Lukas 19
19
Si Isa maka si Zakiyus
1Na pag takka jaꞌ ga si Isa pa Jeriko, lay sila pingkaꞌ man jawom daira looy. 2Ndooy siꞌ, luu disu lalla dayahan inawnan si Zakiyus. Iya siꞌ tu disu pa-mmean siga tukang ninga sukay. 3Tud doman ya ngita si Isa, sugaꞌ yaꞌ luu dapat na batan biddaꞌ na eka manusiyaꞌ magdogsog-dogsog. Boꞌ na, diyoꞌ-diyoꞌ gi ya. 4Dari lay ya sonse pa duhuan baanan ga jama looy, boꞌ na ngandāg taꞌ kayu sikamol ni bihing lān bong pin takita na jaꞌ si Isa pag pingkaꞌ na.
5Pag taabut si Isa umatag mman na, lay ya pahangad boꞌ na halling, “Zakiyus, duwai na ko deꞌ-dēꞌ batan subay situ ku pahantiꞌ ni lumaꞌ bi llaw tuu.”
6Dari magti du si Zakiyus duwai. Boꞌ biddaꞌ na ehe kagakan na moo si Isa pa lumaꞌ da. 7Sugaꞌ pag ndaꞌ baanan ga jama ndooy meꞌ looy, buwatan da magdubdub, yuk da, “Uy la, iya lluruk meꞌ na induꞌ-induꞌ baldusa!”
8Na sasang da siꞌ ningkōꞌ njawom lumaꞌ, lay nangge si Zakiyus boꞌ na halling, “Tuwan, dean ku na jama miskin tongaꞌ altaꞌ ku, maka sagannap ma bay lilu ku, papoleꞌ ku na sīn da maka lipat ku gi min mpat.”
9Yuk si Isa ni si Zakiyus, “Batnaa tu, salamat na ko sampay ga jama lumaꞌ bi sabap lay na ko mōꞌ buktiꞌ sabana-bana kau panubuꞌ Boꞌ Ibrahim. 10Aku tu, yana Anak Manusiyaꞌ, kon ku tu bay pitu pa junyaꞌ miha sagannap ma bay magsiꞌ man Tuhan bong pin sila tasalamat ku.”
Siga tindog ma kanaalla ka niyaꞌ
(Matiyu 25.14-30)
11Na pag tapit jaꞌ siꞌ si Isa pa Jerusalem, kuwan ga jama ma mmeꞌ niiya, holat da pag takka da pilay, matangge na si Isa pamarinta Tuhan, boꞌ iya na magsultan ninsila. Pag tabistu si Isa meꞌ looy pamiki da, lay ya ngandalil, 12yuk na, “Luu disu lalla balbangsa manyap man na pilay pa disu lahat lawak ngaddoꞌ kapatut man na magsultan. Garaꞌ na, pag poleꞌ na, iya na marinta ni paglahat na. 13Na tapit jaꞌ siꞌ masa man na pilay, lay doꞌ ya nawag tindog na sapū, boꞌ da pina-ntanan saliꞌ-saliꞌ sapū libu pilak. Yuk na ninsila, ‘Palanun bi sīn tuu likutan ku ndooy.’ Pag-anu, ilooy ma lay na ya patuwak.
14“Na ni paglahat lalla looy siꞌ tu, meka jama lammis niiya. Yaꞌ sila doman iya magsultan ninsila. Dari lay na ga sila nguwakilan siga jama patuhut ni lalla looy. Takka ndooy, yuk da, ‘Ya kami la doman lalla naa marintahan kami.’ 15Sugaꞌ san baw meꞌ looy, masi du ya bay binuwanan kapatut magsultan ni paglahat na.
“Pag beleng na siꞌ, lay na tawag na ga tindog na ma ngantanan sīn na supaya katoonan na bong dangoy na paluntungan bay takoleꞌ da. 16Luu jaꞌ siꞌ tindog na ma duhuꞌ, yuk na, ‘Ampun Sultan, atu na sīn nu. Lay gi situ lipat min sapū.’
