Lucas 16
16
Tu̱ꞌun kúnkunuún jie̱ꞌe̱ꞌ musúꞌ ya̱ ntu sátíñú na̱a̱ꞌ‑a
1Jee suni nkachiꞌ tuku Jesús nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ ráa:
―Ni̱yo ɨɨn te̱e kúká ya̱ íyó ɨɨn musúꞌ re̱ꞌ ya̱ nísotíñú‑u nu̱u̱nꞌ rá tiñu sáꞌá re̱ꞌ, jee nxi̱kóñáꞌán ñɨvɨ maa nu̱u̱nꞌ re̱ꞌ ya̱ jiáxínꞌ síkɨ́ sɨ̱ɨ̱ꞌ‑ɨ ya̱ kúmí re̱ꞌ. 2Saájee nkana re̱ꞌ musúꞌ re̱ꞌ vá, jee nkachiꞌ re̱ꞌ nu̱u̱nꞌ‑u: “¿Ná kúvi rá tiñu yaꞌá ya̱ tésóꞌo ni̱ꞌ jie̱ꞌe̱ꞌ nú? Nataji nú kuéntáꞌ nu̱u̱nꞌ ni̱ꞌ jie̱ꞌe̱ꞌ tiñu níso nú, chi nsáꞌ kunisotíñú nú ka̱ꞌ nu̱u̱nꞌ rá tiñu sáꞌá ni̱ꞌ”, nkachiꞌ re̱ꞌ.
3’Saájee ñani iniꞌ maá musúꞌ vá nne̱ꞌyá‑a maáa: “¿Ná kúvi ya̱ saꞌá ni̱ꞌ?, chi kaneeꞌ i̱toꞌoꞌ ni̱ꞌ tiñu níso ni̱ꞌ. Jee ni ntu fesáꞌ ni̱ꞌ kete ni̱ꞌ nu̱u̱nꞌ ñu̱ꞌún, jee retú ka̱ka̱nꞌ ni̱ꞌ kutaꞌviꞌ ni̱ꞌ jee kúkanuun ni̱ꞌ. 4Jíníꞌ ni̱ꞌ ná kúvi ya̱ saꞌá ni̱ꞌ sáva sáá kenta kaneeꞌ i̱toꞌoꞌ ni̱ꞌ tiñu níso ni̱ꞌ, jee sáva koo rá ñɨvɨ ya̱ taji ráa veꞌi ráa kuneeꞌ ni̱ꞌ” nkachiꞌ‑i.
5’Saájee nkana‑a ta ni ɨɨn ni ɨɨn rá ñɨvɨ ya̱ táyáꞌvi ráa nu̱u̱nꞌ i̱toꞌoꞌ xí tiñu‑u, jee nkachiꞌ‑i nu̱u̱nꞌ ɨɨn ya̱ xíꞌnañúꞌún: “¿Na̱ja táyáꞌvi nú nu̱u̱nꞌ i̱toꞌoꞌ ni̱ꞌ?” 6Jee nkachiꞌ ñɨvɨ vá: “Ɨɨn sientúꞌ (100) barril aceite”, nkachiꞌ‑i. Jee nkachiꞌ musúꞌ vá: “Tɨɨn tutuꞌ kuéntáꞌ nú jee kuneeꞌ ntañúꞌún kuitɨꞌ jee tee nú nu̱u̱nꞌ‑u u̱vi̱xiko u̱ji̱ꞌ (50)”, nkachiꞌ musúꞌ vá.
7’Saájee nkachiꞌ‑i nu̱u̱nꞌ inka ka̱ꞌ: “Jee noꞌó, ¿na̱ja táyáꞌvi nú?” Jee nkachiꞌ ñɨvɨ vá: “Ɨɨn sientúꞌ (100) kuꞌvaꞌ trigúꞌ”, #16:7 Yatin 37,000 litro nkachiꞌ‑i. Jee nkachiꞌ musúꞌ vá nu̱u̱nꞌ‑u: “Tɨɨn tutuꞌ kuéntáꞌ nú jee tee nú ku̱mi̱xiko (80)”, nkachiꞌ musúꞌ vá.
