Jeremi 25:1-14

Senyè a te bay Jeremi yon mesay sou pèp peyi Jida a, nan katriyèm lanne reny wa Jojakim, pitit Jozyas, nan peyi Jida. Lè sa a, Nebikadneza te nan premye lanne li depi li te wa peyi Babilòn. Men mesay pwofèt Jeremi te bay tout pèp peyi Jida a ak tout moun lavil Jerizalèm yo: — Depi trèzyèm lanne reny wa Jozyas, pitit Amon, nan peyi Jida rive jòdi a, sa fè venntwazan depi Senyè a ap pale avè m, venntwazan depi m'ap pale ak nou san rete, nou pa vle koute m. Senyè a pa janm sispann voye pwofèt li yo, sèvitè l yo, ban nou. Men nou pa vle koute yo, nou derefize louvri zòrèy nou pou nou tande yo. Yo te di nou pou nou manyè kite vye chemen nou t'ap swiv yo, pou nou manyè sispann fè sa ki mal. Konsa, nou ta ka viv toujou nan peyi Senyè a te ban nou an, peyi li te bay zansèt nou yo pou tout tan tout tan an. Pwofèt yo di nou: Pa kouri dèyè lòt bondye, pa fè sèvis pou yo, pa mete ajenou devan yo. Pa sèvi zidòl nou fè ak men nou pou Senyè a pa fache. Konsa, si nou obeyi Senyè a li p'ap pini nou. Men, se Senyè a menm ki di sa, nou derefize koute l. Nou fè l fache ak zidòl nou fè ak men nou. Se konsa nou rale malè sou tèt nou. Se poutèt sa, men sa Senyè ki gen tout pouvwa a di: Paske nou pa koute m lè m pale nou, mwen pral voye chache tout moun nan nò yo ak sèvitè mwen Nebikadneza, wa Babilòn. Se mwen menm, Senyè a ki di sa. Mwen pral fè yo vin kraze peyi Jida a ak tout moun ladan li, ansanm ak tout peyi nan vwazinaj yo. Mwen pral detwi yo tout. M'ap fè yo tounen yon dezè ki va fè moun sezi, yon pil mazi pou tout tan. M'ap fè yo p'ap tande moun ap pran plezi yo la. Yo p'ap tande vwa moun ki gen kè kontan. Yo p'ap tande y'ap fete moun marye. M'ap fè p'ap gen grenn pou moulen, p'ap gen gaz pou lanp. Tout peyi a pral kraze tounen mazi, yon dezè. Nasyon ki nan vwazinay yo pral sèvi wa Babilòn lan pandan swasanndizan. Apre swasanndizan sa yo, m'a pini wa Babilòn lan ansanm ak pèp li a pou peche yo fè. Se mwen menm Senyè a ki di sa. M'ap detwi peyi moun Kalde yo, m'ap fè l tounen mazi pou tout tan. M'ap voye sou peyi Babilòn lan tout malè mwen te di m'ap voye yo, tou sa pwofèt Jeremi te fè konnen nan non mwen sou nasyon yo, jan sa ekri nan liv sa a. Yo menm tou moun Babilòn yo, anpil lòt nasyon ak gran wa va fè yo tounen esklav. M'ap fè yo peye pou tou sa yo fè.