Aprè sa, Samson tonbe damou pou yon fanm ki te rete nan Ravin Sorèk. Fanm lan te rele Dalila. Gwo chèf moun Filisti yo al jwenn Dalila, yo di l konsa:
— Pran tèt Samson! Chache konnen sa ki ba li tout fòs sa a, kijan nou ka met men sou li. N'a mare l anba kòd, n'a rann li san fòs. Lèfini, nou chak n'a ba ou milsan (1.100) pyès lajan.
Se konsa, Dalila al di Samson:
— Tanpri, di m sa ki ba ou tout fòs sa a. Manyè di m kouman yo ta ka mare ou pou kraze kouray ou.
Samson reponn li:
— Si yo mare m avèk sèt kòd tou nèf ki poko fin cheche m'ap pèdi tout fòs mwen, m'ap tankou nenpòt ki moun.
Chèf moun Filisti yo pote sèt kòd tou nèf ki pat ankò fin cheche bay Dalila. Dalila mare Samson avèk kòd yo. Li te fè kèk moun kache nan yon lòt chanm, epi li rete konsa, li di:
— Samson! Men moun Filisti yo sou ou!
Samson kase kòd yo. Moso kòd yo tonbe atè ou ta di fil boule nan dife. Konsa yo pat rive konnen sa ki te ba l tout fòs sa a.
Dalila di Samson:
— Gade jan ou pase m nan betiz! On ban m manti! Tanpri, di m non! Ki jan yo ka mare ou!
Samson di l konsa:
— Si yo mare m ak kòd tou nèf ki poko janm sèvi pou fè okenn travay, m'ap pèdi tout fòs mwen, m'ap tankou nenpòt ki moun.
Dalila pran kèk kòd tou nèf, li mare Samson avèk yo, epi li di:
— Samson! Men moun Filisti yo sou ou!
Li te mete moun yo kache nan lòt chanm lan. Men, Samson kase kòd ki te mare bra l yo tankou si se te fil yo te ye.
Dalila di Samson:
— W'ap pase m nan betiz toujou. W'ap ban m manti. Tanpri, moutre m kijan yo ka mare ou.
Samson di l:
— Si ou pran sèt très cheve m yo ou trese yo ansanm epi ou kenbè yo ak yon gwo peny, m'ap pèdi tout fòs mwen, m'ap tankou nenpòt ki moun.
Dalila fè l dòmi. Li trese sèt très cheve l yo ansanm, li sere yo byen sere avèk yon gwo peny, epi li rele:
— Samson! Men moun Filisti yo sou ou!
Samson leve, li rache peny lan, li detrese cheve l yo.
Dalila di li konsa:
— Ou pa bezwen di ou renmen mwen menm, paske ou pa sensè avè mwen. Sa fè twa fwa ou pase mwen nan betiz. Ou pa janm vle di mwen ki bò fòs ou genyen an soti.
Chak jou li rete la nan kò Samson, l'ap plenyen nan tèt li. Samson pat kapab ankò, rete pou l te mouri. Bout pou bout li ba li sekrè a, li di l konsa:
— Mwen pa janm koupe cheve nan tèt mwen. Se yon nazirit mwen ye, yo mete m apa pou Bondye depi nan vant manman m. Si yo koupe tout cheve nan tèt mwen, m'ap pèdi tout fòs mwen, m'ap tankou nenpòt ki moun.
Lè Dalila wè Samson te ba l sekrè a, li voye rele chèf moun Filisti yo, li di yo:
— Fwa sa a, nou mèt vini, paske li ban m sekrè a.
Chèf moun Filisti yo vin jwenn li. Yo tou pote lajan an avèk yo. Dalila fè dòmi pran Samson sou jenou l, li fè rele yon nonm ki koupe sèt très cheve Samson yo ra. Epi li seye fè fòs ak li. Men Samson te pèdi tout fòs li. Lè sa a, Dalila rele:
— Samson! Men moun Filisti yo sou ou!
Misye leve, li t'ap di nan kè li l'ap soti anba kòd yo, l'ap met deyò tankou lòt fwa yo. Men li pa te konnen Senyè a te gentan lage li. Moun Filisti yo mete men sou li, epi yo pete de grenn je l yo. Yo mennen l lavil Gaza, yo mare l avèk de gwo chenn an asye. Se li menm yo te fè vire gwo wòl moulen prizon an. Men, cheve l te konmanse pouse ankò.
Aprè sa, yon jou, chèf moun Filisti yo te reyini pou fè yon gwo sèvis pou Dagon, bondye yo a. Yo t'ap fè fèt. Yo t'ap di:
— Bondye nou an lage Samson,
lènmi nou an, nan men nou.
Lè pèp la te wè Samson, yo t'ap fè lwanj pou bondye yo a. Yo t'ap di:
— Bondye nou an fè nou mete men sou Samson lènmi nou an ki t'ap devaste peyi a,
ki t'ap touye tout moun sa yo nan mitan nou.
Kè tout moun te kontan. Yo di konsa:
— Fè chache Samson pou n ka pran plezi nou ak li.
Y'al chache Samson nan prizon an, yo mennen l devan yo pou yo te ka pran plezi yo avè l. Yo mete mesye nan mitan de gwo poto. Samson di ti bway ki te kenbe men l lan:
— Mennen m bò de gwo poto ki kenbe tout tanp lan. Mete men m sou yo pou m ka fè yon ti apiye.
Tanp lan te plen moun, fanm kou gason. Tout chèf moun Filisti yo te la. Te gen twamil (3.000) moun konsa, fanm kou gason, anwo twati a ki t'ap gade Samson, ki t'ap pran plezi yo ak li. Lè sa a, Samson lapriyè nan pye Bondye, li di:
— O Bondye Senyè! Tanpri, chonje m non jòdi a! Tanpri, Bondye, ban m fòs ankò pou yon dènye fwa, pou m ka fè moun Filisti yo peye yon grenn kou pou de je m yo pete a.
Epi Samson mete men l sou de gwo poto mitan ki te kenbe tout tanp lan. Li apiye yon men l sou chak. Epi li di:
— M te mèt mouri ansanm ak moun Filisti yo.
Li pouse ak tout fòs li sou poto yo, epi tanp lan tonbe sou tout chèf yo ak sou tout moun ki te la yo. Jou li mouri a, li te touye plis moun pase kantite moun li te touye pandan lavi li.
Frè l yo ansanm ak tout fanmi l yo desann vin pran kadav la. Yo pote l tounen lakay yo, yo antere l nan kavo Manoak, papa li, ant lavil Soreja ak lavil Echtawòl. Li te pase ventan (20 an) ap gouvènen moun pèp Izrayèl la.
Ap Bib la
Ap Bib pou timoun
