Matthieu 9
9
1Nè nao mè to té, nao toura man té, nao béh la ndja.
2Wo, dèdè ndé rè té ke doou kada ke debe rè woei mbä, nè nto twa té la. Tokou Jésus wo ko mè té lodè, nè mpa nare doou ke debe rè woei mbä, Are mei isi dèkèkè, ngonem, né ke madjang loi goto nga.
3Wo, mare ndjè da maketourou ndedjidjé edji mèdè té, Doou nèn pa tar sä ke Allah.
4A mbata Jésus geré tar kedji lodè, nè mpana, Mbata di a edjidjé tar ke madjang mèsè té wa?
5Di baa to né ke ngeng wota wa, ta pana, Né ke madjang loi goto nga, aséh ta pana, I tarr, ndja ke gòli?
6A ta karesè egeridjé Ngon lo doou éh ke singa nange té nèn ta kïya né ke madjang, nè mpa nare doou ke debe rè woei mbä, I tarr, oun twa loi, ao kei loi.
7Nè nï tarr, nao kei la.
8Tokou dooudjé ke baya baya wo né nèn, bel dadè, dèdè dòsou gadji Allah ke are tè tokou ban dooudjé.
9Tokou Jésus ao ndai loou té ke nou, nè no mare doou ria na Matthieu, ke isi kei kouka narè lʼimpôt té. Nè mpa narè, Edé gom té. Nè nï tarr nao go Jésus té.
10Tokou Jésus isi ta table té mè kei té, wo, mare ndjè taa narè lʼimpôtdjé ke ndjè né da ke madjangdjé baya ndé, disi ke Jésus ke ndjè kao gè tédjé.
11Tokou Pharisiendjé wo né nèn, dèdè mpa dare ndjè kao go Jésus té, Mbata di a ndjè tòdjou tar losè ön mourou ke ndjè taa narè lʼimpôtdjé ke ndjè né da ke madjangdjé wa?
12Tokou Jésus wo tar nèn, nè mpana, Dooudjé ke isi ke rò too ang ndiki ndjè kouma ang, a dooudjé ke ndjè rò toodjé ndikè.
13Abidjé, esangidjé gel tar nèn, Mam ndiki mè madji, mam ndiki né polo ang, mbata mam ndé ta bar dooudjé ke gaté gaté ang, a ta bar dooudjé ke ndjè né da ke madjangdjé.
14Tokou ban, ndjè kao go Jean té dé rò Jésus té, pana, Mbata di a djèdjè ke Pharisiendjé djïya mourou ndò baya, a ndjè kao goi té ïya mourou ang wa?
15Jésus pa aredè, Ndò ke tokou basä taa dènè, a bo ndjè bokoradjé la dé rè té, a da nò tokou basä éh horodè té wa? Ndò ao dé ke dèdè da kòrou basä horodè té, ndè tén dèdè da kïya mourou.
16Doou kada a koun koubou ke siki ta kila nè kem koubou ke konè ang, mbata yéh ke siki a kwaa ngeng a tir bo boui.
17Dèdè dongou vin ke siki bar bòl vin té ang, tokou nda ban bòl vin a tir, ke vin a to koro ke bòl vin a toudjou. Dèdè dongou vin ke siki bòl vin té ke siki, tokou ban djokem to madji.
18Tokou nè nao mpa ban, wo, mbai kada dé ongou mekedjé gòlè nòè té, pana, Ngonem ke dènè woei bashénè ba, edé ila dji dè té a nè na kisi tébe.
19Jésus I tarr ao gè té ke ndjè kao gè tédjé tò.
20Wo, dènè kada ke rò too mese dè bal dòkou gérè djo, nè ndé go Jésus té, nòrou ta koubou la.
21Mbata nè mpa mèa té ndja, Tokou ma mòrou koubou la ba, rò too lom a goto.
22Tokou Jésus tourou rè woè, nè mpana, Are mei isi dèkèkè, ngonem ke dènè, ko mè té loi da ròi madji mbä. Loshénè loshénè rò too lo dènèn lé goto.
23Tokou Jésus dé kei té lo mbai, nè no dooudjé ke ndjè kòl tebe, ke dooudjé baya baya ke ourouki.
24Nè mpana, Abidjé, mbata ngon ke dènèn lé woei ang, nè ntibi. Dèdè nkoukè.
25Gè té ke nè ntouba dooudjé ke baya baya ta téh daka, nè nao mè kei té, nè nwaa dji ngon ke dènè, ke ngon ke dènè ï tarr.
26Tar nèn bar dò nange té ke nou toï.
27Tokou Jésus ndai loou té ke nou, dooudjé ke ndjè kem tò djo ao gè té. Dèdè mpa ke tarr, Eda mè madji kedjè, Ngon lo David.
28Tokou nè nao mè kei té mbä, ndjè kem tòdjé dé rè té, Jésus pa aredè, Sésè woidjé mèsè té ke ma mase ta da né nèn wa? Dèdè mpa darè, Aä, Mbaibé Seigneur.
29Tokou ban nè naa kemdè, mpana, Nda kesè ase ko mè té losè.
30Kemdè teï mbä. Jésus ndedjidè ngeng, pana, Are doou kada geré tar nèn ang.
31A dèdè ntéh dao mpa tar la loou té ke nange té ke nou toï.
32Tokou dèdè dao mbä, wo, dèdé ndé rò Jésus té ke doou ke éh ke ndil ke madjang, ke pa tar ang.
33Tokou nè ntouba ndil ke madjang ke daka, doou ke pa tar ang ao pa tar. Mè dooudjé ke baya baya ounda dò biä, mpana, Do né tokou ban ke Israël ndò kada leo ang.
34A Pharisiendjé pana, Nè ntouba ndildjé ke madjang deo mbai té lo ndildjé ke madjang.
35Jésus ndja ase loou tokou béh té ke ngan béh té lodè toï. Nè ntòdjou tar mè kei Allah té lodè, ke nè mpa tar ke madji lo béh kö, nè nòrou rò too toï ke né toï ke da ròdè madjang.
36Tokou nè no dooudjé ke baya baya, nè nda mè madji kedè, mbata dèdè disi madjang ke singa lodè goto, tokou batidjé ke ndjè kouldè goto.
37Bana nè mpa nare ndjè kao gè tédjé, Ko ke ndòò baya nya, a ndjè kouladjé éh baya ang.
38Tokou ban edoudjidjé Mbaibé ke ndjè ndòò ta koula ndjè kouladjé mè ndòò ko té la.
Chwazi Kounye ya:
Matthieu 9: KL1960
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 1960, 2018.
To learn more or sign up for email updates about the mission of BFBS, click here: