ᓭᐣᐟ ᒑᐣ 4
4
1ᐃᐢᐱ ᒫᑲ ᑳ ᑎᐯᔨᐦᒋᑫᐟ ᑫᐢᑫᔨᑕᕽ ᓵᓴᐩ ᐁ ᑭ ᐯᑕᒥᔨᐟ ᐸᕒᐊᓯᐊᐧ ᓇᐊᐧᐨ ᒥᐦᒉᐟ ᒋᓴᐢ ᐁ ᐅᓯᐋᐟ ᒥᓇ ᐁ ᐸᑊᑕᐃᓯᐃᐧᐋᐟ, ᑭᐢᑭᓄᐦᐊᒪᐋᐧᑲᓇ ᐃᐢᐱᐨ ᒐᐣ, 2(ᐋᑕᐃᐧᔭ ᒋᓴᐢ ᓇᒪᐃᐧᔭ ᑫᐦᒋᐋᐧᐠ ᐃᐧᔭ ᐸᑊᑕᐃᓯᐃᐧᐃᐁᐧᐤ, ᐱᑯ ᐅ ᑭᐢᑭᓄᐦᐊᒪᐋᐧᑲᓇ,) 3ᑭ ᓇᑲᑕᒼ ᒍᑎᐊ, ᐁ ᑭ ᓯᐯᐧᑌᐟ ᒫᑲ ᐁ ᐃᑐᐦᑌᐟ ᑲᓬᐊᓬᐃᕽ. 4ᐱᑯ ᒫᑲ ᑭᑕ ᐊᑎ ᓵᐳᐢᑲᕽ ᓴᒣᕒᐃᐊ.
5 #
ᒉᓂᓯᐢ 33:19; ᒑᐢᔪᐊ 24:32 ᑭ ᑕᑯᓯᐣ ᒫᑲ ᓴᒣᕒᐃᐊ ᐅᑌᓇᕽ, ᓴᐃᑲᕒ ᑳ ᐃᓯᔨᐦᑳᑌᐠ, ᒋᑭ ᐁᑯᑕ ᐁ ᐊᔮᐠ ᐊᐢᑭ ᒉᑲᑊ ᑳ ᑭ ᒥᔭᐟ ᐅᑯᓯᓴ ᒍᓯᐸ. 6ᐁᑯᑕ ᒫᑲ ᑭ ᐃᐦᑕᑲᐧᓂᔨᐤ ᒉᑲᑊ ᐅ ᒧᓇᐦᐃᐹᐣ. ᒋᓴᐢ ᒫᑲ ᐁ ᐊᔦᐢᑯᓯᐟ ᐁ ᑭ ᐱᒧᐦᑌᐟ, ᑭ ᓇᐦᐊᐱᐤ ᒧᓇᐦᐃᐹᓂᕽ; ᓈᓂᑕᐤ ᓂᑯᑕᐧᓯᐠ ᑭ ᐃᐢᐸᔨᐤ ᑎᐸᐦᐃᐱᓯᒫᐧᐣ.
7ᑭ ᐯ ᑕᑯᓯᐣ ᒫᑲ ᓴᒣᕒᐃᐊ ᐃᐢᑫᐧᐤ ᐁ ᐯ ᓈᑕᕽ ᓂᐱ, ᒋᓴᐢ ᒫᑲ ᑭ ᐃᑌᐤ, ᒥᓇᐦᐃᐣ. 8(ᒋᑫᒫ ᐅ ᑭᐢᑭᓄᐦᐊᒪᐋᐧᑲᓇ ᐃᐧᔭ ᑭ ᐃᑐᐦᑌᔨᐊᐧ ᐅᑌᓈᕽ ᐁ ᓇᑕᐃᐧ ᐊᑕᐁᐧᔨᐟ ᑭᑕ ᒥᒋᒋᐠ.)
