Jenèz 31:1-16

Jakòb vin konnen jan pitit gason Laban yo t'ap di: — Jakòb fin pran tou sa ki te pou papa nou. Se byen papa nou li fin ranmase kifè li rich konsa. Jakòb vin wè tou Laban pat ba li menm karaktè li te konn ba li anvan an. Lè sa a, Senyè a di l: — Tounen nan peyi kote ou te fèt la, al jwenn fanmi ou. M'ap toujou la avè ou. Se konsa Jakòb fè chache Rachèl ak Leya. Li voye di yo rive kote l nan savann kote bèt li yo ye a. Li di yo: — Mwen wè karaktè papa nou pa mimn jan avè m ankò. Li chanje anpil, men Bondye papa m lan toujou avè m. Nou tou de nou konnen jan mwen te sèvi ak papa nou ak tout kouray mwen. Men li menm, li toujou ap twonpe mwen. Li chanje lide dis fwa lè lè a rive pou li peye m. Men, Bondye pa janm kite l fè m anyen. Lè Laban di: ou mèt pran tout kabrit takte yo pou ou, tout bann bèt yo tonbe fè pitit takte. Lè li di: m'ap ba ou tout kabrit ki gen re sou tout kò yo, tout bann bèt yo tonbe fè pitit ak re sou tout kò yo. Se Bondye menm ki pran bann bèt papa nou yo, li ban mwen yo. Lè bèt yo mande kwaze, mwen fè yon rèv, mwen wè tout bouk ki t'ap kwaze yo se bouk ki takte, ki pentle ak sa ki gen re sou tout kò yo. Zanj Bondye a pale avè m nan rèv la, li di m: Jakòb. Mwen reponn li: Men mwen wi. Li di m ankò: Leve je ou gade: Tout bouk k'ap vole fenmèl yo se bouk ki takte ak sa ki gen re sou tout kò yo. Se mwen menm k'ap fè sa konsa, paske mwen wè tou sa Laban ap fè ou. Mwen se Bondye ki te parèt devan ou lè ou te Betèl, kote ou te mete gwo wòch la apa pou mwen an. Ou chonje, lè sa a, ou te fè yon pwomès ban mwen. Kounyeya, leve, kite peyi sa a. Tounen nan peyi kote ou te fèt la. Rachèl ak Leya reponn Jakòb: — Nou pa gen anyen ankò pou n eritye nan men papa nou. Eske li pa konsidere nou tankou etranje? Li vann nou. Kounyeya, li fin manje tout lajan yo te ba li pou nou an. Tout richès Bondye wete nan men papa nou an, se pou nou ansanm ak pitit nou yo. Kounyeya, se pou ou fè tou sa Bondye di ou fè.