Pinongurugan 14
14
Minonapul si Abram so si Lut
1Minongolawan poranak nu opat raja, ono yo si Amrapil kiat so Babilunia, si Ariuk kiat so Ilasar, si Kidurlaumir kiat so Ilam om si Tidial kiat so Guyim, 2nu poranak nu limo raja wokon, ono yo si Bira kiat so Sodom, si Birsa kiat so Gomura, si Sinab kiat so Adma, si Simibir kiat so Jibuim, om raja kiat so Bila (intawa Joar). 3Kolimo-limo nu raja oono minugogapi' om minongimpon nu soujar nosiro so gona' Sidim, ingoranan nu ono sono tu nu Raat Matoi. 4Solaid opulu om duo toun nokuasa nosiro nu Raja Kidurlaumir, nga so koopulu po om tolu toun-i linumawan-o sono nosiro so iyo.
5So koopulu om opat toun-i, lumogaa yo Raja Kidurlaumir om raja ginumapi' so iyo ri maid nu soujar nosiro ri mongodoog nu lobuw Ripaim so Asitirot-Karnaim, lobuw nu Jujim so Ham, lobuw nu Imim so Sawi-Kiryataim, 6om lobuw nu Uri so kobubuludan nu Idum, sampai nokologa' nosiro so Il-Paran so isan nu padang pantai. 7Nopupus iri, mululio yo ongo raja iiri so In-Mispat, ono sono tu ingoranan nu Kadis. Nokuasa nosiro pilolongkop nu tana' nu lobuw Amalik om minongodoog nu lobuw Amuri, iri minolak so Ajijun-Tamar.
8Mongimpugo yo sono nu soujar limo raja kiat so Sodom, Gomura, Adma, Jibuim om Bila ri om poputolado yo so gona' nu Sidim, 9mutuda' mongolawan nu opat raja kiat so Ilam, Guyim, Babilunia om Ilasar-i. 10So gona' oono osuang uang maayo, om iya nu mundak raja kiat so Sodom om Gomura mulaiw kiat so putuda'an, kuwai so nosiro noratu so uang iiri, om wokon-i minulaiw so kobubuludan. 11Sinolod sono nu opat raja nomanang iiri onu yo po gonggamon maid nu ingkookan so Sodom om Gomura, om mulaiwo yo nosiro. 12Si Lut, komonakon ni Abram, nga inowit-a nosiro maid nu kiawi' gonggamon niyo ri.
13Nga kuwai ido koyuwan nokolabus minian paabar nu iri so si Abram, lobuw Ibrani ri. Minolak si Abram so obi' nu ongo puun pongusaa'an songapan ni Mamri, lobuw Amuri. Si Mamri om kosusulodan niyo, si Iskol, om si Anir, gapi' ni Abram. 14Norongou-o po ni Abram nu tinongawan komonakon niyo ri, impugo yo sono niyo tolu naatus opulu om walu lobuw moilo mutuda' ri so kobosolagan niyo ri, om torako yo nosiro opat raja iiri sampai so bandar Dan. 15Boogio yo dii ni Abram lobuw niyo ri opat boogian, om lowano yo nosiro alod-alod nosiro ri umpak nu awi sampai nodoog. Tinarak nosiro alod-alod nosiro iiri sampai so Uba umpak so utara nu bandar Damsik. 16Nouli' ya sono koimbagu ni Abram gonggamon-i, si Lut maid nu kiawi' gonggamon niyo, kowoinoyan om wokon po lobuw tinongawan-i.
Binorokatan ni Raja Milkisidik si Abram
17Nodoog-o po ni Abram si Raja Kidurlaumir om raja gapi' niyo ri, mulio yo sono iyo. Somungo yo iyo nu raja nu Sodom so gona' Sawi, iri ingoranan-a nu gona' Raja.
18Mongowito yo si Milkisidik nu baang-baang om sungoi nu anggur dii si Abram. Si Milkisidik oono raja nu Salim om mugogoma'on-a iyo nu imam suat so Kinoringan Sobana ko Opangkat. 19Borokati yo sono niyo si Abram nu,
“Muda-mudaan ong
borokatan-a si Abram
nu Kinoringan
Sobana ko Opangkat,
iri minongurug
nu tana' om langit.
20Royowon-o Kinoringan
Sobana ko Opangkat,
nu nopomanang so ikau
kiat so alod-alod mu ri,”
koo. Noopod iri, taaki yo sono ni Abram si Milkisidik sombaagi' opulu nu kiawi' gonggamon sinolod niyo ri.#Ibr 7:1-10
21Mutongaro yo sono raja nu Sodom-i so si Abram nu, “Oo Abram, olapo yo gonggamon nosolod mu no, nga ulii yo so aku lobuw ku no,” koo.
22Nga sumombuto yo si Abram nu, “Mongibot aku so tiningkuangon nu TUHAN Kinoringan Sobana ko Opangkat, minongurug nu tana' om langit tu nu, 23dai ya su mongalap nu onu-onu songapan mu no, insan soginting pona tingkal intawa sontotok tali nu kasut dai ya su mongalap, su' dai ko koputangar nu, ‘Aku yo su nopokaya so si Abram,’ k'ikau. 24Dai su mongalap ong suat-a so aku kondiri. Ono-ono ya su olapon ku nopakai-o nu lobuw ku no. Nga bang kouna'an ku tu, si Anir, si Iskol om si Mamri, moingin aku ong kaalap nu boogian nosiro,” koo.
Chwazi Kounye ya:
Pinongurugan 14: TomPWPgLgPn
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023 (Active), Wycliffe Bible Translators, Inc. All rights reserved.