9 #
ᐁᐢᕒᐊ 4:1-5; ᓂᐦᐃᒫᔭ 4:1,2 ᐅᒥᓯ ᒫᑲ ᐃᑎᐠ ᓴᒣᕒᐃᐊ ᐃᐢᑫᐧᐊᐧ, ᑖᓀᑭ ᑭᔭ ᐁ ᒍᐃᐧᔭᐣ, ᑳ ᓇᑐᑕᒪᐃᐧᔭᐣ ᑭᑕ ᒥᓇᐦᐃᑖᐣ, ᓂᔭ ᐁ ᓴᒣᕒᐃᐊ ᐃᐢᑫᐧᐃᐧᔮᐣ? ᒋᑫᒫ ᒍᐊᐧᐠ ᓇᒪᐃᐧᔭ ᐅᑐᑌᒥᒣᐊᐧᐠ ᓴᒣᕒᐃᑕᓇ. 10ᒋᓴᐢ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑭᐢᐱᐣ ᑭ ᑭᐢᑫᔨᑕᒪᐧᐟ ᑭᓭᒪᓂᑐ ᐅ ᒣᑭᐃᐧᐣ, ᒥᓇ ᐊᓇ ᑳ ᐃᑎᐢᐠ, ᒥᓇᐦᐃᐣ; ᑭ ᑳ ᑭ ᓇᑐᑕᒪᐋᐧ, ᐁᑯᓯ ᑭ ᑳ ᑭ ᒥᔨᑯ ᐱᒫᑎᓯᐃᐧᓂ ᓂᐱ. 11ᐃᐢᑫᐧᐤ ᒫᑲ ᐅᒥᓯ ᐃᑌᐤ, ᐅᑭᒫᐤ, ᓇᒪ ᑫᑲᐧᐩ ᑭᐟ ᐊᔮᐣ ᑭᑕ ᑳᐧᐸᐃᑳᑫᔭᐣ, ᒥᓇ ᔮᐃᐧᓈᑲᐧᐣ ᓂᐱ ᒧᓇᐃᐹᓂᕽ: ᑕᓂᑌ ᒫᑲ ᑭᔭ ᐁᐧᑎᓇᒪᐣ ᐊᓂᒪ ᐱᒫᑎᓯᐃᐧᓂ ᓂᐱ? 12ᐊᐊᐧᓯᒣ ᒋ ᑭ ᑭᐢᑌᔨᑖᑯᓯᐣ ᐃᐢᐱᐨ ᓄᑕᐃᐧᓈᐣ ᒉᑳᑊ, ᑳ ᑭ ᒥᔨᑯᔮᕽ ᐅᒪ ᒧᓇᐦᐃᐹᐣ, ᐃᑕ ᑳ ᑭ ᐅᐦᒋ ᒥᓂᑫᐧᐟ, ᒥᓇ ᐅᐟ ᐊᐊᐧᓯᒥᓴ, ᒥᓇ ᐅᐟ ᐊᐊᐧᑳᓇ? 13ᒋᓴᐢ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᐊᐃᐧᔭᐠ ᑫ ᒥᓂᑫᐧᑫᐧ ᐅᒪ ᓂᐱ ᑫᔮᐱᐨ ᑭᑕ ᓄᑌᔮᐸᑫᐧᐤ. 