8’Saájee nna̱kuetúꞌún i̱toꞌoꞌ xí tiñu vá musúꞌ ntu náaꞌ vá ya̱ nito víꞌí‑i jín rá tiñu sáꞌá‑a. Chi rá ñɨvɨ jiáꞌnu ñujiínꞌ ñɨ̱vɨ́ yaꞌá nito víꞌí ráa ka̱ꞌ jie̱ꞌe̱ꞌ rá tiñu sáꞌá ráa jín ɨɨn inka rá táꞌán ráa, nsú káꞌ rá se̱ꞌya Ndiosíꞌ ya̱ túúnꞌ ñuꞌunꞌ Ndiosíꞌ ánímaꞌ ráa. 9Soo sú rá ñɨvɨ ntu náaꞌ núkú ráa rá nantíñú kumí ráa, soo nuꞌuꞌ káchíꞌ ni̱ꞌ nu̱u̱nꞌ ránoꞌó ya̱ kuatíñú rán rá kúmí rán iniꞌ ñɨ̱vɨ́ yaꞌá sáva saꞌá va̱ꞌa rán jín ñɨvɨ sáva ni̱ꞌi̱nꞌ rán ya̱ tɨɨn ráa Tu̱ꞌun Ndiosíꞌ jee suꞌva saꞌá mániꞌ táꞌán rán, jee sáá nɨꞌɨ rá kúmí rán iniꞌ ñɨ̱vɨ́ yaꞌá, jee nakuatáꞌví ráa ránoꞌó sáá kenta rán nu̱u̱nꞌ nééꞌ Ndiosíꞌ nu̱u̱nꞌ kuneeꞌ rán nɨ́ɨ́nkání.
10’Ɨɨn ñɨvɨ ya̱ na̱a̱ꞌ síkúnkuvi‑i ɨɨn tiñu lúlí jee suni na̱a̱ꞌ síkúnkuvi‑i kue̱ꞌe̱ꞌ tiñu. Jee ɨɨn ñɨvɨ ya̱ ntu náaꞌ‑a jín yakuꞌ tiñu jee suni ni nsáꞌ na̱a̱ꞌ‑a jín kue̱ꞌe̱ꞌ tiñu. 11Jee saáva retú ntu síkúnkuvi na̱a̱ꞌ rán jín rá nantíñú kúmí rán iniꞌ ñɨ̱vɨ́ yaꞌá jee, ¿né ɨɨn kukáꞌnú iniꞌ‑i ránoꞌó sikúnisotínú‑u ránó ya̱ rá yɨ́yáꞌvi víꞌí nijia ka̱ꞌ ya̱ íyó ne̱ antivɨ́ rúja? 12Jee retú ntu síkúnkuvi na̱a̱ꞌ rán jín nantíñú inka ñɨvɨ, ¿né ɨɨn taji nu̱u̱nꞌ ránoꞌó nantíñú sáva kuvi nantíñú maáránú rúja?
13’Ni ɨɨn musúꞌ jee ntu kúvi kɨtíñú‑u nu̱u̱nꞌ u̱vi̱ꞌ i̱toꞌoꞌ xí tiñu, chi taꞌvi iniꞌ‑i kune̱ꞌyá‑a ɨɨn jee kunu̱u̱nꞌ‑u inka, áxí kuneenu̱u̱nꞌ‑u ɨɨn jee kuniichiꞌ iniꞌ‑i inka. Jee saáva ntu kúvi kɨtíñú rán nu̱u̱nꞌ Ndiosíꞌ, jín suni nu̱u̱nꞌ xu̱ꞌún ―nkachiꞌ Jesús.
14Jee sáá nteso̱ꞌo rá te̱e yɨ́ꞌɨ́ ñujiínꞌ fariseo ntáká rá tu̱ꞌun nkachiꞌ re̱ꞌ, jee káꞌánꞌ u̱ꞌvi̱ꞌ ráa néꞌyá ráa re̱ꞌ, chi suviráa vá ñúnúunꞌ víꞌí ráa xu̱ꞌún. 15Jee nkachiꞌ re̱ꞌ nu̱u̱nꞌ ráa:
―Ránoꞌó jee sáꞌá rán nika̱ꞌ ya̱ kúvi rán te̱e na̱a̱ꞌ nu̱u̱nꞌ rá ñɨvɨ. Soo Ndiosíꞌ jee jíníꞌ re̱ꞌ na̱ja jiáni iniꞌ ánímaꞌ rán. Chi rá tiñu ya̱ jiáni iniꞌ rá ñɨvɨ ya̱ yɨ́yáꞌvi‑i nu̱u̱nꞌ ráa, soo nu̱u̱nꞌ Ndiosíꞌ chi maa tiñu néꞌí níváꞌa ví‑i nu̱u̱nꞌ re̱ꞌ.
