Mataos 4
4
Satan lé eboblo Yesʉs
(Markus 1.12-13; Lʉkas 4.1-13)
1Mbɨambɨa Sisim ntɔʼ to e Yesʉs é feha si. Nye a to e nye gʉʼ ó, Njwɨɨ moleme bobla nye. 2Nye a di gʉʼ lé eti mode ó, tɔɔ mɨmoho mowʉm monâ ndwe e mɨpum mowʉm monâ. Nye ntɔʼ joʼo za. 3Satan ze pyal gumo Yesʉs a be e. Nye e nye ó: «Yé be ó, go ó Mwan mo Zyɛm nɛʼɛ, lɛŋɨ mokoʼ maʼ ó, mé lihba bɨbler.» 4Yesʉs ntɔʼ lɛɛ ó: «Yé ó tila é Kalara Zyɛm ó: “Mʉr, nye abe e nkul etiʼe njɨ e mode mé ome. Nye etiʼe ó, ebe ekan lɨlɛh lé epyal é nʉm mo Zyɛm ɨ.”»
5Njwɨɨ moleme ze nʉa nye, ze to e nye é nkana ndɨ e l'ekɛn ɨ. Nye ze cyel nye é lon Mpah Zyɛm. 6Nye e nye ó: «Yé be ó, go ó Mwan mo Zyɛm wa, lyaha, to cyɛb si, ebe, yé ó tila é Kalara Zyɛm ó:
“Zyɛm ótiile beengles be etie é lɔb go.
Bé ónkɛɛ go e mobo mɔɔ
é l'efu ó, kʉ nkʉʼ be, agʉra é l'ekoʼ.”»
7Yesʉs ze bɨha e nye ó: «Hɨʼɨ! Ebe, yé nteme, yé ó tila é Kalara Zyɛm ó: “Aboblo Sɔŋ go Da Zyɛm.”»
8Njwɨɨ moleme ntɔʼ bâʼle ze nʉa nye, to e nye é nʉa ecwɨʼ lé a be é bul jaa kʉ ɨ. Nye ze lɛʼle nye mɨlal mɨ si nwaʼ mimyɛh, le okum e l'ogbaa o mɨlal myaa. 9Njwɨɨ moleme, nye e nye ó: «ǃGo si bɨʼ mpom go si é mih mam, lé edwiibɨ me wa, me kʉ dwe go bɨsa biʼ bibyɛh.» 10Yesʉs ntɔʼ bɨha e nye ó: «Satan, pʉʼa me é mih! Ebe, yé ó tila é Kalara Zyɛm ó: “Go ejʉʼa le ebɨʼ mpom go si é mih mo Sɔŋ go Da Zyɛm. Dwiibɨ mʉr ó, njɨ nye.”»
11Pie tɨʼ ó Njwɨɨ moleme a bir nye, laa ɛ. Beengles ze pyal, bé ntɔʼ taare lé esea e Yesʉs.
Etɛɛrɨ e syɛɛ mo Yesʉs ɨ Galɨle
(Markus 1.14-15; Lʉkas 4.14-15)
12Yesʉs ze joʼo lɔɔ ó, bé a si gba Yʉanes é mbʉʼ. Nye ze bâʼle to Galɨle. 13No ó nye a mʉa ɨ Nazarɛt, ntɔʼ to di Kapernaʉm é nkpah maŋ. Yé ó é lal mo Zabulon bé e Nɛftali. 14Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Ezayi ó:
15«Kul bʉr mo Zabulon, bʉr o Nɛftali,
bɨn ó ndɨ nko maŋ ndɨ ɨ.
Bɨn ó ndɨ é l'opɨn o dibe Yʉrdɛŋ.
Bʉr o Galɨle, gumo bʉr o ndɨ abe oYʉden ɨ lé ebuo e!
16Baa b'a taare be é l'edurʉ ɨ,
bɨ bee bwaʼbwaʼ myɛn!
Bʉr o b'a di-di é ka foo e, bé mu ó é myɛn!»
17É dobo laa ó Yesʉs a ze taare lé etuno ó: «Gwɨma ga mobebe mɨn ɔɔ! Bɨn bé à dwir mɨleme ɔɔ! Ebe, jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ!»
Yesʉs lé ejebe ompʉn be efoʼ be
(Markus 1.16-20; Lʉkas 5.1-11; Yʉanes 1.35-51)
18Yesʉs a be ó lé ekœʼ é nkpah maŋ mo Galɨle. Nye ntɔʼ ze bee bʉr oba, Simɔn a jebɔ ó, Pyɛr ɨ, bé e ncyom we Andreas. Bé a be ó lé ela okʉa é modibe maŋ, ebe, bé a be ó olɛa be okʉa. 19Nye ntɔʼ lɛɛ e be ó: «Duʼo ga me. Me ósa ó, bɨn diʼe ogohla o bʉr.» 20Cye e cye yaa, bé ntɔʼ liʼe okʉa bɔɔ, duŋɔ nye.
21Nye ze laa naa, ntɔʼ bee bʉʉ obɨɔ ofih oba, bwan mo Zebede, Jacques bé e ncyom we Yʉanes. Bé a be ó si syel byɛl wɔɔ. Bé e sɔŋ wɔɔ Zebede, bé a be ó tɨʼ lé ekomlo okʉa bɔɔ. Nye ntɔʼ jebe be. 22Cye e cye yaa, bé ntɔʼ mʉa, liʼɔ byɛl wɔɔ le sɔŋ wɔɔ, ntɔʼ duŋɔ nye.
Yesʉs lé etiʼ mɨsyoblʉ
(Markus 1.39; Lʉkas 4.44; 6.17-18)
23No ó Yesʉs a to le ekœʼ é bɨgumo bɨ Galɨle bibyɛh, to le eyeʼle bʉr é mompah mɨnjwɨʼla mɔɔ, le elɛɛ Mbɨambɨa Lɔɔ lé etiibe e jwɨ̀ʼa mo Da ɛ, le etiʼ mɨsyoblʉ mɨ kul bʉr ye, lé epɛʼ mosyɛb mɨmɛh le bɨjyɛm bibyɛh. 24No ó lɔɔ waa, wé a ze jʉŋla mpʉ kol eboʼ, jala lal Siria wiwɛh. Bé ze ze e mɨsyoblʉ boo nye: baa b'a be lé ejaʼra e mosyɛb e mokpaa mɨmbi mɨmbi ɨ, bʉr o b'a sia e moleme e, baa b'a sile-sile bʉʼ ɨ, le mɨsyoblʉ myé a be-be mɨmbʉmbʉʼ é mɨtɔɔ ɛ. Nye ze tiʼ be. 25Momɛl mo bʉr, mé a be ó lé edu nye é koo pihe, baʼ duho Galɨle, bʉʉ duho lal ndɨ e bɨnkana ewʉm ɨ, bʉʉ nteme duho nkana Yerʉsalɛm le lal Yʉda le é pɨn dibe Yʉrdɛŋ nkɔm-nkɛɛ.
Chwazi Kounye ya:
Mataos 4: ozmBad
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2002, Wycliffe Bible Translators, Inc. All rights reserved.