14ᐊᐃᐧᔭᐠ ᒫᑲ ᑫ ᒥᓂᑫᐧᑫᐧ ᓂᐱ ᑫ ᒥᔭᐠ ᓇᒪᐃᐧᑳᐨ ᑭᑕ ᓄᑌᔮᐸᑫᐧᐤ; ᒫᑲ ᐊᓂᒪ ᓂᐱ ᑫ ᒥᔭᐠ ᑭᑕ ᐃᓯ ᑭᑭᐢᑳᐠ ᒧᓇᐦᐃᐹᐣ ᐁ ᒧᐢᑭᒍᐊᐧᕽ ᑲᑭᑫ ᐱᒫᑎᓯᐃᐧᓂᕽ ᐃᓯ. 15ᐃᐢᑫᐧᐤ ᒫᑲ ᐅᒥᓯ ᐃᑌᐤ, ᐅᑭᒫᐤ, ᒥᔨᐣ ᐅᒪ ᓂᐱ, ᐁᑳ ᑭᑕ ᓄᑌᔮᐹᑫᐧᔮᐣ, ᒥᓇ ᐁᑳ ᑭᑕ ᐯ ᓈᑕᒫᐣ ᓂᐱ ᐅᑕ. 16ᒋᓴᐢ ᒫᑲ ᐅᒥᓯ ᐃᑌᐤ, ᓂᔮ, ᓇᑕᐃᐧ ᓇᑐᒼ ᑭ ᓈᐯᒼ, ᐯ ᐃᑐᑌᑲᐣ ᒫᑲ ᐅᑕ. 17ᐃᐢᑫᐧᐤ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᓇᒪᐃᐧᔭ ᓄ ᓈᐯᒥᐣ. ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑲᐧᔭᐢᐠ ᑭᐟ ᐃᑖᐧᐣ ᑳ ᐃᑌᐧᔭᐣ, ᓇᒪᐃᐧᔭ ᓄ ᓇᐯᒥᐣ: 18ᒋᑫᒫ ᑭ ᓂᔮᓇᓂᐊᐧᐠ ᑭ ᓈᐯᒪᐠ; ᐊᓇ ᒫᑲ ᐊᓄᐦᐨ ᑳ ᐃᐧᒉᐊᐧᐟ ᓇᒪᔦᐤ ᑭ ᓇᐯᒼ; ᐁᑲᐧᓂ ᐁ ᑖᐯᐧᔭᐣ ᑳ ᐃᑌᐧᔭᐣ. 19ᐃᐢᑫᐧᐤ ᒫᑲ ᐅᒥᓯ ᐃᑌᐤ, ᐅᑭᒫᐤ, ᓂ ᓂᓯᑕᐃᐧᓀᐣ ᐁ ᑭᐢᑭᐁᐧᐦᐃᑫᐃᐧᔨᓂᐁᐧᔭᐣ. 20ᓄᑕᐃᐧᓇᓇᐠ ᑭ ᑕᓯ ᐊᔭᒥᐊᐊᐧᐠ ᐅᑕ ᐊᐧᒋᕽ; ᑭᔭᐋᐧᐤ ᒫᑲ ᑭᐟ ᐃᑖᐧᓈᐋᐧᐤ, ᒉᕒᐅᓴᓬᐊᒥᕽ ᐁᑯᑕ ᐅ ᑲ ᐊᔭᒥᐦᐋᑖᐋᐧᐤ ᐊᔨᓯᔨᓂᐊᐧᐠ.