Tu̱ꞌun tátúníꞌ Ndiosíꞌ jín jie̱ꞌe̱ꞌ na̱ja nátatúníꞌ re̱ꞌ nu̱u̱nꞌ rá ñɨvɨ ya̱ ki̱vi ráa xi̱ntíín re̱ꞌ
16’Tu̱ꞌun ley njia̱ꞌa Ndiosíꞌ nu̱u̱nꞌ Moisés yanaꞌán jín suni rá tu̱ꞌun ya̱ nna̱kani rá te̱e ya̱ njiáꞌa re̱ꞌ maa nu̱u̱nꞌ ráa, jee nte̱ku̱tu̱ꞌún tu̱ꞌun ráa ne̱ sáá nkenta Juan te̱e ya̱ nsi̱kuánuté. Saájee ne̱ sáá nkenta Juan vá, jee nte̱ku̱tu̱ꞌún tu̱ꞌun váꞌa Ndiosíꞌ jie̱ꞌe̱ꞌ na̱ja nátatúníꞌ re̱ꞌ nu̱u̱nꞌ rá ñɨvɨ ki̱vɨ xi̱ntíín re̱ꞌ, jee ntáká ráa núnasɨ́ víꞌí ráa ki̱vɨ ráa xi̱ntíín re̱ꞌ. 17Víjí ka̱ꞌ kɨ̱naanꞌ ɨɨn letra níso nu̱u̱nꞌ tu̱ꞌun ley Ndiosíꞌ nsú káꞌ kɨ̱naanꞌ antivɨ́ jín ñɨ̱vɨ́ yaꞌá réáꞌ sukuán, chi síkúnkuvi Ndiosíꞌ nta̱ká tu̱ꞌun re̱ꞌ.
Xínéꞌénꞌ Jesús jie̱ꞌe̱ꞌ xínóo sayo táꞌán
(Mateo 19:1-12; Marcos 10:1-12)
18’Ntáká te̱e ya̱ xínóo sayo re̱ꞌ ñasɨ́ꞌɨ́ re̱ꞌ, jee natana̱ꞌa re̱ꞌ jín inka tuku ka̱ꞌ ñaꞌan, saájee sáꞌá téní re̱ꞌ. Jee suni ɨɨn te̱e ya̱ natana̱ꞌa re̱ꞌ jín ñaꞌan ya̱ nxi̱nóo sayo yɨɨ́ ña maáña, jee suni sáꞌá téní te̱e vá.
Tu̱ꞌun kúnkunuún jie̱ꞌe̱ꞌ te̱e kúká jín jie̱ꞌe̱ꞌ Lázaro
19’Jee ni̱yo ɨɨn te̱e kúká, jee ñúꞌún re̱ꞌ saꞌma máá váꞌa líꞌí, jee ta ki̱vɨ̱ꞌ kúsɨ́ɨꞌ iniꞌ re̱ꞌ yájíꞌ re̱ꞌ máá neyu váꞌa. 20Jee ni̱yo ɨɨn máá te̱e láꞌví xéénꞌ naní re̱ꞌ Lázaro, jee ña̱na̱ka ráa maa yuvéꞌí te̱e kúká vá, jee ne̱ nchi̱tú ni̱ꞌyɨ xki̱yɨ́ kua̱íyó re̱ꞌ. 21Jee ne̱ ñúkúvi iniꞌ re̱ꞌ kajiꞌ re̱ꞌ ne̱ rá yuchi ya̱ jiétéꞌ yuꞌú mesa te̱e kúká vá. Jee ne̱ rá tinaꞌ nkenta rátíꞌ nu̱u̱nꞌ re̱ꞌ nayuvi rátíꞌ rá nu̱u̱nꞌ ni̱ꞌyɨ re̱ꞌ.
22’Jee suꞌva nkuvi sáá ni̱ꞌi̱ꞌ re̱ꞌ, jee nna̱keꞌen rá najiáꞌáꞌ ííꞌ Ndiosíꞌ maáréꞌ kua̱noꞌonꞌ ráa jín‑i ne̱ nu̱u̱nꞌ íyó Abraham jee nééꞌ‑e xiín re̱ꞌ. Jee suni ni̱ꞌi̱ꞌ te̱e kúká vá jee nse̱ꞌí rá ñɨvɨ ñunéꞌyúꞌ re̱ꞌ. 23Jee kua̱ꞌa̱nꞌ ánímaꞌ re̱ꞌ nu̱u̱nꞌ ñúꞌúnꞌ xéénꞌ nu̱u̱nꞌ íyó ánímaꞌ rá ni̱yɨ, yukuán nóꞌo nasɨ́kuitɨꞌ re̱ꞌ jee nna̱nenu̱u̱nꞌ re̱ꞌ, jee niniꞌ íká re̱ꞌ Abraham jín suni Lázaro nééꞌ‑e xiín Abraham. 24Saájee nka̱najíín re̱ꞌ, jee nkachiꞌ re̱ꞌ: “Tátáꞌ Abraham, kunáꞌví iniꞌ nú nuꞌuꞌ, jee chuichí nú Lázaro sáva chu̱náji re̱ꞌ xi̱ni̱ꞌ xi̱ntíín re̱ꞌ nu̱u̱nꞌ nute, jee xiníkó re̱ꞌ yáá ni̱ꞌ, chi nóꞌo nasɨ́kuitɨꞌ ni̱ꞌ nu̱u̱nꞌ ñuꞌúnꞌ xéénꞌ yaꞌá”, nkachiꞌ re̱ꞌ.
