veragu ia. Ia vahai u vu ni tangochaku nau mu choho dia i Tasis, rongona inau hanaho hoe o talana vania tinoni, mo teha hanaa na kore kesakesa, me dangaliho na vaisahavi, mo hanaa na pada ruka kode ko vu sau maia na rota. 3Mi tahuna de, Yawe, ko taha chonia hoe na mamaurigu nau, rongona e odo bamu ku mate nau, liungisia tina vahai tu ku mauri nau.”
4Ma ia Yawe e valagu visu vania ia Jona, “?Na hua rongona o vu ni kore hoe?”
5Me dia ia Jona tana tabana levu te laba kae na aso tana vera leho i Nineve, me tohotuu sivo. Me lohoa chikai na vale kau me toha raviravi lalona, me pitua na hua ngeni ba te ke labatia na vera leho nia. 6Ma ia Yawe God e agosia chikai na halo tana puti nia, me poko dato tana vale kau te lohoa ia Jona, me ungasi odoa na vungana ia Jona. Ma ia Jona e sola te mamahela matena na halo nia. 7Mi tana mohomoho putiputi tana dani chikai, me tu laba ia God me sau maia chikai na mike, me hani matea na halo nia. 8Mi bukena te laba kae na aso, ma ia God e sau maia chikai na hurihuri parapara te liu mai na meana te laba kae na aso, me parachia na vungana ia Jona me maravia ke mate kokoma. Ma ia Jona e ngavina ke mate bamu, me kori vahai de, “E talana bamu ku mate nau, liungisia tina vahai tu ku mauri nau.”
9Me tu ia God me gesuaa ia Jona, “?E tihilamu hoe na kore matena na halo nia?”
Ma ia Jona e kori visu vania me kori vahai de, “Mana, nau u tihilana nomu ku kore, me tihilana kolu ku mate.”
10Me kori vahai ia Yawe de, “Ihoe o sola to toba sahata matena na halo de, seisuge o teha hoe chukaa, mo teha morosi taonia me ke ni mauri. E pira dato tovosina tana puti chikai, me mate soha tana putina chikai. 11Mo ko morosia ba hoe na vera leho i Nineve. E tamania liungisia e chikai sangatu me rukapatu toha (120,000) na tinoni tara voo na hua te talana ma na hua te seko, kolu na vanganidira tara toha lalona. Tihilana nomu nau ku pada ngongolia na vera leho i Nineve.”
Chwazi Kounye ya:
Jona 4: mln
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 (active), Wycliffe Bible Translators, Inc. All rights reserved