21ᒋᓴᐢ ᒫᑲ ᐅᒥᓯ ᑭ ᐃᑌᐤ, ᐃᐢᑫᐧᐤ, ᑖᐯᐧᑕᐃᐧᐣ, ᐹᐸᔨᐤ ᑎᐸᐦᐃᐱᓯᒫᐧᐣ, ᐁᑯᐢᐱ ᓇᒪᐃᐧᔭ ᐅᑕ ᐊᐧᒋᕽ ᓇᒪᐃᐧᔭ ᒥᓇ ᒉᕒᐅᓴᓬᐊᒥᕽ, ᑭ ᑲ ᐊᔭᒥᐦᐁᐢᑕᐊᐧᐋᐧᐤ ᐁᐧᔪᑖᐃᐧᕽ. 22ᑭᔭᐋᐧᐤ ᑭᐟ ᐊᔭᒥᐁᐢᑎᓈᐋᐧᐤ ᐊᓂᒪ ᐁᑳ ᑳ ᑭᐢᑫᔨᑕᒣᐠ: ᓂᔭᓈᐣ ᐃᐧᔭ ᓂ ᑭᐢᑫᔨᑌᓈᐣ ᑳ ᐊᔭᒥᐦᐁᐢᑕᒫᕽ; ᒋᑫᒫ ᐱᒪᒋᐃᐁᐧᐃᐧᐣ ᒍᐃᐧᓈᕽ ᐅᐦᒋᐸᔨᐤ. 23ᒫᑲ ᐹᐸᔨᐤ ᐃᔨᑯᕽ ᓵᓴᐩ ᐃᓴ ᐱᑯ; ᐃᐢᐱ ᐊᓂᑭ ᑲᐧᔭᐢᐠ ᑳ ᐊᔭᒥᐊᒋᐠ ᑫ ᐊᔭᒥᐦᐁᐢᑕᐋᐧᒋᐠ ᐁᐧᔪᑖᐃᐧᕽ ᐊᐦᒑᐦᑯᕽ ᒥᓇ ᑖᐯᐧᐃᐧᓂᕽ: ᒋᑫᒫ ᐁᑯᑐᐊᐧ ᑳ ᓇᑕᐁᐧᔨᒫᐟ ᐁᐧᔪᑖᐃᐧᕽ ᑭᑕ ᐊᔭᒥᐁᐢᑖᑯᐟ. 24ᐊᐦᒑᐦᑯᐃᐧᐤ ᑭᓭᒪᓂᑐ; ᐊᓂᑭ ᒫᑲ ᑳ ᐊᔭᒥᐦᐁᐢᑕᐋᐧᒋᐠ ᐱᑯ ᑭᑕ ᐊᔭᒥᐦᐁᐢᑕᐊᐧᒋᐠ ᐊᐦᒑᐦᑯᕽ ᒥᓇ ᑖᐯᐧᐃᐧᓂᕽ. 25ᐃᐢᑫᐧᐤ ᒫᑲ ᐅᒥᓯ ᐃᑌᐤ, ᓂᑭᐢᑫᔨᑌᐣ ᒣᓴᔭᐢ ᑭᑕ ᑕᑯᓯᕽ, ᙭ ᑳ ᐃᓯᔨᐦᑳᓱᐟ; ᐃᐢᐱ ᒫᑲ ᑕᑯᓯᑭ ᑭ ᑳ ᐃᐧᐦᑕᒪᑯᓇᐤ ᑲᐦᑭᔭᐤ ᑫᑲᐧᐩ. 26ᒋᓴᐢ ᒫᑲ ᐅᒥᓯ ᐃᑌᐤ, ᓂᔭ ᑳ ᐊᔭᒥᐃᑖᐣ ᐁᐊᐧᑯ.
27ᐁᑯᑕ ᒫᑲ ᐅᒪ ᑕᑯᓯᓂᔨᐊᐧ ᐅ ᑭᐢᑭᓄᐦᐊᒪᐋᐧᑲᓇ, ᑭ ᒫᒪᐢᑳᑕᒥᔨᐊᐧ ᒫᑲ ᐁ ᐃᐧᒋ ᐱᑭᐢᑫᐧᒫᔨᐟ ᐃᐢᑫᐧᐊᐧ; ᒫᑲ ᓇᒪ ᐊᐃᐧᔭᐠ ᐃᑌᐤ, ᑫᑲᐧᐩ ᓀᑐᓇᒪᐣ? ᐊᐦᐳ, ᑖᓀᑭ ᑳ ᐃᐧᒋ ᐱᑭᐢᑫᐧᒪᐟ ᐊᐊᐧ? 28ᑭ ᓇᑲᑕᒼ ᒫᑲ ᐊᓇ ᐃᐢᑫᐧᐤ ᐅ ᑳᐧᐱᑳᑲᐣ, ᐁ ᑭ ᐃᑐᐦᑌᐟ ᐅᑌᓈᕽ, ᐁᑯᓯ ᐁ ᐃᑖᐟ ᐊᔨᓯᔨᓂᐊᐧ, 29ᐋᐢᑕᒥᑎᐠ, ᐯ ᐋᐧᐸᒥᕽ ᐊᔨᓯᔨᓂᐤ, ᑳ ᐃᐧᐦᑕᒪᐃᐧᐟ ᑲᐦᑭᔭᐤ ᑫᑲᐧᐩ ᑳ ᑭ ᐯ ᐊᔨᓯᒋᑫᔮᐣ; ᓇᒪ ᒋ ᐁᐊᐧᑯ ᐊᐊᐧ ᙭? 30ᐁᑯᓯ ᒫᑲ ᑭ ᐯ ᐊᐧᔭᐃᐧᐊᐧᐠ ᐅᑌᓈᕽ ᐅᐦᒋ, ᐁ ᐯ ᓇᑕᐋᐧᐸᒫᒋᐠ.