25’Soo nkachiꞌ Abraham nu̱u̱nꞌ re̱ꞌ: “Se̱ꞌya, naku̱ꞌun iniꞌ nú ya̱ nni̱ꞌi̱nꞌ nú rá váꞌa nú sáá ntekuꞌ nú iniꞌ ñɨ̱vɨ́, soo Lázaro chi nni̱ꞌi̱nꞌ re̱ꞌ rá niváꞌa. Soo vitan jee nániꞌinꞌ neí iniꞌ re̱ꞌ yaꞌá, jee noꞌó chi nóꞌo nú. 26Soo suni íyó ɨɨn numaꞌ ya̱ ntu jínu nu̱u̱nꞌ kúnú‑u ya̱ chúmáꞌñu‑u yó, saáva rá ñɨvɨ ya̱ íyó yaꞌá súka̱ꞌ kuíni ráa kua̱jiaaꞌ ráa nu̱u̱nꞌ ránoꞌó i̱ña̱ꞌ, soo ntu kúvi. Sunisaá ntu kúvi kene rá ñɨvɨ i̱ña̱ꞌ kiji ráa nu̱u̱nꞌ ránuꞌuꞌ yaꞌá ranika̱ꞌ”, nkachiꞌ Abraham.
27’Saájee nkachiꞌ te̱e kúká vá: “Retú sukuán íyó, jee jíkánꞌ táꞌvíꞌ ni̱ꞌ nu̱u̱nꞌ nú, tátáꞌ Abraham, ya̱ chuichí nú Lázaro kɨ̱ꞌɨ̱nꞌ re̱ꞌ veꞌi tátáꞌ ni̱ꞌ, 28chi íyó u̱ꞌu̱nꞌ ka̱ꞌ rá ñaniꞌ ni̱ꞌ, sáva stúꞌva ya̱chi̱ꞌ re̱ꞌ ráa sáva ntu jíꞌín ráa kiji yaꞌá nu̱u̱nꞌ íyó víꞌí tu̱nóꞌó xéénꞌ yaꞌá”, nkachiꞌ te̱e kúká vá.
29’Soo nkachiꞌ Abraham nu̱u̱nꞌ‑u: “Kúmí ráa tutuꞌ ya̱ ntee Moisés jín tutuꞌ ya̱ ntee rá te̱e nna̱kani tu̱ꞌun njiáꞌa Ndiosíꞌ nu̱u̱nꞌ ráa ne̱ yanaꞌán. Jee íyó tɨɨn kuéntáꞌ rá ñani nú rá tu̱ꞌun vá”, nkachiꞌ Abraham.
30’Soo nkachiꞌ te̱e kúká vá: “¡Ntu̱ví!, tátáꞌ Abraham. Soo réáꞌ kene ɨɨn ni̱yɨ nteñu rá ni̱yɨ kɨ̱ꞌɨ̱nꞌ‑ɨ nu̱u̱nꞌ ráa, saájee nakani iniꞌ ráa sáá jiáꞌnu ráa”, nkachiꞌ‑i.
31’Soo nkachiꞌ Abraham nu̱u̱nꞌ‑u: “Soo retú ntu tɨɨn kuéntáꞌ ráa tu̱ꞌun ntee Moisés jín rá tu̱ꞌun nna̱kani rá te̱e ya̱ njiáꞌa Ndiosíꞌ nu̱u̱nꞌ rává, jee asúnika̱ꞌ natekuꞌ ɨɨn ni̱yɨ nako̱o‑o kɨ̱ꞌɨ̱nꞌ‑ɨ nu̱u̱nꞌ ráa, suni ni nsáꞌ sijínúꞌ‑u iniꞌ ráa”, nkachiꞌ Abraham ―nkachiꞌ Jesús.
Chwazi Kounye ya:
Lucas 16: meh
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.