Jan 9:1-41

Jezi t'ap pase yon kote konsa lè l wè yon nonm ki te avèg depi li te fèt. Disip li yo mande li: — Mèt, poukisa nonm sa a te fèt tou avèg en? Se peche pa l osinon peche manman l ak papa l ki lakòz sa? Jezi reponn yo: — Se pa ni peche pa l ni peche manman l ak papa l ki lakòz sa. Li fèt avèg, se pou moun ka wè sa pouvwa Bondye a ka fè nan li. Toutotan fè klè toujou, se pou m fè travay moun ki voye m lan ban m fè a. Talè konsa pral fè nwit, pèsonn p'ap ka travay. Toutotan mwen la sou latè, mwen se limyè k'ap klere tout moun ki sou latè. Apre li fin di pawòl sa yo, Jezi krache atè, li fè yon ti labou ak krache a, li fwote je nonm lan avèk labou a. Li di l konsa: — Al lave figi ou nan gwo basen Siloe a. (Mo Siloe sa a vle di: Moun yo te voye a.) Avèg la ale, li lave figi li. Lè l tounen, li te ka wè nan tou de je l yo. Moun ki te rete bò lakay li yo ansanm ak tout moun ki te konn wè l ap mande charite anvan sa, yo tout t'ap di: — Apa nonm ki te konn chita ap mande charite a! Gen moun ki t'ap di: — Se li menm wi. Gen lòt ki t'ap di tou: — Non. Se pa li. Men, li sanble l anpil. Lè sa a nonm lan di yo: — Se mwen menm menm. Yo mande li: — Kijan ou fè pa avèg ankò a? Li reponn yo: — Nonm yo rele Jezi a fè yon ti labou, li fwote je m ak labou a, epi li di m al lave figi m nan basen Siloe a. M ale. Lè m fin lave figi m, mwen wè m wè. Yo mande li: — Kote nonm sa a? Li reponn yo: — Mwen pa konnen non. Yo pran nonm ki te avèg la, yo mennen l bay farizyen yo. Se te yon jou saba Jezi te fè labou a pou geri avèg la. Se poutèt sa, farizyen yo tou, yo mande nonm lan sa k te pase ki te fè l ka wè kounyeya. Li di yo: — Li mete ti kras labou sou je m yo, lèfini mwen lave figi mwen. Se konsa, kounyeya mwen wè. Te gen de twa nan farizyen yo ki t'ap di: — Nonm ki fè sa a pa ka sòti nan Bondye. Li pa obeyi lalwa repo a. Men, gen lòt ki t'ap di: — Ki jan yon nonm k'ap fè sa ki mal kapab fè yon mirak konsa? Te vin gen divizyon nan mitan yo. Farizyen yo mande nonm ki te avèg la: — Ou menm, dapre ou, nonm ki louvri je ou yo, ki moun li ye? Li reponn: — Se yon pwofèt li ye. Men, jwif yo pat vle kwè li te avèg anvan sa. Yo fè chache papa l ak manman l pou poze yo keksyon. Yo mande yo: — Eske nonm sa a se pitit gason nou an vre? Eske se vre li te fèt avèg? Sa k pase l ki fè li wè kounyeya? Papa a ak manman an reponn yo: — Nou konnen se pitit gason nou li ye, li te fèt avèg. Men, nou pa konnen sa k pase l ki fè l wè kounyeya. Nou pa konnen tou ki moun ki louvri je li. Nou mèt mande li. L ase gran konsa. Li ka reponn li menm. Papa a ak manman an te pale konsa paske yo te pè jwif yo. Paske, jwif yo te tonbe dakò sou pwen sa a: Tout moun ki ta di Jezi se Kris la, yo t'ap mete yo deyò nan sinagòg la. Se poutèt sa papa l ak manman l te di: l ase gran, li ka reponn li menm. Nou mèt mande li. Farizyen yo rele nonm ki te avèg la yon dezyèm fwa. Yo di li: — Di verite a devan Bondye. Nou konnen nonm sa a se yon nonm k'ap fè sa ki mal. Li reponn yo: — Mwen pa konnen si se yon moun k'ap fè sa ki mal osinon sa ki byen. Yon sèl bagay mwen konnen: mwen te avèg, kounyeya mwen wè. Yo mande li: — Men, kisa l te fè? Ki jan l te fè pou louvri je ou yo? Li reponn yo: — Mwen deja di nou ki jan, men nou pa t'ap koute. Poukisa nou vle m redi l ankò? Gen lè, nou menm tou, nou ta renmen tounen disip li? Yo joure l, yo di l konsa: — Se ou menm ki disip li! Nou menm, nou se disip Moyiz. Nou konnen Bondye te pale ak Moyiz. Men, li menm, nou pa menm konnen ki bò l sòti. Nonm lan reponn yo: — Ala bagay dwòl en! Nou pa konnen ki bò l sòti? Epi, se li menm ki louvri je m yo! Nou tout nou konnen sa: Bondye pa tande lè se yon moun k'ap fè sa ki mal ki pale avè li. Men, se pa menm bagay lè se yon moun ki respekte l, yon moun ki fè volonte l k'ap pale avè li. Nou poko janm tande yo fè yon moun ki fèt avèg wè. Si nonm sa a pat sòti nan Bondye, li pa ta ka fè anyen. Yo reponn li: — Se nan peche ou fèt, epi ou konprann pou ou vin ban nou leson kounyeya? Epi yo mete l deyò nan sinagòg la. Jezi te vin konnen yo te mete nonm ki te avèg la deyò nan sinagòg la. Lè li kontre avè l, li di l konsa: — Eske ou kwè nan Moun Bondye voye nan lachè a? Nonm lan reponn li: — Mèt, di m ki moun li ye pou m ka kwè nan li? Jezi reponn li: — Apa w'ap gade li! Se li menm k'ap pale avè ou la a wi. Nonm lan di: — Senyè, mwen kwè. Epi li tonbe ajenou devan Jezi. Lè sa a, Jezi di: — Mwen vin sou tè a pou yon jijman: Moun ki avèg yo pral wè. Men moun ki wè yo pral tounen avèg. Te gen kèk farizyen la avèk li. Lè yo tande pawòl sa yo, yo mande l: — Eske nou menm tou, nou avèg? Jezi reponn yo: — Si nou te avèg, nou pa ta koupab akòz sa. Men paske n'ap plede di: nou wè, nou wè, se poutèt sa peche nou rete sou nou toujou.