Lik 11
11
Jezi moutre moun yo jan pou yo lapriyè
(Matye 6.9-15; 7.7-11)
1Yon lè, Jezi t'ap lapriyè yon kote. #Lik 5.33 Lè l fin lapriyè, yonn nan disip li yo di li:
— Mèt, moutre nou lapriyè tankou Jan te moutre patizan li yo.
2Jezi #Mat 6.9-13 di yo:
— Lè n'ap lapriyè, men sa pou n di:
Papa, nou mande pou non ou toujou respekte.
Vin tabli gouvènman ou lan.
3Chak jou, ban nou manje nou bezwen pou jounen an.
4Padonnen peche nou yo,
paske nou menm tou nou padonnen tout moun ki fè nou mal.
Pa kite nou nan pozisyon pou n tonbe nan tantasyon.
5Jezi di yo ankò:
— Sipoze yonn nan nou ta gen yon zanmi, l'al jwenn zanmi an nan mitan lannwit pou l di li: Zanmi, prete m twa biswit. 6Mwen gen yon zanmi ki sot nan vwayaj ki fenk rive lakay mwen. Mwen pa gen anyen pou m ba li. 7Sipoze #Mat 26.10 nonm lan rete anndan lakay li, li reponn li: Kite m an repo! Pòt la gentan fèmen akle, ni mwen ni timoun yo, nou tout kouche deja. Mwen pa kapab leve pou m ba ou biswit yo. 8M'ap #Lik 18.5 di nou sa: Menm si li pa ta leve pou l ba li biswit yo paske li se zanmi l, li gen pou l leve pou l ba li tou sa li bezwen, si zanmi an pa wont kontinye mande li.
9— Mwen #Mat 7.7-11 menm mwen di nou: Mande, y'a ban nou, chache n'a jwenn, frape y'a louvri pou nou. 10Paske, nenpòt moun ki mande, l'a resevwa. Moun ki chache, l'a jwenn. Y'a louvri pou moun k'ap frape. 11Eske yonn nan nou ki papa pitit ta bay pitit li yon koulèv si pitit la mande l yon pwason? 12Osinon, eske la ba li yon eskòpyon si li mande l yon ze? 13Si nou menm ki mechan jan nou mechan an, nou konn bay pitit nou bon bagay, se pa Papa nou ki nan syèl la ki pou ta refize ban nou Sentespri l, lè nou mande l li.
Dirèktè lalwa yo akize Jezi
(Matye 12.22-30; Mak 3.20-27)
14Jezi #Mat 12.22-30,43-45; Mak 3.22-27 t'ap chase yon move lespri ki te rann yon nonm bèbè. Lè move lespri a sòti, bèbè a pale. Foul moun yo menm te rete men nan bouch. 15Men kèk moun menm t'ap di:
— Se Bèlzeboul, chèf denmon yo, ki ba li pouvwa chase movèzespri.
16Gen #Mak 8.11 lòt ki te vle pran l nan pèlen: yo mande l pou l fè yon mirak ki pou moutre se Bondye ki ba l pouvwa sa a. 17Jezi menm te konnen sa k te nan lide yo. Li di yo konsa:
— Yon peyi ki gen divizyon ladan l, kote moun ap goumen yonn ak lòt, peyi sa a la pou disparèt. Menm kay yo gen pou tonbe yonn sou lòt. 18Konsa tou, si Satan ap konbat pwòp tèt li, pouvwa Satan an pa la pou lontan. Nou di se Bèlzeboul ki ban m pouvwa chase move lespri yo. 19Si mwen menm mwen chase move lespri ak pouvwa Bèlzeboul, patizan nou yo, ak ki pouvwa yo chase move lespri yo? Se poutèt sa se yo menm k'ap ban nou tò. 20Non. #Egz 8.19 Se avèk pouvwa Bondye mwen chase move lespri yo. Sa vle di, pouvwa gouvènman Bondye ki Wa a gentan rive sou nou.
21— Lè yon nonm vanyan ap veye kay li, zam li nan men l, tout byen l yo byen pwoteje. 22Men, #Kol 2.15 si yon pi vanyan pase l vin rive, l'ap bat li, l'ap wete zam ki te ba l fòs yo nan men l, l'ap piye tou sa l te genyen an l'ap separe ak lòt. 23Moun #Lik 9.50 ki pa avèk mwen, se kont mwen yo ye. Moun ki p'ap ede m ranmase, se gaye y'ap gaye.
Lè yon move lespri retounen nan plas li
(Matye 12.43-45)
24— Lè yon move lespri sòti nan yon nonm, l'al pwonmennen toupatou nan dezè, l'ap chache yon kote pou l pran repo. Si l pa jwenn, l'ap di nan kè li: m'ap tounen lakay mwen kote m sòti a. 25Lè l rive, li jwenn nonm lan tankou yon kay byen bale, byen ranje. 26Lè #Jan 5.14 sa a, l'al chache sèt lòt lespri pi mechan pase li, yo antre nan kay la, epi yo enstale yo. Konsa, ka nonm lan vin pi grav pase jan li te ye anvan an.
Moun Bondye beni tout bon
27Pandan #Lik 1.28,42,48 Jezi t'ap pale konsa, yon fanm pran pale byen fò nan mitan foul la, epi l di:
— Fanm ki te pote ou nan vant li epi ki te ba ou tete a, se yon fanm Bondye beni!
28Jezi #Lik 8.15,21 reponn li:
— Moun ki koute pawòl Bondye epi ki mete l an pratik, se yo menm Bondye beni.
