Moun branch fanmi Galarad yo se desandan Maki yo ye. Maki sa a se te pitit Manase, yonn nan de pitit Jozèf yo. Chèf fanmi moun Galarad yo al jwenn Moyiz ak lòt chèf branch fanmi pèp Izrayèl la, yo di yo konsa:
— Senyè a te ba ou, Moyiz, lòd pou ou te separe peyi a bay chak branch fanmi Izrayèl la pa yo dapre sa ki va sòti pou yo lè y'a tire osò. Apre sa, Senyè a ta ba ou lòd pou ou te pran pòsyon ki pou Zelochad, fanmi nou an, pou ou bay pitit fi li yo. Men, si medam sa yo marye ak yon nonm ki fè pati yon lòt branch nan fanmi pèp Izrayèl la, pòsyon ki pou yo a pral sòti sou tè zansèt pa nou yo. Konsa, pòsyon tè ki pou branch fanmi nonm yo marye a pral vin pi plis, epi pòsyon tè ki te vin pou nou an lè yo te tire osò a pral vin pi piti. Lè lanne rejwisans lan va rive pou moun pèp Izrayèl yo, yo pral pran pòsyon tè ki te pou medam sa yo, yo pral wete l nan pa branch fanmi zansèt nou yo, yo pral mete l sou pa branch fanmi mari yo.
Se konsa, dapre lòd Senyè a te ba li, Moyiz bay moun pèp Izrayèl yo regleman sa a pou yo swiv. Li di yo konsa:
— Moun branch fanmi Jozèf yo gen rezon. Se poutèt sa, men lòd Senyè a bay: Pitit fi Zelochad yo lib marye moun yo vle, depi se yon moun ki nan menm branch fanmi ak yo. Pòsyon tè yon branch fanmi pa gendwa pase pou yon lòt branch fanmi. Konsa, pòsyon tè yon fanmi va toujou rete nan fanmi an. Si yon fi vin eritye yon pòsyon nan tè yonn nan branch fanmi pèp Izrayèl la, se pou l marye ak yon moun ki nan menm branch fanmi avè l. Konsa, chak moun va kenbe eritaj zansèt yo nan fanmi an. Tè yon branch fanmi p'ap ka pase pou yon lòt branch fanmi. Konsa, pòsyon tè ki pou yon fanmi va toujou rete nan fanmi an.
Se konsa, pitit fi Zelochad yo fè jan Senyè a te bay Moyiz lòd la. Mala, Tiza, Ogla, Milka ak Noa marye ak pitit gason tonton yo bò papa. Yo marye nan branch fanmi Manase, pitit Jozèf la. Konsa, pòsyon tè papa yo a rete nan menm branch fanmi an.
Men tout lòd ak regleman Senyè a te bay Moyiz pou moun pèp Izrayèl yo, lè yo te nan plenn Mowab yo, lòt bò larivyè Jouden, anfas lavil Jeriko.
Ap Bib la
Ap Bib pou timoun
