KENESE, 5
5
O LE MATAUPU V.
O gafa ma tausaga o tupuga, e afua mai ia Atamu e oo ia Noa.
1O le tusi lenei i le gafa o Atamu. O le aso na faia ai e le Atua le tagata na ia faia o ia ua faatusa i le Atua. 2Na ia faia i laua, o le tane ma le fafine, na ia faamanuia foi ia te i laua, ma na faaigoaina ai o la igoa o Atamu, i le aso na faia ai i laua. 3Na ola Atamu i tausaga e tasi le selau ma le tolugafulu, ona fanaua lea e ia o lona atalii e foliga ia te ia ma faatusa i ai; ma ua faaigoaina e ia lona igoa o Setu. 4O aso lava o Atamu talu ina fanauina e ia o Setu e valu selau o ona tausaga, ma ua fanaua ai e ia o atalii ma afafine. 5O aso uma foi na ola ai Atamu, e iva selau ma le tolu gafulu, o ona tausaga ia; ona oti ai lea.
6Na ola Setu i tausaga e tasi le selau ma le lima, ona fanaua lea e ia o Enosa. 7O le olaga foi o Setu talu ina fanauina e ia o Enosa, o tausaga e valu selau ma le fitu ia, ma ua fanaua ai e ia o atalii ma afafine. 8O aso uma foi o Setu e iva selau ma le sefulu ma le lua, o ona tausaga ia; ona oti ai lea.
9Na ola Enosa i tausaga e ivagafulu, ona fanaua lea e ia o Kainano. 10O le olaga foi o Enosa talu ina fanauina e ia o Kainano, o tausaga ia e valu selau ma le sefulu ma tausaga e lima, ma ua fanaua ai e ia o atalii ma afafine. 11O aso uma foi o Enosa e iva selau ma le lima, o ona tausaga ia; ona oti ai lea.
12Na ola Kainano i tausaga e fitugafulu, ona fanaua lea e ia o Maalaelu. 13O le olaga foi o Kainano talu ina fanauina e ia o Maalaelu, o tausaga ia e valu selau ma le fagafulu, ma ua fanaua ai e ia o atalii ma afafine. 14O aso uma foi o Kainano e iva selau ma le sefulu, o ona tausaga ia; ona oti ai lea.
15Na ola Maalaelu i tausaga e onogafulu ma le lima, ona fanaua ai lea e ia o Iareto. 16O le olaga foi o Maalaelu talu ina fanauina e ia o Iareto, o tausaga ia e valu selau ma le tolugafulu, ma ua fanaua ai e ia o atalii ma afafine. 17O aso uma foi o Maalaelu e valu selau ma le ivagafulu ma le lima, o ona tausaga ia; ona oti ai lea.
18Na ola Iareto i tausaga e tasi le selau ma le onogafulu ma tausaga e lua, ona fanaua ai lea e ia o Enoka. 19O le olaga foi o Iareto talu ina fanauina e ia o Enoka, o tausaga e valu selau ia, ma ua fanaua ai e ia o atalii ma afafine. 20O aso uma foi o lareto e iva selau ma le onogafulu ma le lua, o ona tausaga ia; ona oti ai lea.
21Na ola Enoka i tausaga e onogafulu ma le lima, ona fanaua ai lea e ia o Metusela. 22Na la feooai foi o Enoka ma le Atua talu ina fanauina e ia o Metusela, i tausaga e tolu selau, ma ua fanaua ai e ia o atalii ma afafine. 23O aso uma foi o Enoka e tolu selau ma le onogafulu ma le lima, o ona tausaga ia. 24Na la feooai foi o Enoka ma le Atua; ua le iloa foi e ia, auā na avea o ia e le Atua.
25Na ola Metusela i tausaga e selau ma le valugafulu ma tausaga e fitu, ona fanaua ai lea e ia o Lameko. 26O le olaga foi o Metusela talu ina fanauina e ia o Lameko, o tausaga ia e fitu selau ma le valugafulu ma tausaga e lua, ma ua fanaua ai e ia o atalii ma afafine. 27O aso uma foi o Metusela e iva selau ma le onogafulu ma le iva, o ona tausaga ia; ona oti ai lea.
28Na ola Lameko i tausaga e selau ma le valugafulu ma tausaga e lua, ona fanaua ai lea e ia lona atalii, 29ma ua faaigoaina e ia lona igoa o Noa, o loo faapea. E faamafanafanaina i tatou e ia i la tatou galuega ma le tiga o tatou lima, ona o le laueleele ua malaia ia Ieova. 30O le olaga foi o Lameko talu ina fanauina e ia o Noa, o tausaga ia e lima selau ma le ivagafulu ma tausaga e lima, ma ua fanaua ai e ia o atalii ma afafine. 31O aso uma foi o Lameko e fitu selau ma le fitugafulu ma le fitu, o ona tausaga ia; ona oti ai lea.
32Ua lima selau tausaga o Noa, ona fanaua ai lea e Noa o Semu, ma Hamo, ma Iafeta.
Chwazi Kounye ya:
KENESE, 5: SOV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Samoan Edited Old Version © Bible Society of the South Pacific, 2017.