Yo mande mirak
(Matye 12.38-42; Mak 8.12)
29Anpil #Mat 12.38-42 moun #1 Kor 1.22 t'ap vin an kantite bò kote Jezi. Li pran di yo:
— Ala move moun se moun alèkile yo! Y'ap mande yon mirak ki pou fè yo wè Bondye dakò ak sa k'ap fèt la. Men, yo p'ap jwenn lòt mirak pase mirak Jonas la. 30Menm jan Jonas te yon avètisman pou moun lavil Niniv yo, se konsa tou Moun Bondye voye nan lachè a va yon avètisman pou moun alèkile yo. 31Jou #1 Wa 10.1 jijman an, larenn peyi ki nan sid la va leve kanpe, l'a fè yo kondannen moun alèkile yo. Paske, li te sòti byen lwen, jouk nan dènye bout latè, pou l te vin tande pawòl bon konprann wa Salomon yo. Men isit la, gen bagay ki pi konsekan pase wa Salomon. 32Jou #Jo 3.5 jijman an tou, moun lavil Niniv va leve kanpe y'a fè yo kondannen moun alèkile yo. Paske yo menm, yo te tounen vin jwenn Bondye, lè Jonas te fè yo konnen mesay la. Men isit la, gen bagay ki pi konsekan pase Jonas.
Lanp kò nou
(Matye 5.15; 6.22-23)
33— Pa #Lik 8.16; Mat 5.15 gen moun k'ap fin limen yon lanp epi pou li sere yon kote, osinon pou li mete li anba yon tab. Okontrè l'ap mete lanp lan yon kote byen wo pou limyè li ka klere tout moun k'ap antre nan kay la. 34Je #Mat 6.22,23 ou se lanp kò ou. Si je ou bon, tout kò ou nan limyè. Men si je ou pa bon, tout kò ou nan fènwa. 35Fè pou limyè ki anndan ou lan pa fènwa. 36Paske si tout kò ou nan limyè san yon sèl pati ladan l pa nan fènwa, l'a klere nèt tankou lè yon lanp klere ou ak bèl limyè li.
Jezi denonse farizyen yo ak dirèktè lalwa yo
(Matye 23.1-36; Mak 12.38-40; Lik 20.45-47)
37Lè #Lik 7.36; 14.1 Jezi fin pale, yon farizyen envite l vin manje lakay li. Jezi antre, l'al chita bò tab la. 38Farizyen #Mat 15.2 an te sezi lè l wè Jezi pat lave men l anvan l manje. 39Men, #Mat 23.1-36 Jezi di li:
— Nou menm farizyen, se konsa nou ye. Nou netwaye tout deyò gode a ak deyò plat la, men anndan kè nou se lide vòlò ak mechanste ase ki genyen. 40Bann egare! Bondye ki fè deyò a, se li menm ki fè anndan an tou. 41Pito nou bay pòv tou sa ki nan gode nou yo ak nan plat nou yo. Lè sa a, anyen nan tou sa nou genyen p'ap mete nou nan kondisyon pou nou pa ka sèvi Bondye.
42— Malè pou nou, farizyen! Nou bay Bondye ladim nan donn ti pye mant, pye sitwon ak pye legim. Men, nou pa fè sa ki dwat devan Bondye, nou pa renmen Bondye. Okontrè, se sa pou n te fè san nou pa bliye fè lòt bagay yo tou.
43— Malè #Lik 20.46 pou nou, farizyen! Nan sinagòg yo, nou renmen chita kote pou tout moun wè nou, nou renmen pou moun bese jouk atè pou di nou bonjou sou plas piblik. 44Malè pou nou! Paske, nou tankou tonm ki ra tè: moun ap mache sou yo san yo pa konnen.
45Yonn nan dirèktè lalwa yo pran lapawòl, li di Jezi konsa:
— Mèt, lè ou pale konsa, ou joure nou tou wi.
46Epi Jezi reponn li:
— Malè pou nou tou, nou menm dirèktè lalwa yo! N'ap chaje moun ak chay ki twò lou pou pote. Men nou menm, nou pa menm manyen l ak ti dwèt nou. 47Malè pou nou! N'ap bati bèl tonm pou pwofèt zansèt nou yo te touye. 48Lè nou fè sa, nou admèt zansèt nou yo te byen fèt. Nou dakò ak yo: yo menm yo te touye pwofèt yo, nou menm n'ap bati tonm pou yo. 49Se poutèt sa Bondye te di nan bon konprann li: M'ap voye pwofèt avèk apòt ba yo. Y'a touye kèk ladan yo, y'a pèsekite lòt yo. 50Se konsa moun alèkile yo ap reskonsab pou san tout pwofèt ki te koule depi lè Bondye te fin kreye latè; 51wi, #Jen 4.8; 2 Kwo 24.20 depi san Abèl jouk san Zakari yo te touye ant lotèl la ak kote ki rezève apa pou Bondye nan tanp lan. Wi. Se mwen k'ap di nou sa: Y'a mande moun alèkile yo kont pou tout krim sa yo.
52— Malè pou nou, nou menm dirèktè lalwa yo! Nou pran kle ki pou louvri pòt kay konesans la: nou menm nou pa antre ladan, epi moun ki ta vle antre, nou anpeche yo antre.
53Lè Jezi kite kote l te ye a, dirèktè lalwa yo ak farizyen yo konmanse atake l avèk fòs. Yo t'ap poze l kèsyon sou anpil bagay. 54Yo #Lik 20.20 t'ap pare pèlen pou li pou pran kèk pawòl nan bouch li.
Chwazi Kounye ya:
Lik 11: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.
