Mata 11
11
Gà ɓəzla meslire Yuhana metsìlwìɓè à mburma a yam
Luka 7:18-23
1I dəba ŋa ya, Yesuw a ndəv aba à guma ŋgar ata a gà ɓəzla mazazama ŋgat ata kurwa gəra sula ya ka, a mah ba i fataya, a da. Aɗaba a de a ka, aà mesìweye ika ahəɗ ŋgiɗ pampam ika ahəɗ ata, a tsik a guma ŋgar a mburma, meme na ti zezem a vatwa Mbulum a.
2Akahər ata ka, Yuhana metsìlwìɓè à mburma a yam a riŋ i ga daŋgay. Ama a tsaraka meɗè zləm megemir Yesuw ana a gewa ya, ta gwa là, ŋgat ka, *Kiristi, mala məmbə̀là à mburma ana Mbulum a gwa, i slir a kurumehe a ya ka, a slər gà asiŋ gà ɓəzla mazazama ŋgat a təv ŋgar. 3Aɗaba aà megweɗereha ka: «Wànà kər ana, mala məmbə̀là à mburma ana mì sər ka, a riŋ a dere a ya ya, tsəna, mìi veve a biy ŋgiɗ a?» Gà mburma ata ta mah ba, tə da. Tə daha, ta gwaɗar kamala ana wele aaha a sləraha tar a. 4Yesuw a gwaɗa a tar: «Mbəɗum gər, ti tsikwim a Yuhana, na dukw ana kà tsarakum kinehe ya, ndəna kə̀ ŋgatumar a. 5Gwaɗumar ka, gà ɓəzla guluf tàa ŋgat are tar, dite gà ɓəzla magàha a bəɗ ibam, ti de a lele, nda gà ɓəzla mbəlak ba tekeɗe, suwuɗ suwuɗ tàa mbala. Gà ɓəzla mandakazləm tekeɗe ibam asa, pìɗek tàa tsaraka zləm, nda gà məməta ibam asa, hùrùm tàa mbalara i məməta ya. Gà ɓəzla matawak mbaŋa, tàa tsaraka bazlam ŋgwal ŋa ana i tsik a ya. 6Ama ki gweɗwimer a asa ka: Maŋgayaba ika gər wur ana aka məsak à megìsè iye i gəzləŋ ŋgar tsiye.»
Yesuw a fàfəl aka gər Yuhana
Luka 7:24-35; 16:16
7Aləka i təv ana gà ɓəzla mazazama Yuhana ata tə da iɗəm a ka, Yesuw a dza ba aà metsìkè bazlam a gà mburma ana tar riŋ i təv ŋgar a, aka gər Yuhana. A gwaɗa a tar: «Kà dum a təv Yuhana ata a kusak ana, ka ta fə̀rumara ana, aàla ya? Wànà aà kwizir ana himbiɗ a ɓezle a dər wàkit wàkit a ya? 8Tsəna, ka ta fə̀rumara ana, aà dukùla ya kəla ya? Wànà aà wele ana a dza akaba ŋgwal petek a ya? Ama gà na tə dzawa akaba ŋgwal petek a ka, tar ka, i ga i bəra gà Əbay.» 9A gwaɗa a tar asa: «Dite ka ta fə̀rumara dze ana, aà dukùla ya? Wànà aà mala məma à guma Mbulum a kəla ya? Na kataya ka, kaɗəŋ, iye ihər i gweɗe a kurum a nda ndzer: Wele ata kà ta fə̀rum ahərra ya ka, a za mala məma à guma Mbulum fit kweleŋ. 10Aɗaba ŋgat ka, wele ana Mbulum a tsik ahər i wakita ŋgar, a gwa:
<I slirehe a mala meslire gà naha
aka miɗ yak, dite mà làmbaɗak vatwa yak> a.*fa*
11Iye ihər i gweɗe a kurum a nda ndzer kaɗəŋ, pàrsa iɗəm tsa: Wura a riŋ tàa wa, a za Yuhana metsìlwìɓè à mburma a yam ka, a riŋ tsa. Ama kəla ka, wur ana aka həna à gər a bəɗ, a ne à ba ŋgar kəla ŋa i mekwere Əbay Mbulum a ka, a ze a ŋgat ana kinehe ya. 12Ama à gər ana Yuhana a pat aba, a tsikewa bazlam Mbulum a mburma ya haa kinehe tekeɗe, gà ɓəzla mene are a Mbulum ta həndakawa a vatwa a mburma, ta waya bazlam *mekwere Mbulum ana a kwere a ya, ma da aka miɗ tsa. 13Ama mekwere Mbulum ata ka, Musa na a lah ahər aà metsike ŋa i huɗ məpala ahəm ŋgar ana a tsikewa a mburma ya, dite nda gà asiŋ gà ɓəzla məma à guma Mbulum ana tserdze ta màwa dər a mbaŋa, dite na a ndzera tsikw aà Yuhana ya. 14Ama na a sàs a kurum dukw ana i tsik a kurum a ya ka, Yuhana a ne ka, Iliya, wele ana ta wetse i wakita Mbulum piŋŋe, ta gwa ahər, a dere a mba ya. 15Ama wur ana gər ŋgar aka ge aà metsereke dukw aaha ya ka, say mà dzar zləm lele.»
