Kutoma 3
3
Kukhonda vera kwa munthu
1Nyoka ikhali yakuchenjera pyakwanga kupiringana nyama zonsene zam'tsanga zikhadalenga MBUYA Mulungu. Iyo idalonga kuna mkazi ule kuti, “Ayi Mulungu adakupanganidi kuti muleke kudya nsapo za m'muti na ubodzi ene m'mundamu?”#Chid. 12.9; 20.2.
2Mkazi ule adatawira mbati, “Ife tinakwanisa kudya nsapo za m'miti yonsene m'mundamu, 3kupambula nsapo za muti wapakati pa mundawu. Mulungu adatipanga kuti tileke kudya penu kukhuya nsapo za muti wapakati pa mundawu, thangwi tingachita tenepo, tinati tife.”
4Nyoka idatawira kuti, “Penepyo si pyakuona tayu, kufa munafa tayu. 5Thangwi Mulungu akupidziwa kuti sindzidzi imwe nkhudya nsapo za mutiwu maso anu anafunguka mbamukhala ninga Mulungu,#3.5 Mulungu: penu milungu. kudziwa chadidi na chakuipa.”#3.5 kudziwa chadidi na chakuipa: penu kudziwa pyonsene.
6Pidaona mkazi ule kuti muti ukhali wakubalika pyakwanga, nsapo zache zakukoma m'maso pontho zadidi na kuzidya, pontho na kukhumba kukhala munthu wanzeru, adakwata nsapo zinango mbadya. Tenepo adakwata nsapo zinango mbakampasa mamunache, mamunayo mbadyambo. 7Sindzidzi pikhadadya iwo nsapo zile, maso awo adafunguka mbadzindikira kuti akhali chipezi-pezi; natenepo adasona masamba a muti wamkuyu mbapivazika okha ene.
8Mawulo a nsiku yeneyo Adamu na Hava adava MBUYA Mulungu akufamba-famba m'munda mule, tenepo iwo adabisala pakati pa miti, towera MBUYA Mulungu aleke kuaona. 9Mbwenye MBUYA Mulungu adachemera mamunayo mbati, “Uli kupi?”
10Mamunayo adatawira mbati, “Ndidakuvani m'mundamu; ndidachita mantha, pontho ndidabisala thangwi ndikhali chipezi-pezi.”
11Mulungu adavunza mbati, “Adakupanga mbani kuti iwe ukhali chipezi-pezi? Ayi wadya muti udakupanga ine kuti muleke kudya ule?”
12Mamuna ule adamtawira mbati, “Mkazi adandipasa imwe kuti ndikhale nayeyi, ndiye adandipasa nsapo zinango za muti ule, inembo mbandidya.”
13MBUYA Mulungu adavunza mkazi ule mbati, “Thangwi yache ninji udachita tenepo?” Mkazi ule adatawira mbati, “Nyoka ndiye idandinyengeza, tenepo ine ndidadya.”#2Akor. 11.3; 1Tim. 2.14.
Mulungu alonga pya kutchunyuswa kwawo
14Tenepo MBUYA Mulungu adalonga kuna nyoka mbati, “Iwe unati utchunyuswe na thangwi ya pyachita iwepi; wakutembererwa ndiwe kupiringana nyama zonsene zakufuyiwa na zonsene zam'tsanga. Iwe unati ufambe na mimba pontho unati udye fumbi nsiku zonsene za moyo wako. 15Ine ndinati ndiikhe chizondi pakati pa iwe na mkaziyu, pontho pakati pa anako na anache panakhala chizondi. Ana a mkaziyu anadzadzada msolo wako, iwembo unaluma chitende chache.”#3.15 chitende chache: penu pitende pyawo.#Chid. 12.17.
16Tenepo Mulungu adalonga kuna mkazi mbati, “Ine ndinati ndithimize nyatwa za ndzidzi wako wa mimba pontho kuva kwako kupha pakubala. Unati umkhumbe mamunako, pontho mamunayo anati akutonge.”
17Mulungu adalongambo kuna mamuna mbati, “Na thangwi yakuti udavera mkazako mbudya nsapo za muti udakupanga ine kuti muleke kudya ule, mataka mbakhale akutembererwa. Iwe unati uphate basa pyakwanga moyo wako onsene kuchitisa mataka kubala phoso yakukwana yakuti iwe udye.#Aheb. 6.8. 18Mataka anati amerese minga na dawe. Iwe unati udye mbewu zam'tsanga. 19Kuti mataka abalise pinthu, iwe unati uphate basa pyakwanga na kaluma, kufikirana iwe ubwerere kumataka, thangwi udasasanywa kubulukira kumataka. Na thangwi yakuti udasasanywa kubulukira kumataka, unati ubwerere kumataka konthoko.”
20Adamu#3.20 Adamu: Dzina yeneyi m'Chiheberi nkhulonga kuti “munthu.” mkazacheyo adamthula Hava,#3.20 Hava: Dzina yeneyi imbaveka sasawa na mafala a m'Chiheberi akulonga kuti “kukhala na moyo,” ile mundima yeneyi ikulonga kuti “Anthu.” thangwi iye ndi mama wa madzinza onsene. 21Tenepo MBUYA Mulungu adasasanyira Adamu na Hava nguwo ya nthembe mbaavazika.
Adamu na Hava abuluswa m'Munda wa Edeni
22Tenepo MBUYA Mulungu adalonga mbati, “Chinchino anthu enewa asanduka ninga mbodzi wa ife, pontho ana udziwisi wa chadidi na chakuipa.#3.22 udziwisi wa chadidi na chakuipa: penu udziwisi wa pyonsene. Iye hadathemeve kutawiriswa kuthukula mkono wache kutchola nsapo za muti wakupasa moyo ule, mbadya, mbakhala na moyo kwenda na kwenda tayu.”#Chid. 22.14. 23Natenepo MBUYA Mulungu adaabulusira kunja kwa Munda wa Edeni ule mbaachitisa kuti alime m'mataka akhadasasanywa na iye ale. 24Pidaabulusa iye kunja, Mulungu adaikha pyakulengwa pyakukhala na maphaphido chakumabulukiro dzuwa a Munda wa Edeni, pontho na talasada yamoto kuzungulira-zungulira khundu zonsene. Yeneyi ikhali njira yakukhondesa nayo anthu kudza chifupi na muti wakupasa moyo ule.
Chwazi Kounye ya:
Kutoma 3: SenaMw
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Bible Society of Malawi