Naanearü ügüchiga 3
3
Adáü̃ rü Éba rü tama Tupanaga naxĩnüe
1Rü natanüwa ga guxü̃ma ga yema naeü̃gü ga idüraexü̃ ga Cori ya Tupana üxü̃, rü yema ãxtape nixĩ ga guxü̃arü yexera womüxẽẽxü̃ cuáxü̃. Rü yema nixĩ ga ngĩxna ca̱xaxü̃ ga yema nge, rü ñanagürü ngĩxü̃: —¿Rü aixcüma yixĩxü̃ i Tupana pexna nachu̱xuxü̃ nax tama penangṍxü̃ca̱x i norü o i ngẽma nanetügü i ñaa naanewa rüxügüxü̃? —ñanagürü.
2Rü ngĩma ga yema nge rü inangãxü̃ rü ngĩgürügü: —Ngẽmáacüx, tanangõ̱x i ngexü̃rüüxü̃mare i nanetüarü o i ñaa naanewa rüxügüxü̃.
3Natürü ngẽma nanetü i ñaa naanearü ngãxü̃wa rüxüxü̃arü oxicatama nixĩ ya Tupana tomaxã nüxü̃ ixuxü̃ nax tama tanangṍxü̃ca̱x, rü bai i nüxü̃ tingõgümarexü̃. Erü ngẽxguma ngẽmaãcü tanaxü̱xgu rü tá tayue —ngĩgürügü nüxü̃.
4Natürü yema ga ãxtape rü ngĩxü̃ nangãxü̃ rü ñanagürü ngĩxü̃: —Tama aixcüma nixĩ i ngẽma. Rü taxũtáma peyue.
5Erü Tupana rü meama nüxü̃ nacua̱x ega penangõ̱xgu i ngẽma nanetüarü o rü tá nüxü̃ pecua̱x i ta̱xacü nixĩ i mexü̃, rü ta̱xacü nixĩ i chixexü̃, rü Tupanarüxü̃ tátama pixĩgü —ñanagürü ngĩxü̃.
6Rü yexguma ga yema nge rü nüxü̃ idawenü ga yema nanetüarü o rü ngĩxü̃́ nangúchaü̃ ga nax nangṍoxü̃ nax yemaacü cua̱x ngĩxü̃́ yexmaxü̃ca̱x. Rü iyacawe ga wüxipü̱xü ga norü o rü inangõ̱x. Rü ñu̱xũchi ngĩtemaxã ingau rü nüma rü ta nanangõ̱x.
7Rü yexgumatama ningo̱xnaxetügü rü nüxü̃ nicua̱xãchitanü ga nax yangexchiruxü̃. Rü yemaca̱x iguátü nanga̱i̱xcu nax yemamaxã nügü yadüxpe̱xegüxü̃ca̱x.
8Rü yáuanecü ga yexguma yabuuchigu ga buanecü, rü gumá yatü rü yema nge rü Tupanaxü̃ naxĩnüe nax yema naanegu yaxũgüchigüxü̃. Rü nibuxmü rü naxcha̱xwa nanetünecügu nicu̱xgü.
9Natürü nüma ga Cori ya Tupana rü gumá yatüca̱x naca. Rü nüxna naca rü ñanagürü: —¿Ngextá cungexma? —ñanagürü.
10Rü nüma ga gumá yatü rü nanangãxü̃ rü ñanagürü: —Cuxü̃ chaxĩnü nax ñaa naanegu quixũgüxü̃, rü chamuü̃ erü changexchiru. Rü ngẽmaca̱x ichicu̱x —ñanagürü.
11Rü yexguma ga Tupana rü nüxna naca rü ñanagürü: —¿Texé cumaxã nüxü̃ tixu nax cungexchiruxü̃? ¿Ẽ̱xna cunangõ̱x i ngẽma nanetüarü o i cuxna chachu̱xuxü̃ nax tama cunangṍxü̃ca̱x? —ñanagürü.
12Rü nüma ga gumá yatü nanangãxü̃ rü ñanagürü: —Ngẽma nge ga choxna ngĩxü̃ cumucü chomücüxü̃ rü chomaxã ingau i ngẽma nanetüarü o i toxna cuchu̱xuxü̃ rü choma rü chanangõ̱x —ñanagürü.
13Rü yexguma ga Cori ya Tupana rü ngĩxna naca ga yema nge rü ñanagürü ngĩxü̃: —¿Tü̱xcüü̃ ngẽma cuxü? —ñanagürü. Rü ngĩma rü inangãxü̃ rü ngĩgürügü: —Ngẽma ãxtape choxü̃ nawomüxẽxẽ rü ngẽmaca̱x chanangõ̱x —ngĩgürügü.