17“Yuk sultan looy niiya, ‘Mahap sina. Kau na tindog mahap. Pagka ko bay kanaalla ni pabuwatan dikiꞌ, buwanan ta na ko kapatut marintahan daira sapū.’
18“Pag-anu, pasōng na baw ilooy ni kaduwa sambayan na halling, ‘Ampun Sultan, atu na sīn nu. Lay gi situ lipat min lima.’
19“Yuk sultan looy, ‘Mahap sina. Kuwan kau, buwanan ta na ko kapatut marintahan daira lima.’
20“Pag takka disu, yuk na, ‘Ampun Sultan, atu na sīn nu bay mbanan nu man ku. Bay jaꞌ situ nnaꞌ ku paayad pinutus njawom saputangan. 21Yaꞌ bay pinalān meꞌ ku batan tawu ku kinalasuhan meꞌ nu bong bay lugiꞌ. Ndaꞌ ku, kau jama adil banahan. Biyasa ko ngaddoꞌ untung lakka man hulas-sangsāꞌ jama. Sibuꞌ du ko ka jama ngaddoꞌ kattoman san saꞌ kau bay tanom.’
22“Dari yuk sultan niiya, ‘Behe nu na bina mismu bay mōꞌ buktiꞌ kau tindog maat. Tatammu nu ga māꞌ, aku jama adil banahan. Maka baꞌ-bāꞌ nu, biyasa ku ngaddoꞌ untung lakka man hulas-sangsāꞌ jama. Maka yuk nu, ngaddoꞌ jaꞌ ku kattoman san saꞌ aku bay tanom. 23Bong bana bandingan nu niyaku, ongoy baw taggahaꞌ yaꞌ bay nnaꞌ nu sīn ku ni bangku supaya pag beleng ku, luu gi ka anak na?’
24“Dari yuk sultan looy ni kasohean ma nangge ndooy, ‘Kaddoun bi na sīn ku man lalla tuu boꞌ deanun bi pa mman ilooy siꞌ ma bay nguntung lipat min sapū.’
25“Yuk da, ‘Uy la Ampun Sultan, daa busung, ndang meka na bilay niiya.’
26“Yuk sultan, ‘Pilayun bi na ba. Baan ta kam banahan, sagannap ina ma magkanaalla makoy ilooy ma bay ndean sila, sinampunan gi paeka ninsila. Boꞌ sagannap ma yaꞌ kanaalla, san luu dangkitiꞌ du bay ndean sila, mastiꞌ kinaddoan du sina mman da.’
27“Pus meꞌ looy, yuk sultan, ‘Na kuwan ga jama looy siꞌ ma bay nguntra aku, ma yaꞌ doman aku magsultan ninsila, boonun bi na pitu, boꞌ papatoyun bi na ni awpan ku.’ ”
Si Isa pinudji pag takka na pa Jerusalem
(Matiyu 21.1-11; Malkus 11.1-11; Yahiya 12.12-19)
28Paddus si Isa mitsala meꞌ looy, lay na sila palanja pa Jerusalem. 29Tapit jaꞌ siꞌ sila pa Betpaji ka Betani ni bihing Punu Jaytun, lay si Isa maduhuꞌ mulit na duwa. 30Tugun na ninsila, “Pilay kam pa kawum looy ni duhuan. Ndooy ilay ngita kam sina kuraꞌ baddung iningkotan, yaꞌ gi bay pingkaꞌ binakuraan. Lakkahan bi ingkot na boꞌ boonun bi pitu. 31Bong luu nilaw kaam bong ongoy lakkahan bi, baan bi ya gunahan la ni Papuꞌ.”
32Dari siꞌ, lai na sila lumān. Takka ndooy, lay na du tatammu da kuraꞌ looy meꞌ ndang bay bināꞌ meꞌ si Isa ninsila. 33Maka sasang da ngalakkahan ingkot na, tinilaw na sila meꞌ jama ma dapu, yuk na, “Batōy bi na llakkahan ingkot kuraꞌ ku?”