31ᐁᑯᓯ ᐃᐢᐱᒋ ᐅ ᑭᐢᑭᓄᐦᐊᒪᐋᐧᑲᓇ ᑭ ᑕᓯᒥᐠ, ᐁ ᐃᑎᑯᐟ, ᕒᐋᐸᐩ, ᒥᒋᓱ. 32ᒫᑲ ᐅᒥᓯ ᑭ ᐃᑌᐤ, ᓂᐟ ᐊᔮᐣ ᒥᒋᐃᐧᐣ ᑭᑕ ᒥᒋᔮᐣ ᐁᑳ ᑭᔭᐋᐧᐤ ᑳ ᑭᐢᑫᔨᑕᒣᐠ. 33ᐁᐊᐧᑯ ᒫᑲ ᐅᐦᒋ ᑭ ᐊᔨᑎᑐᐊᐧᐠ ᑭᐢᑭᓄᐦᐊᒪᐋᐧᑲᓇᐠ, ᐊᐃᐧᔭ ᒋ ᑫᑲᐧᐩ ᑭ ᐯᑕᒫᐠ ᑭᑕ ᒥᒋᐟ. 34ᒋᓴᐢ ᒫᑲ ᐅᒥᓯ ᐃᑌᐤ, ᐁᐊᐧᑯ ᓂᔭ ᓂ ᒥᒋᐃᐧᐣ ᑭᑕ ᐃᑐᑕᒫᐣ ᐅᐟ ᐃᑌᔨᑕᒧᐃᐧᐣ ᑳ ᑭ ᐯ ᐃᓯᑎᓴᐦᐅᐟ, ᒥᓇ ᑭᑕ ᑭᓯᑕᐊᐧᐠ ᐅᐟ ᐊᑐᐢᑫᐃᐧᐣ. 35ᓇᒪ ᒋ ᑭᐟ ᐃᑖᐧᓈᐋᐧᐤ, ᑫᔮᐱᐨ ᓀᐅ ᐱᓯᒼ, ᐁᑲᐧ ᒫᑲ ᑫ ᒪᓂᓯᑫᕽ? ᒋᐢᐟ, ᑭᐟ ᐃᑎᓈᐋᐧᐤ, ᐃᐢᐹᑫ ᐃᑖᐱᐠ, ᑲᓇᐋᐧᐸᐦᑕᒧᐠ ᑭᐢᑎᑳᓇ; ᓵᓴᐩ ᐊᐧᐸᐢᑯᓯᐊᐧᐢᑌᐊᐧ ᑭᑕ ᒪᓂᓯᑫᕽ. 36ᐊᓇ ᒫᑲ ᑳ ᒪᓂᓯᑫᐟ ᐅᑎᓯᐤ ᑎᐸᐊᒪᑯᐃᐧᐣ, ᒥᓇ ᒫᐊᐧᒋᑕᐤ ᒥᓂᓯᐃᐧᐃᐧᐣ ᑳᑭᑫ ᐱᒫᑎᓯᐃᐧᓂᕽ; ᒫᒪᐃᐧ ᒫᑲ ᐊᓇ ᑫᐢᑎᑫᐟ ᒥᓇ ᐊᓇ ᑳ ᒪᓂᓯᑫᐟ ᑭᑕ ᒥᔭᐋᐧᑕᑭᐠ. 