Jenèz 35:1-15

Bondye di Jakòb: — Leve non, moute al Betèl, epi rete la. Bati yon lotèl la pou Bondye ki te parèt devan ou lan, lè ou t'ap kouri pou Ezayi, frè ou la. Se konsa Jakòb rele fanmi li yo ansanm ak tout lòt moun ki te ak li yo, li di yo: — Pran tout zidòl n'ap sèvi yo, voye yo jete. Mete nou nan kondisyon pou nou sèvi Bondye. Mete rad pwòp sou nou. Nou pral kite kote nou ye a, nou pral Betèl, kote mwen pral bati yon lotèl pou Bondye ki te reponn lapriyè m lè m te anba tray la, pou Bondye ki te la avèk mwen kote m pase nan vwayaj mwen te fè a. Se konsa yo renmèt Jakòb tout bondye etranje yo te gen nan men yo ansanm ak tout zanno yo te gen nan zòrèy yo. Jakòb antere tou sa anba pye bwadchenn ki te toupre lavil Sichèm lan. Apre sa, yo pati. Tout moun ki te rete nan zòn lan te vin pè Bondye anpil. Yo yonn pa leve al rapousib pitit Jakòb yo. Jakòb rive ansanm ak tout moun ki te avè l yo lavil Louz, nan peyi Kanaran. Se lavil sa a yo rele Betèl tou. Li bati yon lotèl la, li rele kote a Betèl, paske se la Bondye te parèt devan li lè li t'ap kouri pou frè l la. Lè sa a, Debora, bòn Rebeka a, mouri. Yo antere l pi ba Betèl, anba pye bwadchenn lan. Se konsa yo rele pye bwadchenn lan: chenn dlo nan je a. Lè Jakòb te tounen sòti Mezopotami, Bondye parèt ankò devan li, li beni li. Bondye di li ankò: — Yo rele ou Jakòb, pa vre! Enben, yo p'ap rele ou konsa ankò. Apati jodi a, yo va rele ou Izrayèl. Depi lè sa a, se Izrayèl yo rele l vre. Bondye di l ankò: — Se mwen menm Bondye ki gen tout pouvwa a. W'ap gen anpil pitit ak pitit pitit. Gen ladan yo k'ap wa. W'ap si tèlman gen anpil pitit pitit, y'a tounen yon kantite nasyon. Peyi mwen te bay Abraram ak Izarak la, m'ap ba ou li tou. Apre sa, m'ap bay pitit pitit ou yo li. Apre sa, Bondye kite l kote li t'ap pale ak li a, li moute nan syèl. Jakòb pran yon gwo wòch, li plante l pou l make kote Bondye te pale avèk li a. Li pran diven, li wouze wòch la, apre sa li vide lwil sou li. Li rele kote Bondye te pale avè l la Betèl.