34Yuk da, “Gunahan bitu la ni Papuꞌ.”
35Dari lay na sila pinadari ngaddoꞌ kuraꞌ looy. Takka jaꞌ siꞌ sila pa mman si Isa, lay na inampihan meꞌ da kuraꞌ looy ka sammek da, boꞌ da mabakuraꞌ si Isa. 36Sasang si Isa pasōng taꞌ kuraꞌ looy, meka na jama ni duhuan natag pakayan da ni lān na man maehe iya.
37Pag lūd si Isa man Punu Jaytun, mimon na jama ma mmeꞌ niiya yaꞌ na tasaggaꞌ da kagakan da. Sampay lay na sila mudji Tuhan pahaddo sabapan mimon pabuwatan kahaylan-haylan ma bay tasakup da man si Isa. 38Yuk da, “Sinupaatan la sultan naa ma pitu ni kawasa-kapatut Papuꞌ tabi Tuhan. Itu na ya moo kasalassayan mari tabi mahap na pa Tuhan. Pudji tabi Tuhan ni sulgaꞌ.”
39Na njawom baanan ga manusiyaꞌ ndooy siꞌ, luu du kasohean Parisi. Pag takale da jama mudji si Isa, yuk da niiya, “Guru, saggongun teꞌ ba siga mulit nu mudji kau meꞌ naa.”
40Tampung si Isa baw, “Baan ta kam banahan, bong ina sila diyam-diyam jaꞌ, kabatuhan naa na baw sina howap mudji aku.”
Si Isa kapanangis mamikihan ga jama Jerusalem
41Tapit banahan jaꞌ siꞌ sila pa Jerusalem sampay takita si Isa na daira looy, lay na ga ya kapanangis susahan siga jama ndooy. 42Yuk na, “Uy la, kaam jama Jerusalem, kainagon ku tabista bi na bong pooy meꞌ bi nammu kasalassayan ka lān man bi mahap na pa Tuhan. Sugaꞌ yaꞌ na sina luu dapat bi batan meꞌ ga lay na llimbuhan man mata bi. 43Luu du sina mintu masa bi llān meꞌ siga banta bi. Llikung na sina mintu daira bi meꞌ siga baanan sundalu da. Tud yaꞌ na luu dapat bi patangkaw. 44Bbuwatan da ina mintu mapatoy kaam sikamimon sampay ga anak bi. Hansu da na daira bi ka kalumaan bi. Yaꞌ na sina mintu luu takapin nangge san lasa duwa batu magpangkat. Ilooy ilay siꞌ sikamimon tuwaꞌ jaꞌ sina mintu njataꞌ bi sabap yaꞌ bay hasi bi kasalamatan ma bay boo Tuhan pa mman bi.”
Si Isa malakka siga padadagang man langga mehe
(Matiyu 21.12-17; Malkus 11.15-19; Yahiya 2.13-22)
45Na pag takka si Isa pa Jerusalem, lay ya paasok pa haman langga mehe boꞌ na malakka sagannap ma dagang ndooy. 46Yuk na ninsila, “Luu bilay palman njawom kitab, ilooy ma yuk Tuhan, ‘Lumaꞌ ku ina yana lugar halliꞌ man maku duwaa.’#(19.46) Kitab Nabi Isaya 56.7. Sugaꞌ kaam baw tu, lay na pabuwat bi subay ga lumaꞌ baanan sugaru.”
47Labba mandooy, llaw-llaw si Isa nōꞌ ni langga mehe. Sugaꞌ kuwan siga imam ka ga guru saraꞌ agama sampay ga pa-mmean Yahudi ndooy, miha na pin jalan man da mapatoy iya. 48Sugaꞌ yaꞌ baw luu dapat da batan luu na pin jama kumpo-kumpo ni bihing na ni kaehe dawom da pakale ni bitsala na.
Chwazi Kounye ya:
Lukas 19: sjm
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc. All rights reserved.