37ᐁᐊᐧᑯ ᐅᒪ ᑎᔭᐯᐧᒪᑲᕽ ᐃᑌᐧᐃᐧᐣ, ᐯᔭᐠ ᑭᐢᑎᑫᐤ, ᒥᓇ ᑯᑕᐠ ᒪᓂᓯᑫᐤ. 38ᑭ ᑭ ᐃᓯᑎᓴᐦᐅᑎᓈᐋᐧᐤ ᑭᑕ ᓇᑕᐃᐧ ᒪᓂᓯᑫᔦᐠ ᐃᑕ ᐁᑳ ᑭᔭᐋᐧᐤ ᐁ ᐅᐦᒋ ᐊᑐᐢᑫᔦᐠ; ᑯᑕᑲᐠ ᐊᔨᓯᔨᓂᐊᐧᐠ ᑭ ᐊᑐᐢᑫᐊᐧᐠ, ᑭ ᐱᑐᑳᓈᐋᐧᐤ ᒫᑲ ᐅᐟ ᐊᑐᐢᑫᐃᐧᓂᐋᐧᕽ.
39ᒥᐦᒉᐟ ᒫᑲ ᓴᒣᕒᐃᑕᓇ ᐅᑌᓈᕽ ᑭ ᑖᐯᐧᔦᔨᒥᐠ ᐁ ᑭ ᐋᒋᒥᑯᐟ ᐃᐢᑫᐧᐊᐧ, ᐅᒥᓯ ᐁ ᑭ ᐃᑖᒋᒧᔨᐟ, ᓂ ᑭ ᐃᐧᐦᑕᒫᐠ ᑲᐦᑭᔭᐤ ᑳ ᑭ ᐯ ᐊᔨᓯᒋᑫᔮᐣ. 40ᐃᐢᐱ ᒫᑲ ᓴᒣᕒᐃᑕᓇ ᑳ ᐯ ᐅᑎᐦᑎᑯᐟ, ᑭ ᑳᑭᓯᒧᑐᑖᐠ ᑭᑕ ᐃᐧᒋᐊᔮᒫᐟ; ᐁᑯᑕ ᒫᑲ ᑭ ᐊᔮᐤ ᓂᓱ ᑭᓯᑳᐊᐧ. 41ᒥᐦᒉᐟ ᒫᑲ ᐊᐊᐧᓯᒣ ᑭ ᑖᐯᐧᔦᔨᒥᐠ ᐃᐧᔭ ᐅᐟ ᐃᑌᐧᐃᐧᐣ ᐅᐦᒋ; 42ᐁᑯᓯ ᑭ ᐃᑌᐊᐧᐠ ᐊᓂᐦᐃ ᐃᐢᑫᐧᐊᐧ, ᐁᑲᐧ ᓂ ᑖᐯᐧᑌᓇᐣ, ᒫᑲ ᓇᒪᐃᐧᔭ ᑭᔭ ᑭᐟ ᐃᑌᐧᐃᐧᐣ ᐅᐦᒋ; ᒋᑫᒫ ᓂᔭᓈᐣ ᑎᐱᔭᐤ ᓂ ᐯᑕᐊᐧᓇᐣ, ᐁᑯᓯ ᒫᑲ ᓂ ᑭᐢᑫᔨᑌᓇᐣ ᑖᐯᐧ ᐁᐊᐧᑯ ᙭ ᐅᐱᒫᒋᐦᐃᐁᐧᐤ ᐊᐢᑭᕽ.
