Matye 28:16-20

Onz disip yo ale sou ti mòn nan peyi Galile a, kote Jezi te di yo ale a. Lè yo wè l, yo adore li. Men, te gen nan yo ki pat fin kwè nèt. Jezi pwoche bò kote yo, li di yo konsa: — Mwen resevwa tout pouvwa nan syèl la ak sou tè a. Ale fè disip pou mwen nan tout nasyon, batize yo nan non Papa a, Pitit la ak Sentespri a. Moutre yo pou yo obsève tou sa mwen te ban nou lòd fè. Chonje sa byen: mwen la avèk nou toulejou, jouk sa kaba.