Lik 15:1-10

Pèseptè kontribisyon yo ak moun move zak yo, yo tout t'ap pwoche kote Jezi pou tande sa l'ap di. Farizyen yo ak dirèktè lalwa yo t'ap babye. Yo t'ap di: — Nonm sa a ap resevwa moun k'ap fè sa ki mal, epi l'ap manje ak yo. Lè sa a, Jezi di yo parabòl sa a: — Sipoze yon nonm gen san mouton. Si yonn ladan yo ta pèdi, eske li pa t'ap kite karevendisnèf lòt yo poukont yo pou l'al dèyè sa ki pèdi a? L'ap chache li jouk li jwenn li. Lè l jwenn li, l'ap mete l sou zepòl li ak kè kontan. Lè l tounen lakay li avè l, l'ap rele tout zanmi l ak tout vwazen l yo, l'ap di yo: Vin fè fèt avè m, mwen jwenn mouton m ki te pèdi a. Konsa tou, m'ap di nou, va gen plis kontantman nan syèl la pou yon sèl moun ki t'ap fè sa ki mal epi ki tounen vin jwenn Bondye, pase pou katrevenndiznèf moun k'ap mache dwat, ki pa bezwen tounen vin jwenn Bondye. — Sipoze yon fanm ki gen dis bèl bijou annajan. Si li pèdi yonn, eske li p'ap limen lanp, vire kay la tèt anba pou li bouske nan tout ti kwen jouk li jwenn li? Lè l jwenn li, l'ap rele zanmi l ak vwazin li yo, l'ap di yo: Vin fè fèt avè m. Mwen jwenn pyès lajan m ki te pèdi a. Konsa tou, m'ap di nou sa, gen kontantman nan mitan zanj Bondye yo pou yon sèl moun ki t'ap viv nan peche epi ki tounen vin jwenn Bondye.