43ᑳ ᐳᓂ ᓂᓱ ᑭᓯᑳᐠ ᒪᑳ ᑭ ᓯᐯᐧᑌᐤ ᐁᑯᑕ ᐅᐦᒋ, ᐁ ᑭ ᐃᑐᐦᑌᐟ ᑳᓬᐊᓬᐃᕽ. 44#ᒫᐟᔪ 13:57; ᒫᕒᐠ 6:4; ᓬᐅᐠ 4:24ᒋᑫᒫ ᐃᐧᔭ ᑎᐱᔭᐤ ᒋᓴᐢ ᑭ ᐃᑌᐧᐤ, ᐁᑳ ᐁ ᐊᔮᐟ ᑭᐢᑌᔨᑖᑯᓯᐃᐧᐣ ᑎᐱᔭᐤ ᐅᐟ ᐊᐢᑭᕽ. 45#ᒑᐣ 2:23ᐁᑯᓯ ᒫᑲ ᐃᐢᐱ ᑳ ᑕᑯᓯᕽ ᑳᓬᐊᓬᐃᕽ, ᑳᓬᐊᓬᐃᐃᐧᔨᓂᐊᐧᐠ ᑭ ᐅᑎᓀᐊᐧᐠ, ᐁ ᑭ ᐋᐧᐸᐦᑕᐦᑭᐠ ᑲᐦᑭᔭᐤ ᑫᑲᐧᐩ ᑳ ᑭ ᐊᔨᑐᑕᒥᔨᐟ ᒉᕒᐅᓴᓬᐊᒥᕽ ᒣᑳᐧ ᐃᐧᐦᑯᐦᑐᐃᐧᓂᕽ; ᒋᑫᒫ ᐃᐧᐢᑕᐋᐧᐤ ᑭ ᐃᑐᐦᑌᐊᐧᐠ ᐃᐧᐦᑯᐦᑐᐃᐧᓂᕽ.
46 #
ᒑᐣ 2:1-11
ᒋᓴᐢ ᒫᑲ ᒥᓇ ᑭ ᐯ ᐃᑐᐦᑌᐤ ᑫᓇᐃᕽ ᑲᓬᐊᓬᐃᕽ, ᐃᑕ ᑳ ᑭ ᓱᒥᓈᐳᑫᐟ ᓂᐱᔨᐤ. ᐁᑯᓯ ᑭ ᐊᔮᐤ ᐁᑭᒪᐤ, ᐅᑯᓯᓴ ᐁ ᐊᑯᓯᔨᐟ ᑫᐸᕒᓀᐊᒥᕽ. 47ᐃᐢᐱ ᒫᑲ ᑳ ᐯᐦᑕᕽ ᐁ ᑭ ᐯ ᑕᑯᓯᓂᔨᐟ ᒋᓴᓴ ᑲᓬᐊᓬᐃᕽ ᒍᑎᐊᐃᕽ ᐁ ᑭ ᐯ ᐅᑐᑌᔨᐟ, ᑭ ᓇᑌᐤ, ᑭ ᓇᑕᐃᐧ ᑲᑭᓯᒧᑐᑕᐁᐧᐤ ᑭᑕ ᐯ ᐃᑐᐦᑌᔨᐟ, ᑭᑕ ᐃᔨᓂᑲᐦᐋᔨᐟ ᐅᑯᓯᓴ; ᒋᑫᒫ ᓵᓴᐩ ᑫᑲᐟ ᐁ ᓂᐱᔨᐟ. 48ᐁᑯᓯ ᒫᑲ ᒋᓴᐢ ᑭ ᐃᑌᐤ, ᑭᐢᐱᐣ ᐁᑳ ᐋᐧᐸᐦᑕᒣᑯ ᑭᐢᑭᓇᐊᐧᒋ ᐃᓯᐦᒋᑫᐃᐧᓇ ᒥᓇ ᑳ ᒪᒪᐢᑲᑌᔨᑖᑲᐧᑭ, ᓇᒪᐃᐧᔭ ᑭ ᑳ ᑖᐯᐧᑌᓈᐋᐧᐤ. 49ᐊᓇ ᒫᑲ ᐅᑭᒫᐤ ᐅᒥᓯ ᐃᑌᐤ, ᐅᑭᒫᐤ, ᐯ ᐃᑐᐦᑌ ᒪᐧᔦᐢ ᓂᐱᐟ ᓂᐟ ᐊᐊᐧᓯᒥᐢ. 