16Yesuw a gwaɗa a tar asa: «I sle aà megeye akaba a à gà mburma ana kinehe ya dze ana, nda weke? I ndzikiɗ a ba à tar ka, nda gà ɓəza ana ta ge a màhaw ika dàɓa ya. Dite gà mìsle ŋgiɗ ti zel a a gà biy ŋgiɗ, ta gweɗe a ter a: 17<Maa vàt a kurum vagam, ama kurum dzìrìkke kàa gə̀rə̀vum a mər aaka tsa. Maa lah a kurum dimis məməta mbaŋa, ama kurum kàa tuwum aaka ɓav tsa asa.> 18Aɗaba Yuhana metsìlwìɓè à mburma a yam a dara ka, a gewa ndəra. A sawa makwàsà duwa tsa asa. Ama ta gwa ahər ka: <Sitene i ba ŋgar, tsàkə̀kka a be a a dala.> 19Ama iye, *wur ana a dara i təv Mbulum a, i dara ka, i zəmawa ɗaf, i sawa dukw ana makwàsà ŋa ya, ta gwa aà iye ka: <Araha, fə̀rum aà wele aaha ŋgat mala hitwis a. A dzele a i ŋgar ka, dukw mezime, nda masà dukw ana makwàsà ŋa ya ɗekɗek a, a kweye a dər a kwaŋ. Taŋa ŋgat i ŋgar ka, masla gà ɓəzla duwan, nda gà ɓəzla bakal.> Ama metsehe Mbulum a pèt a aba lele ka, nda təv megemir ŋgar ana a ge a ya.»
Mesewere are gà kwite ana ta gəs Yesuw nda gəzləŋ tsiye
Luka 10:13-15
20I dəba ŋa ya, Yesuw a dza ba aà məpala ahəm a gà kwite ana a geye a iɗəm gà dukw mene à mburma bagwal ŋa pampam hinne ka, dite tàa mbəɗ à madzala gà gər tar, tàa gəs ŋgat nda gəzləŋ tsiye. 21A tsik aà tar, a gwa: «A kurum ana i kwite Kurazin a, waya ba kurum a. Dite a kurum ana i kwite Betsayida ya, waya ba kurum a asa. Aɗaba gà dukw mene aà mburma ana i geye i kwite kurum a, mege i geye ka, i gà kwite Tirus nda Sidun ka, ana ka, ti dzele a ba tar daga piŋŋe, ti tiwiŋa, tì dzèye akaba a gà makwàtsak gà bùhwa, ti ndèye akaba a bitekwe aà məpàtà dər ka, a sàs a tar məmbə̀ɗà à gəzləŋ tar a. 22Aɗaba taŋa, iye ihər i gweɗe a kurum ŋa: A pat seriye Mbulum ka, mesewere are ŋa i kurum a ta ge a ka, ŋgulum biy gà mburma ata i kwite gà Tirus nda Sidun a. 23Dite a kurum ana i kwite Kafarnahum a, kurum ana ki gwim a aba zlapa ya, kù gwaɗum i kurum ana, Mbulum a ti dzik a kurum aà gəza mbulum pam a? Awaŋ, tì lìm a kurum a ka, a təv mendze gà məməta ivaɗ. Aɗaba gà dukw mene aà mburma ana i geye i kwite kurum a, mege i geye i kwite Suduma ka, ana kwite ata ka, gà mburma ana i fataya, ta gis a iye nda gəzləŋ tar, ti zeha a riŋ iɗəm haa kinehe mba. 24Aɗaba taŋa asa iye ihər i gweɗe a, a pat seriye Mbulum ka, mesewere are ŋa biy kurum ata a ge a ka, ŋgulum biy gà mburma ata i kwite Suduma ya.»
Yesuw a gwa: «Dumara a təv ga ya, i vile a kurum a
mesìfìkà ba»
Luka 10:21-22
25I dəba ŋa ya ka, Yesuw a hama a Mbulum, a gwaɗar: «A kər Tsir gà, kər ana ki kwere a gà gəza mbulum nda gər ahəɗ a. Iye ihər i gek a kəkaaha, aɗaba kər ka, kàa kaha duwa à gà ɓəzla metsehe ya, nda gà na tə sər duwa hinne ya. Ama kinehe ka, kər ihər ki ɗif a dər a gà na tə sər duwa tsiye. 26Kataya Tsir gà, lele na ki ge a taŋa ya. Taŋa ka, kamala ana a sàsabak nda gər yak a.»
27Dite a gwaɗa a gà mburma ana a riŋ mayahaba gər ŋa i təv ŋgar a: «Ama Tsir gà aka dziŋ gà dukw a ahər tserdze. Wura a riŋ na a sər ka, weke na Kəla Mbulum a tsa, say Tsir ŋa, dite wura a riŋ na a sər ka, weke na Tsir ŋa ya tsa asa, say Kəla ŋgar ata, nda gà mburma ana Kəla ŋgar ata a sasar meɗife a tar dər tserdze ya.»
28I dəba ŋa ya, Yesuw a gwaɗa a tar asa: «A kurum ana kàa ywim ba kwèndèhndèhhe agəra məpala ahəm Mbulum ana ti tike aka kurum duwa kamala mibe duwa ya. Dumara a təv ga ya, i zle a ika kurum mibe dukw ata ya. 29Aɗaba iye ka, ŋgwal mburma lele, i sèwèr a kurum a are tsa. Gəsum ahəm gà lele, nwim ka, kamala gà sla ana ti tike aka ter a zukw, ta fìt a dər a. Ki sinikwim a ba à dukw ana i ge a ya, dite ka, gəzləŋ kurum ma ndza zayya lele kuɗa. 30Aɗaba dukw ana iye i tsik a kurum a ya ka, a ge a kurum a ŋgulum. Dukw gà ana ki zlwim a ya tekeɗe ka, tsèfek tsèfek a be a kurum tsa asa mbaŋa.»
Chwazi Kounye ya:
Mata 11: gnd
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc. All rights reserved.