Revelasyon 19:1-10

Apre sa, mwen tande yon bri tankou vwa yon gwo foul moun nan syèl la ki t'ap pale byen fò. Yo t'ap di: — Lwanj pou Bondye nou an! Se li menm ki delivre nou. Tout onè, tout pouvwa se pou li. Li jije dapre laverite san patipri. Li kondannen gwo jennès ki t'ap pèvèti latè ak imoralite l la. Li pini l byen pini, paske li te mete san sèvitè Bondye yo deyò, li te touye yo. Yo t'ap di ankò: — Lwanj pou Bondye! Paske lafimen dife k'ap boule gwo lavil la ap moute pou tout tan. Vennkat granmoun yo ak kat kreyati vivan yo tonbe ajenou, yo adore Bondye ki chita sou fòtèy la. Yo t'ap di: — Wi se vre, beniswa letènèl Bondye nou an! Yon vwa pale fò kot fòtèy la, li t'ap di: — Ann fè lwanj Bondye nou an, nou tout k'ap sèvi li yo, nou tout nèt ki gen krentif pou li yo, piti kou gran! Apre sa, mwen tande yon bri tankou vwa yon gwo foul moun, tankou yon gwo dlo k'ap tonbe nan yon kaskad, ou ankò tankou yon gwo kout loray. Mwen tande yo t'ap di: — Lwanj pou Bondye! Paske Mèt la, Bondye nou ki gen pouvwa a, ap gouvènen tankou yon wa. Ann fè kè nou kontan! Ann kontan anpil! Ann chante pou li! Paske, lè a rive kounyeya pou fete maryaj ti Mouton an. Lamarye a pare. Yo ba l dwa abiye ak twal fen, byen klere, byen pwòp. (Twal fen an, se tout bagay pèp Bondye a te fè ki dwat devan Bondye.) Zanj lan di mwen: — Koulyeya, ou mèt ekri: Benediksyon pou tout moun yo envite nan resepsyon maryaj ti Mouton an! Apre sa li di mwen: — Pawòl sa yo se pawòl Bondye tout bon. Mwen lage kò m atè pou m adore li. Men, li di m: — Non, pa fè sa. Se sèvi m'ap sèvi Bondye ansanm avè ou, ansanm ak tout frè ou yo ki kenbe pawòl Jezi a byen fèm. Se Bondye pou ou adore. Pawòl Jezi a, se li menm ki nan bouch pwofèt yo.