Jeremi 18:1-12

Senyè a pale ak Jeremi ankò, li di l konsa: — Leve non! Desann kay bòs potri a. Rive la, m'a ba ou yon mesaj. Mwen desann vre. Mwen jwenn bòs la k'ap travay yon krich pou li ba li fòm. Depi krich li t'ap fè a pat sòti byen, li kraze l, li pran tè a, li fè yon lòt krich avè l jan li te vle fè l la. Lè sa a, Senyè a di m konsa: — Nou menm pèp Izrayèl, eske mwen pa gendwa fè ak nou sa bòs la fè ak tè a? Nou nan men mwen menm jan tè a nan men bòs k'ap fè krich la, tande! Lè mwen pran desizyon pou mwen derasinen yon nasyon osinon yon peyi ki gen wa, pou mwen kraze li, pou mwen detwi li, si nasyon an chanje kondit, si li sispann fè mechanste ki lakòz mwen te move a, m'ap chanje lide tou, mwen p'ap fè li sa m'te fè lide li a ankò. Yon lòt lè, mwen pran desizyon pou m leve yon nasyon osinon pou m fè gouvènman yon wa kanpe. Men, si nasyon an fè sa ki pa fè m plezi, si li pa koute m, mwen p'ap fè tout byen mwen te fè lide fè pou li a. Bon! Kounyeya, ou pral pale ak moun peyi Jida yo ansanm ak moun lavil Jerizalèm yo. Men sa Senyè a voye di yo: M'ap pare yon malè pou nou. Mwen fè lide pini nou. Se pou nou chanje, se pou nou kite move pant n'ap swiv la. Chache viv pi byen, manyè sispann fè sa ki mal. Y'ap reponn ou: Se tan ou w'ap pèdi! N'ap toujou kenbe tèt ak Bondye. N'ap toujou fè tout vye lide ki nan tèt nou.