14Rü yexguma ga Cori ya Tupana rü ñanagürü nüxü̃ ga yema ãxtape: —Ñaa cuxüxü̃gagu rü natanüwa i guxü̃ma i naeü̃gü rü tá cuchixe. Rü ñu̱xmax rü cuxtanecamaxã tá iquixũ rü waixü̃müarü ãte̱xexü̃ tá cungõ̱x ñu̱xmatáta cuyu̱x.
15Rü ñu̱xma rü pemaxã chanaxuegu nax cuma rü ngẽma nge rü pegümaxã perüxuanügüxü̃. Rü ngẽxgumarüxü̃ ta i cuxacügü rü ngĩxacügü rü tá nügümaxã narüxuanügü. Rü yimá ngĩne rü tá cuxü̃ nipúmüeru rü cuma rü tá cunangõ̱xchinecutü —ñanagürü.
16Rü yexguma ga Tupana rü yema ngexü̃ ñanagürü: —Tá chanayexeraguxẽxẽ nax cuxü̃́ nangúxü̃ i ngẽxguma cuxãxãcügux. Rü cuxü̃́ nangúãcü tá cuxíxraxacü. Natürü taxũtáma nüxü̃ curüxo nax cute cuxü̃́ ngúchaü̃xü̃. Rü nüma rü tá cumaxã inacua̱x —ñanagürü.
17Rü yexguma ga Tupana rü Adáü̃xü̃ ñanagürü: —Ngẽma ngĩga nax cuxĩnüxü̃ i ngẽma cuxma̱x rü ngẽma nax cunangṍxü̃ i ngẽma ori̱x i cuxna chachu̱xuxü̃ nax tama cunangṍxü̃ca̱x, rü ngẽmaca̱x i ñu̱xma rü cugagu tá chixexü̃wa nangẽxma i ñaa naane. Rü poraãcü tá cupuracü nax naxüxü̃ca̱x i cunetü ñu̱xmatáta cuyu̱x.
18Rü ñaa naane rü tá tuxugü rü natüanegümaxã narüxü. Rü nanetü i naixnecücüã̱xarü omaxã tá cungãxü̃.
19Rü poraãcü tá cupuracü rü cuxaiya nax cuxü̃́ nangẽxmaxü̃ca̱x i cuwemü ñu̱xmatáta cuyu̱x rü ngẽmaãcü wena tá waixü̃müca̱x cutaegu, yerü yemawa cuxü̃ chaxü ga noxrix, rü waixü̃mü quixĩ rü wena táxarü ngẽmaxü̃ quixĩ —ñanagürü ga Tupana.
20Rü gumá yatü rü Ébagu ngĩxü̃ naxüéga ga yema naxma̱x yerü ngĩma iyixĩ naé ga guxü̃ma i duü̃xü̃gü i maxẽxü̃.
21Rü nüma ga Cori ya Tupana rü naeü̃cha̱xmüü̃maxã nayaxüxchiru nax yemamaxã yaxãxchiruxü̃ca̱x ga gumá yatü rü yema nge.
22Rü ñu̱xũchi ga Tupana rü nügümaxã ñanagürü: —Ñu̱xma ya daa yatü rü taxrüü̃tama nixĩ nax nüxü̃ nacuáxü̃ i mexü̃ rü chixexü̃. Rü ngẽmaca̱x ngĩxã tayamugachi nax tama nüxü̃ nadauxü̃ca̱x i ngẽma nanetüarü o i maxü̃ nawa ngẽxmaxü̃. Erü ngürüãchi tá nüxü̃ nada̱u̱xgu rü tá nanangõ̱x rü guxü̃gutáma namaxecha —ñanagürü.
23Rü yemaca̱x nixĩ ga Cori ya Tupana ga gumá yatüxü̃ Edéü̃wa ínata̱xüchixü̃ rü nagu namuaxü̃ nax nawa napuracüxü̃ca̱x ga waixü̃mü ga noxri nawa naxüaxü̃.
24Rü yexguma ínata̱xüchiã̱xguwena rü Edéü̃maü̃gu nanamugü ga ñuxre ga daxũcüã̱x ga ixãxpe̱xatüxü̃, rü yexma nanaxǘ ta ga wüxi ga naxne ga tara ga iya̱u̱xracüüxü̃ ga yéma idixegucüüxü̃ ga guxü̃cüwagu yawe̱xemaãchixü̃ nax taxúema nawa nguxü̃ca̱x ga yema nanetü ga maxü̃ nawa yexmaxü̃.
Chwazi Kounye ya:
Naanearü ügüchiga 3: tcaP
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.