Jezi menm ale mòn Olivye. Nan denmen maten, byen bonè, li tounen nan tanp lan. Tout foul moun yo pwoche bò kote li. Li chita, li pran moutre yo anpil bagay. Dirèktè lalwa yo ak farizyen yo mennen yon fanm ba li. Yo te bare fanm lan nan adiltè. Yo mete l kanpe devan tout foul moun yo, epi yo di Jezi konsa:
— Mèt, yo kenbe fanm sa a nan men ap fè adiltè. Moyiz te bay lòd nan lalwa a pou yo touye yo lè konsa ak kout wòch. Men, ou menm, kisa ou di nan sa?
Yo t'ap di sa, paske yo te vle pran l nan pèlen pou yo te ka akize li. Men, Jezi bese atè. Epi, avèk dwèt li, li konmanse ekri atè a. Men, moun yo t'ap kouvri l ak kèsyon. Jezi leve atè a, li di yo:
— Se pou moun ki konnen li pa janm peche a ba l premye kout wòch la.
Apre sa, li bese atè a yon dezyèm fwa, li pran ekri ankò. Lè yo tande pawòl sa yo, yonn apre lòt y'al fè wout yo. Premye moun ki te mete deyò se te sa k te pi granmoun yo. Jezi rete pou kont li ak fanm lan ki te kanpe devan l. Lè sa a, li leve, li di fanm lan:
— Madanm, kote moun yo? Pèsonn pa kondannen ou?
Li reponn:
— Pèsonn non, Mèt.
Jezi di li:
— Mwen menm tou, mwen pa kondannen ou. Ou mèt ale. Men, pa janm fè peche ankò.]
Jezi pale ankò ak foul moun yo, li di:
— Se mwen menm ki limyè k'ap klere tout moun ki sou latè. Moun ki swiv mwen va gen limyè ki bay lavi a. Yo p'ap janm mache nan fènwa.
Farizyen yo di li:
— Enhen, apa w'ap fè lwanj pwòp tèt ou ankò! Sa w'ap di a pa ka gen okenn valè.
Jezi reponn yo:
— Menm si mwen t'ap pale tèt mwen byen, sa m'ap di a se verite, paske mwen konnen ki bò m sòti, mwen konnen ki bò m prale. Men, nou menm, nou pa konnen ni ki bò m sòti, ni ki bò m prale. Nou menm, n'ap jije tankou lèzòm jije. Men, mwen menm mwen pa jije pèsonn. Mentou, si yon lè mwen gen pou m jije, m'ap jije byen dapre verite a, paske mwen p'ap jije pou kont mwen. Papa ki voye m lan ap la avèk mwen. Nou jwenn sa ekri nan Lalwa nou an tou: Lè de temwen fè menm depozisyon an, sa yo di a vre. Mwen sèvi temwen pou tèt pa m. Papa a ki voye m lan sèvi m temwen tou.
Yo mande li:
— Kote papa ou?
Jezi reponn yo:
— Nou pa konnen mwen, nou pa konn Papa mwen. Si nou te konnen m, nou ta konnen Papa m tou.
Jezi te nan tanp lan, kote yo mete bwat pou fè ofrann yo. Se la li t'ap di yo tout pawòl sa yo, li t'ap moutre moun yo anpil lòt bagay ankò. Men, pèsonn pat mete men sou li, paske lè l pat ankò rive.
Ap Bib la
Ap Bib pou timoun
