SALMO 55
55
Tata Diosta roygaypachi chikniwakninchi runakunamanta amachawananchikunapa.
1A, Tatayni Dios,
roygaptini uyariway.
Ama nimatashina royganaynita uyariychu.
2-3A, Tata Dios,
uyariwashpa yanapaway.
Llakishpayni roygayki.
Chikniwak runakuna rimakuptinkuna
mana alli rurak runakuna kaparikuptinkuna
uyarishpa sukaman manchakuni.
Paykunaka chikniwashpa sufrichiwansapa.
Sukaman piñakushpa makawanayansapa.
4Chayta kawashpa manchakuptini
shunkuyni sinchita waktanakun.
Wañuchiwanankunata yuyashpa
sukaman manchakuni.
5Chashna sukaman manchakushpayni chukchukuykani.
6Chayta yuyashpa rimani:
¿Imapatí mana urpayshina rikrayuk kani?
Rikrayuk kashpaynika
nitikushpa pawayman samak rinaynipa.
7Pawashpayni karuta riyman.
Chakidu pampapi kipariyman
chaypi kawsanaynipa.
8Chikniwak runakuna sinchita sufrichiwaptinkuna
Tata Diosta sukaman mañasha
sinchi wayramantashina amachawananpa.
12Manami chikniwak runachu sufrichiwashka.
Chikniwak runa sufrichiwaptinka
mana nimachu kanman.
Sufrichiwak runamanta ñukaka pakakuyman.
13Chay sufrichiwak runaka
kuyanakushpa purikmasinimi kashka.
14Paywanmi Tata Diospa wasinpi yaykushpaynikuna parlak kanisapa.
Paywanmi kushikushpa aypa runakunapa chawpinkunapi purik kanisapa.
15Tukuy chikniwak runakuna
mana yuyashkankuna oras wañuchunsapa.
Mana alli rurak kashpankuna
raslla wañuchunsapa.
16Ñuka sufrishpayni
Tata Diostami roygasha.
Roygaptini yanapawanka.
17Pakarinanta chishita tutata wakaptini
Tata Dios llakichiwashpa yanapawanka.
18Chikniwak runakunawan makanakuptini
ama wañuchiwanankunapa
Tata Dios yanapawanka.
Paykuna aypa kaptinkunapish yanapawanka.
19Paykuna mana Tata Diosta manchashpa
mana allikunallata rurashpa kawsansapa.
Chayrayku mana tukuyniyukta
sinchi kamachikuk Tata Dios
chikniwak runakunata kastigashpa upallayachinka.
20Paykunaka kuyanakukmasinkunawan makanakunsapa.
Allimata kawsanankunapa parlashkankunawasha kunkashpa chikninakunsapa.
21Mishki shimi tukushpa parlansapa.
Chashna parlashpankunapish
makanakuyllata yuyansapa.
Mishki shimi tukushpa parlashpankunapish
chikninakushpalla kawsansapa.
22Akuychi tukuy yuyananchikunata
Tata Diosta willaypachi.
Chashna willaptinchikuna payka yanapawashunchisapa
allillata rurashpa kawsananchikunapa.
Tata Diosta kasuptinchikuna
payka yanapawanchisapa ama uchallikunanchikunapa.
23A, Tata Diosnini,
wañuchikuk llullakuk runakuna
mana unaytachu kawsankasapa.
Paykunata kulluchinkisapa.
Chashnapish kaptin
ñukaka yachani yanapawanaykita.
Chwazi Kounye ya:
SALMO 55: qvs
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 1992, 2008, Wycliffe Bible Translators, Inc. All rights reserved.