50ᒋᓴᐢ ᒫᑲ ᐅᒥᓯ ᐃᑌᐤ, ᓂᔭ ᑭᐁᐧ; ᐱᒫᑎᓯᐤ ᑭᑯᓯᐢ. ᐊᓇ ᒫᑲ ᐊᔨᓯᔨᓂᐤ ᑭ ᑖᐯᐧᑕᒼ ᐃᑌᐧᐃᐧᐣ ᑳ ᑭ ᐃᑎᑯᐟ ᒋᓴᓴ, ᑭ ᓯᐯᐧᑌᐤ ᒫᑲ. 51ᒣᑳᐧᐨ ᒫᑲ ᐁ ᐊᑎ ᑭᐁᐧᐟ, ᑭ ᓇᑭᐢᑳᐠ ᐅᐟ ᐊᑐᐢᑫᔮᑲᓇ, ᒥᓇ ᑭ ᐃᐧᐦᑕᒫᐠ, ᐅᒥᓯ ᐁ ᐃᑎᑯᐟ, ᐱᒫᑎᓯᐤ ᑭᑯᓯᐢ. 52ᑭ ᑲᑫᐧᒋᒣᐤ ᒫᑲ ᐁ ᐃᐢᐸᔨᐟ ᒣᐧᐦᒋ ᑎᐸᐦᐃᐱᓯᒫᐧᐣ ᐃᐢᐱ ᓇᐊᐧᐨ ᑳ ᐊᑎ ᒥᔪ ᐊᔭᔨᐟ. ᐅᒥᓯ ᒫᑲ ᑭ ᐃᑌᐊᐧᐠ, ᐅᑖᑯᓯᕽ ᑌᐸᑯᑊ ᐁ ᐃᐢᐸᔨᐟ ᑎᐸᐃᐱᓯᒫᐧᐣ ᐁᑯᐢᐱ ᑳ ᓇᑲᑎᑯᐟ ᑭᓯᓱᐃᐧᐣ. 53ᐁᑯᓯ ᒫᑲ ᑭ ᑭᐢᑫᔨᑕᒼ ᐊᓇ ᐅᑖᐃᐧᒫᐤ ᒣᐧᐦᒋ ᐁᐊᐧᑯ ᑎᐸᐃᑲᐣ ᒋᓴᓴ ᑳ ᑭ ᐃᑎᑯᐟ, ᐱᒫᑎᓯᐤ ᑭᑯᓯᐢ; ᐃᐧᔭ ᒫᑲ, ᒥᓇ ᑲᐦᑭᔭᐤ ᐃᐧᑭᕽ ᑳ ᐊᔮᔨᐟ ᑭ ᑖᐯᐧᑕᒪᐧᐠ. 54ᐁᐊᐧᑯ ᐅᒪ ᓂᓵᐧᐤ ᐁ ᑭ ᒪᒪᑕᐃᐧ ᐃᓯᐦᒋᑫᐟ ᒋᓴᐢ, ᐁ ᐯ ᐅᑐᑌᐟ ᒍᑎᐊᐃᕽ ᐁ ᑕᑯᓯᕽ ᒫᑲ ᑲᓬᐊᓬᐃᕽ.
Chwazi Kounye ya:
ᓭᐣᐟ ᒑᐣ 4: KKMs
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
This Bible text is a corrected edition of the 1908 Western Cree Bible; it is in the public domain.