Malachi 4:1-6

Gade! Jou a ap vini: Pral fè cho anpil tankou nan yon fou. Tout awogan yo ansanm ak tout mechan yo pral boule tankou pay chèch. Se Senyè a menm ki di sa. Wi, jou sa a, y'ap boule nèt san kite tras. Men, pou moun k'ap sèvi m yo, pouvwa mwen ki la pou delivre yo a ap leve tankou yon bèl solèy byen klere. Yo pral sote ponpe tankou jenn ti towo gra ki lage nan savann. Nou pral pilonnen mechan yo, yo pral tankou sann dife anba pye nou, jou m'a deside pou m aji a. Se Senyè ki gen tout pouvwa a ki di sa. Pa bliye sa Moyiz, sèvitè m lan, te moutre nou, tout lòd ak tout regleman mwen te ba li sou mòn Orèb la pou tout pèp Izrayèl la. Jou m lan pral yon gwo jou, yon jou ki pral fè moun tranble. Men, anvan li rive, mwen gen pou m voye pwofèt Eli. Li gen pou li fè papa ak pitit rebyen ankò. Si se pa sa, m'ap vini, m'ap detwi peyi nou an nèt ale.